Read lubukusu Yn. 8 Bible Online

Yn. 8 - lubukusu bible

Yn. 8

¹Ne kakhali Yesu acha khu sikulu sia Miseituni.

²Mumakhelebeende aakobola mu Lukaangu. Babaandu boosi bamukara; mala ekhala aasi arakikha khubeyikia.

³Baandiki ne Bafarisayo bareera omukhasi niye banyoola mu bueeyi, mala bamwimisia ebweeni wabwe boosi.

⁴Bareeba Yesu bali, “Omwekisia, omukhasi yuno anyoolekhe ne alikho akhola bueeyi.

⁵ Mu Lilaka liefwe Musa alaka ali omukhasi nga yuno ari khukhwola apwe kamabaale afwe. Ne, ewe oloma oli siina?”

⁶Baboola kano khukhaka Yesu, nio banyoole engila eye khumuyaala. Ne kakhali Yesu enama aasi mala aandika mwiloba ne lulwala lwewe.

⁷Nga bemao ne balikho bamureeba kamareeba, akololokha mala ababoolela ali, “Omundu yesi yesi khwinywe okhakholakho bubwoni tawe, abe owe khunyoa khumuchukucha libaale!”

⁸Enama lundi mala aandika aasi.

⁹Nga ne baulila kano boosi barakikha khurekukha sia mulala khukhwamila khu bakhulu. Balekhao Yesu yeng'ene no mukhasi chana oyo ne emile ao.

¹⁰Yesu akololokha mala amureeba ali, “Bali wae? Se aliio na mulala oramireo khu khukhalakila tawe?”

¹¹Omukhasi chana amukobosia ali, “Omwami salikhoo tawe.” Nio Yesu amuboolela ali, “Bulayi nono, akhaba ese se khukhalakila tawe. Khoche ne okhakhola lundi bubwoni tawe.”][2]

¹² Yesu aboolela lundi Bafarisayo ali, “Ese niise buwaanga bwe sibala. Omundu yesi yesi ounonda alaba ne buwaanga bwe bulamu, ne salikeenda mu siilima tawe.”

¹³ Bafarisayo bamuboolela bali, “Nono ewe olikho orusia buloli bwowo wamwene, niko oloma se kafukiililwa tawe.”

¹⁴Yesu abakobosia ali, “Tawe, akhaba ne mboola kakaase samwene niko mboola kali ng'ali sikila manyile niio naama nende niio ndikho nja. Enywe se mumanyile niio naama, namwe niio ndikho nja tawe.

¹⁵Mukhalaka likhalaka mu ngila eye kamebaasio ke babaandu. Ese se khalakila omundu yesi yesi tawe.

¹⁶Ne abanga bali khola ndio, andi likhalaka liase lili ng'ali, sikila se ndi seng'ene mu khukhola ndio tawe, Paapa owanduma ali ne nase

¹⁷kaandikwa mu Lilaka lienywe bali, buloli bwe babaandu babili bwaaba ne bufukiilisiana, aba nilio baboola lili lia ng'ali.

¹⁸Ese ndusia buloli khwise samwene ne Paapa owanduma yesi ambambila engubo.”

¹⁹Bamureeba bali, “Raraao ali wae?” Yesu abakobosia ali, “Se mumanyile ese namwe Paapa wase tawe. Abanga bali mwamanya ese andi akhaba Paapa yesi mwamumanya.”

²⁰Yesu aboola kano koosi nga ekisia mu Lukaangu, mu lusiro lwe khubiikha kamasanduku ke siianwa. Ne se aliio owamuaamba tawe, sikila esaa yewe yaba ekhoola tawe.

²¹Yesu ababoolela lundi ali, “Ndarekukha nje ne enywe mulambiima mala mulafwila mu bwoni bwenywe. Se munyala mwacha niio ndikho nja tawe.”

²²Nio Bayaudi be bunyali baloma bali, “Aloma ali se khunyala khucha niio alikho acha tawe. Aba lino liboola lili aleyira omwene?”

²³Yesu abakobosia ali, “Enywe muli be aasi ano ne ese naama angaaki. Enywe mwama khu sibala sino, ne ese se naama khu sibala sino tawe.

²⁴Ako niko kakila ne muboolela enywe ndi mulifwila mu bwoni bwenywe. Mala mulifwila mu bwoni bwenywe ne mukhasuubile muli, ‘Ese Niye’ tawe.”

²⁵Nio bamureeba bali, “Ewe naanu?” Yesu abakobosia ali, “Niko mubooleele khukhwama mu khurakikha.

²⁶Ndi ne kamakali niko mboola khwinywe, kamakali ke khumukhalakila. Ne kakhaba kario owanduma ese ali omusuubilwa ne ese mboolela sibala niko naulila khukhwama khu niye kong'ene.”

²⁷Se bamanyilisia bali Yesu aba alikho ababoolela khu Paapa tawe.

²⁸Nio ababoolela ali, “Nga mulisuta Omwana wo Mundu angaaki mulimanya muli, ‘Ese Niye,’ mala mu limanya muli se khola sisiindu siosi siosi khu bunyali bwase samwene tawe, ne kakhali mboola niko Paapa anjekisie ese khuloma kong'ene.

²⁹Ne oyo owanduma ese ali ne nase, se andekhile seng'ene tawe, sikila buli lwosi khola kamusiimisia niye.”

³⁰Bakali babaulila Yesu naboola bibiindu bino bamusuubila.

³¹Nio Yesu aboolela babamusuubila ali, “Mwaaba ne muria kamekisio kase, aba enywe ng'ali muli babeeka base

³²mulamanya bung'ali ne bung'ali chana bulamukhola mube balekhuule.”

³³ Bamukobosia bali, “Efwe khuli lisaaye lia Aburahamu, mala se khwabakho nasioobi bo mundu yesi yesi tawe. Nono siina nolakhuboolelanga oli, ‘Mulaba balekhuule?’ ”

³⁴Yesu aababoolela ali, “Ndikho muboolela enywe bung'ali, omundu yesi yesi ookhola bubwoni ali nasioobi owe bubwoni.

³⁵Nasioobi se abechangao buli lwosi nga omwana we mungo mu bweene tawe, ne kakhali omwana niye owe mungo mu bweene buli lwosi.

³⁶Khwako omwana ne amukhola mwaba balekhuule, aba ng'ali mulabeela elala balekhuule.

³⁷Manyile ndi muli lisaaye lia Aburahamu mala mulakhakanga khukhunjira, sikila se munyala khufukiilila kamekisio kase tawe.

³⁸Ese ndomaloma khu niko Paapa wase anjekeesie, ne kakhali enywe mukhola niko raraawenywe amuboleele.”

³⁹Bamukobosia bali, “Paapa wefwe ali Aburahamu.” Yesu abakobosia ali, “Ng'ali muba babaana ba Aburahamu, andi mukholanga bibiindu ne bibieene nibio akhola.

⁴⁰Koosi niko kholile kali khumuboolela enywe bung'ali nibwo naulila khukhwama khu Wele, ne enywe nanywe mulakhakanga khukhunjira ese. Aburahamu sakhola sisiindu nga sino tawe!

⁴¹Mulikho mukhola niko raraawenywe aakhola.” Bakobosia bali, “Wele omwene niye Paapa yeng'ene niye khuli naye ne efwe khuli babaana bewe ba ng'ali.”

⁴²Yesu abakobosia ali, “Wele aba ng'ali Raraawenywe andi mwasiima ese, sikila ese necha khukhwama khu Wele mala luno ndi ano. Ese se necha khu bunyali bwase samwene tawe, ne kakhali Wele aanduma.

⁴³Siina sikila ne mukhamanya niko muboolela tawe? Lili, sikila se munyala mwekhaliilikha khurekeeresia burume bwase tawe.

⁴⁴Enywe muli babaana ba raraawenywe Sietani, mala mwenya khuloonda liliekoomba lia raraawenywe. Aaba omwiiri khukhwama mu khurakikha ne khukhwola luno se abakho lubeka lwe bung'ali tawe, sikila bung'ali se bumulimo tawe. Ne aloma bubeeyi, aba alikho akhola ke liiba liewe, sikila ali omubeeyi, mala niye raraawe owe bubeeyi bwosi.

⁴⁵Ne kakhali Ese mboola bung'ali mala niko kakila ne mukhasuubila tawe.

⁴⁶Naanu khwinywe onyala ekesia ali ese ndi ne bubwoni? Ne naaba ne mboola bung'ali nono siina sikila ne mukhasuubila ese?

⁴⁷Oyo owiicha khukhwama khu Wele arekeeresianga Elomo eya Wele. Enywe, kakhaba kario, se mwama khu Wele tawe, mala niko kakila ne mukhakirekeeresia tawe.”

⁴⁸Bayaudi bakobosia Yesu bali, “Efwe se khuli ng'ali mu khuboola khuli ewe oli Omusamaria mala oli ne sisieeno?”

⁴⁹Yesu abakobosia ali, “Se ndi ne sisieeno tawe. Ese naelesia Paapa wase liria ne kakhali enywe se mumbelesia ese liria tawe.

⁵⁰Se ndikho neenjela liria tawe. Ne kakhali aliio owenyekha ariibwe, mala niye omukhalaki.

⁵¹Ndikho muboolela enywe bung'ali ndi, Yesi yesi oria kamekisio kase salifwa tawe.”

⁵²Bamuboolela bali, “Nono khwanyoola bung'ali khuli ewe oli ne sisieeno! Aburahamu ne bang'oosi bafwa, ne nawe oboola oli yesi yesi oria kamekisio kowo salifwa tawe.

⁵³Paapa wefwe Aburahamu afwa. Ne ewe se olikho oboola oli, oli Omukali khukhila Aburahamu tawe, namwe oli omukali khumukhila? Ne akhaba bang'oosi bosi bafwa ewe weyibaasia oli, oli naanu?”

⁵⁴Yesu abakobosia ali, “Naaba ne neelesia samwene luyali, aba luyali olwo se lulaba ne bukhala bwosi bwosi tawe. Paapa wase niye oumbechanga luyali, niye mwesi mulomanga muli ali Wele wenywe.

⁵⁵Se mwamumanyakho na akeekhe ene tawe, ne ese namumanya. Naaba ne ndoma ndi, ese se mu manyile niye tawe, aba sesi nabeele omubeeyi nga enywe. Ese mumanyile lundi naria elomo yewe.

⁵⁶Raraawenywe Aburahamu ekhoya ali akhabone siise sie khukhwicha khwase; asibona mala aasangaala.”

⁵⁷Bayaudi abo bamuboolela bali, “Ewe se oli ne bukhulu bwe kimiiko akhaba kamakhumi karaano kong'ene tawe, nono oloma oriena oli wabona Aburahamu?”

⁵⁸Yesu abakobosia ali, “Ndikho muboolela bung'ali, Aburahamu nakhasaalwa tawe, ‘Ese Ndiio.’ ”

⁵⁹Nio bangala kamabaale bali bamupe, ne Yesu amitiokha arura mu Lukaangu.