Read lubukusu Yn. 5 Bible Online

Yn. 5 - lubukusu bible

Yn. 5

¹Enyuma wa kano, Yesu acha Yerusalemu mu Naikara eye dini eye Bayaudi.

²Mu Yerusalemu embi ne silibwa silaangwa sie kamakheese, litiisi liliio lili ne bilibwa biraano, litiisi lino mu Lueburania lilaangwa “Betisaata.”

³Babaandu balwaale bakali, babofu, baleme ne babafwokoya bakonaanga khu luuya lwe bilibwa ebio. [Balindiililanga kameechi kasiubulukhe

⁴sikila buli khase malaika wo Mwami ekhanga mwitiisi omwo mala akhola kameechi kasiubulukha. Abele omulwale onyoa khukhwetumbula mwitiisi elio kameechi ne kasiubulukha aona khukhwama khu bulwaale bwosi bwosi nibwo aba nabwo.][1]

⁵Omundu abao owaba omulwale khu miiko kamakhumi kataru na munaane.

⁶Yesu amubona ne akonileo, mala aamanya ali, omundu oyo aalwalile khu siise sileeyi sirio. Aamureeba ali, “Eku, wenya oone?”

⁷Omulwale aamukobosia ali, “Omwami se ndi no mundu oundumbula mwitiisi kameechi ne kasiubulukha tawe, omundu okundi anyoanga olamo ese ne sikhaka khukwamo.”

⁸Yesu amuboolela ali, “Yinyokha, obukule kumukeeka kwowo mala okeende.”

⁹Ao ne nao omundu oyo aona; abukula kumukeeka kwewe mala arakikha khukeenda. Kano kekholekha endaalo eya Sabato,

¹⁰ nio Bayaudi be bunyali baboolela omundu niye Yesu aonia oyo bali, “Yino eli e Sabato mala Lilaka liefwe se lifukiilila ewe khusuta kumukeeka tawe.”

¹¹Omundu oyo abakobosia ali, “Omundu oumboniisie amboleele khu bukula kumukeeka kwase mala ndekukhe.”

¹²Bamureeba bali, “Naanu okhuboolele khukhola orio?”

¹³Ne omundu niye Yesu aonia oyo se amanya Yesu aba naanu tawe, sikila babaandu bakali baba abuundu ao, mala Yesu amitiokha busa.

¹⁴Enyuma wako Yesu amunyoola mu Lukaangu mala amuboolela ali, “Rekeeresia, ewe luno waonile, nono lekha khukhola bubwoni, busa siindu siibi lukali sinyala siakhwikholekhakho.”

¹⁵Nio omundu chana arekukha mala acha aboolela Bayaudi be bunyali ali, Yesu niye waba namuoniisie.

¹⁶Nio barakikha khu khupia Yesu siibi, sikila aonisie khu ndaalo eya Sabato.

¹⁷Yesu abakobosia ali, “Buli lwosi Paapa wase akholanga kimilimo mala khukhwola sesi khole.”

¹⁸Liboola lino liakhola Bayaudi be bunyali bakhaka lukali khumwiira, se khuli khufunaka Lilaka lie Sabato khwong'ene tawe, ne kakhali aba alomile ali Wele ali Raraawe omwene, ne mu ngila ng'eneyo elekhaasia khu Wele.

¹⁹Nio Yesu abakobosia ali, “Ng'ali ese muboolela enywe ndi, Omwana sanyala akhola sisiindu siosi siosi khu bwewe tawe, akhola nisio abonanga Raraawe nakhola siong'ene. Nisio Paapa akhola nisio Omwana yesi akhola.

²⁰Sikila Paapa asiima Omwana mala amwekesia bibiindu bioosi nibio omwene akholanga. Paapa alamwekesia niye bibiindu biboofu bie khukhola khukhila bino mala enywe mwesi mulauka.

²¹Nga Paapa nalamusianga bafu ne khubaelesia bulamu, mu ngila ng'eneyo Omwana aananga bulamu khwaabo nibo enya khuelesia.

²²Paapa omwene sakhalakilanga omundu yesi yesi tawe. Aelesia Omwana wewe bunyali bwosi khukhalaka.

²³Nio boosi barie Omwana wewe mu ngila neng'ene nga barichanga Raraawe. Omundu yesi yesi okharia Omwana tawe, saria Raraawe owamuruma tawe.

²⁴“Ng'ali ese muboolela enywe ndi, abo baulila kamakhuwa kase ne khusuubila muyo owanduma, bali ne bulamu bwa mindali. Se balikhalakilwa tawe, ne kakhali babira khale mu lifwa bacha mu bulamu.

²⁵Ndikho muboolela bung'ali, esaa elikho yiicha, esaa chana yoolile khale, bafu bakhaulile kumumilo kwo Mwana owa Wele mala abo bakhaulile bakhalamukhe.

²⁶Nga Paapa omwene ne ali niye bulamu bwaakukhakho, mu ngila neng'ene akhola Omwana wewe khuba niye bulamu bwaakukhakho.

²⁷Khwako aelesia Omwana bunyali bwe khukhalaka, sikila ali Omwana wo Mundu.

²⁸Mukhauka sikila kano tawe; esaa elikho yiicha niyo bafu boosi bakhaulile kumumilo kwewe

²⁹ mala barure mu biliindwa biabwe. Abo babakhola kamalayi bakhalamukhe mala bamenye, ne kakhali abo babakhola kamabi bakhalamukhe mala bakhalakilwe.

³⁰“Se nyala khukhola siindu siosi siosi khu bunyali bwase samwene tawe, ese khalaka busa nga Wele ne ambooleele khwako likhalaka liase lili ng'ali, sikila se ndakhakanga khukhola niko nenya tawe, ne kakhali niko oyo wanduma ese enya.

³¹“Ne ndusia buloli khwise samwene, buloli bwase se bunyala bwafukiililwa khuuba bwe bung'ali tawe.

³²Ne kakhali omundu okundi aliio orusia buloli khwise nga abeele samwene ne ndusia, mala manyile ndi niko aloma khwise kali ka ng'ali.

³³ Mwaruma barumwa khu Yoana, mala Yoana arusia buloli khu bung'ali.

³⁴Se kali bali khukhwola mbe ne buloli khukhwama khu mundu tawe; ndoma kano nio mwole khuonisibwa.

³⁵Yoana aba nga etaa eburukha ne khukhosia, mala mwafukiilila khulwe siise khukhwikhoyela buwaanga bwewe.

³⁶Ne kakhali ese ndi ne buloli khwise samwene, buli buboofu khukhila buloli nibwo Yoana arusia. Niko ese khola, kali niko Paapa wase anduma khukhola, karusia buloli khwise, mala kekesia kali Paapa andumire ese.

³⁷ Paapa owanduma chana yesi arusia buloli khwise samwene nga abele ese ne ndusia. Se mwaulilakho kumumilo kwewe namwe mwabona bubweeni bwewe tawe,

³⁸ne se mubikhanga burume bwewe mu miooyo kienywe tawe, sikila se mwasuubila mu mundu niye aruma tawe.

³⁹Mumenieelesia Kamaandiko, sikila mwibaasia muli mulanyoolamo bulamu bwa mindali. Ne Kamaandiko kano ne kamene kaboola khwise,

⁴⁰mala se mufukiilila khukhwicha khwise nio mube ne bulamu tawe.

⁴¹“Se ndayimanga efuma khukhwama khu baandu tawe.

⁴²Ne kakhali ese mumanyile enywe muli baandu ba lukano siina, manyile ndi se mwasiima Wele mu miooyo kienywe tawe.

⁴³Ese nechile ne bunyali bwa Paapa wase, ne se mwanjakaaniile tawe, ne omundu okundi ne echa ne bunyali bwewe omwene mulamwakaanila.

⁴⁴Enywe mwasiima khufumisiana, ne kakhali se mukhaka khunyoola efuma khukhwama khu mulala yeng'ene oli Wele tawe, nono aba, mulasuubila ese muriena?

⁴⁵Kakhaba kario, mukhebaasia muli ese oli musitaka enywe khu Paapa wase tawe. Musa niye mwaramo lilieyikina lienywe, oyo niye oli musitaka enywe.

⁴⁶Abanga ng'ali mwasuubila Musa, andi mwasuubiile ese, sikila Musa aandika khwise.

⁴⁷Ne sikila se musuubila niko aandika tawe, munyala mwasuubila muriena niko ese ndoma?”