Read lubukusu Yn. 7 Bible Online

Yn. 7 - lubukusu bible

Yn. 7

¹Enyuma wa kano, Yesu akeenda eyi ne neyi mu Kalilaya; se enya khukeenda e Buyuda tawe, sikila Bayaudi be bunyali ebweeneyo benyanga khumwiira.

² Siise sia Naikara eye Bisali siaba siimbi,

³nio bawandaaye ba Yesu bamuboolela bali, “Rura ano oche e Buyuda, nio babeeka bowo babone bibiindu nibio olikho okhola.

⁴Se aliio Omundu okisanga niko alikho akhola aaba neenya amanyikhane tawe. Sikila olakholanga bibiindu bino, yeyekesia khu sibala sioosi!”

⁵Akhaba bawandaaye se basuubila mu niye tawe.

⁶Yesu ababoolela ali, “Siise siase sikhoola tawe. Ne biise bienywe biliio buli lwosi.

⁷Sibala se sinyala siamubiila enywe tawe, ne kakhali simbiila ese, sikila buli lwosi ese siboolelanga ndi chingila chasio chili chimbi.

⁸Enywe mwabene khemuche sia naikara. Ese se ndikho nja sia naikara yino tawe, sikila biise biase bikhoola tawe.”

⁹Aloma kano, mala arama mu Kalilaya.

¹⁰Enyuma we bawandaaye khucha sia naikara, Yesu yesi abaloondakho mu bwikisi.

¹¹Bayaudi be bunyali baba balikho bamuenja sia naikara. Bareebanga bali, “Ali waena?”

¹²Babaandu beng'ulung'unya lukali mu mukhung'aano. Balala bali, “Ali omundu omulayi.” Babaandi bali “Tawe, alikho atiimia babaandu.”

¹³Ne se abao omundu owalomaloma ka Yesu abuwaanga busa tawe, sikila baria Bayaudi be bunyali.

¹⁴Nga naikara yaba siimbi khukhwola akari, Yesu acha mu Lukaangu mala arakikha khukhwikisia.

¹⁵Bayaudi be bunyali bauka lukali, mala baloma bali, “Omundu yuno amanyile kamakali ariena mala se asomelakho kano tawe?”

¹⁶Nio Yesu abakobosia ali, “Kamekisio niko nekisia se kali kakaase samwene tawe, kaama khu Wele owanduma.

¹⁷Omundu yesi yesi osiima khukhola niko Wele enya alamanya niko ese nekisianga, ne kali kakamanga khu Wele namwe ne ndomalomanga busa khu bunyali bwase samwene.

¹⁸Omundu olomaloma khu bunyali bwewe omwene akhaka khukhwenyoolela luyali omwene. Ne kakhali owenya luyali luchiile oyo owamuruma ali omusuubilwa, ne sisiindu siosi siosi sikhali sia ng'ali se simulimo tawe.

¹⁹“Musa se amuelesia enywe Lilaka? Ne se aliio khwinywe oria Lilaka chana tawe. Siina sikila enywe ne mulakhakanga khu khunjira?”

²⁰Babaandu chana bamukobosia bali, “Oli ne sisieeno! Naanu olakhakanga khukhwira ewe?”

²¹Yesu abakobosia ali, “Nakhola kamayia lulala, mala enywe mweesi mwauka.

²² Musa amulakiilisia mukhebe babaana benywe basoleeli (Akhaba kario se ali Musa owarakikha tawe ne kakhali bakuuka benywe) khwako mukheba omwana khu ndaalo eye Sabato.

²³ Kaaba bali omwana akhebwa mu Sabato nio Lilaka lia Musa likhafunakwa tawe, siina sikila ne muambwa lirima sikila ese naoniisie omundu mu Sabato?

²⁴Mukhakhalakila omundu khuloondekhana nga abonekha busa tawe, khalaka mu bung'ali.”

²⁵Babaandu ba Yerusalemu balala baloma bali, “Omundu yuno se ali niye be bunyali balakhakanga khukhwira?

²⁶Bona! Alikho alomalomela busa mu baandu mala se baboolakho likhuwa liibi khu niye tawe! Kanyala khuba ka ng'ali be bunyali bano bamanyile bali niye Kristo?

²⁷Akhaba kario nga Kristo naliicha, se aliio omundu olimanya niio amile tawe. Ne fweesi khumanyile niio omundu oyo ama.”

²⁸Nga Yesu ne aba ne ekisia mu Lukaangu aboola mu mumilo kwe angaaki ali, “Enywe ng'ali mu manyile ese ne khumanya niio naama ku? Se necha khulwe bunyali bwase samwene tawe. Oyo owanduma ese ali Omusuubilwa. Enywe se mu mumanyile tawe,

²⁹ne ese mumanyile, sikila nama khu niye lundi anduma ese.”

³⁰Nio bakhaka khumuaamba, ne kakhali se aliio owamutiilakho tawe, sikila esaa yewe yaba ekhoola tawe.

³¹Ne bakali mu sipupu basuubila mu niye mala baloma bali, “Nga Kristo aliicha alikhola kamayia kamakali khukhila niko omundu yuno akholile ku?”

³²Bafarisayo baulila babaandu mu mukhung'aano ne balikho bemoonya bibiindu bino khu Yesu, nio nibo ne basaayi bakhulu baruma balala khu baliindi khu muaamba.

³³Yesu ababoolela ali, “Ese siilikho nanywe akeekhe ari busa, mala ndarekukha nje woyo owanduma.

³⁴Muliimbenja, ne se muliinyoola tawe, sikila se munyala khucha niio ese khabe tawe.”

³⁵Bayaudi be bunyali bareebana bali, “Enya khucha waena niio khukhamunyoola tawe? Alacha mu ngoba che Bakiriki niio babaandu befwe bamenya mala ekisie Bakiriki?

³⁶Aloma ali khulamuenja mala se khulamunyoola tawe, lundi bali se khunyala khucha niio aliba tawe, kano kaboola siina?”

³⁷ Khu ndaalo emaliilisi eya naikara lundi emboofu mu choosi, Yesu eema mala aloma mu mumilo kwe angaaki ali, “Kaaba bali omundu yesi yesi ali ne bulesia, lekha eche khwise mala anywe.

³⁸ Nga liiandiko ne liboola, ‘Omundu yesi yesi osuubila mwise, chinjichi che kameechi kaana bulamu chilamiilila mu mwoyo kwewe.’ ”

³⁹Yesu aloma kano khu Roho Omutakatifu, niye abo basuubila mu Yesu bakhanyoole. Mu siise esio Roho aba asiili khuanwa sikila Yesu aba akhalamukha khukhwama mu lifwa ne khuebwa luyali tawe.

⁴⁰Babaandu balala mu sipupu bamuulila naboola kano mala baloma bali, “Omundu yuno ng'ali ali omung'oosi!”

⁴¹Babaandi baloma bali, “Yuno Kristo!” Ne kakhali babaandi nabo bali, “Kristo saliama Kalilaya tawe!

⁴² Liiandiko liboola lili Kristo aliba we lisaaye lio mwami Daudi mala alisaalwa mu Betelehemu mu lukoba nilwo Daudi amenyangamo.”

⁴³Nio Yesu akila embuliilisiani khuba mu baandu abo tawe.

⁴⁴Balala benya bamuambe, ne sabao omundu namulala owamutiilakho tawe.

⁴⁵Nga baliindi bakobolayo, basaayi bakhulu ne Bafarisayo babareeba bali, “Siina sikila ne mukhamureerire?”

⁴⁶Baliindi babakobosia bali, “Omundu akhabakhoo olomaloma nga omundu yuno tawe!”

⁴⁷Bafarisayo babareeba bali, “Amusilwaasiisie akhaba enywe mwesi?

⁴⁸Enywe mwamanyakho akhaba mulala khu be bunyali namwe mulala khu Bafarisayo owasuubila mu niye ku?

⁴⁹Sipupu sino se simanyile Lilaka lia Musa tawe, khwako bali aasi we silaamo sia Wele!”

⁵⁰ Mulala khu Bafarisayo abo aba Nikodemu, owacha khubona Yesu siilo. Aboolela babaandi ali,

⁵¹“Khuloondekhana ne Lilaka liefwe, se khunyala khukhalakila omundu ne khukhamuulila mala khwamenieelesia nisio akholile tawe.”

⁵²Bamukobosia bali, “Bulayi, wesi khane waama Kalilaya? Menielesia kamaandiko olabona oli omung'oosi se akhamekho e Kalilaya tawe.” [

⁵³Mala buli mundu aloota ewewe,