Read lubukusu Yn. 9 Bible Online

Yn. 9 - lubukusu bible

Yn. 9

¹Nga Yesu aba ne alikho akeenda, abona omundu owasaalwa omubofu.

²Babeeka bewe bamureeba bali, “Omwekisia, bubwoni bwa naanu bubwakila yuno aasaalwa omubofu? Bwaba bubwewe omwene namwe bwe basaasi bewe?”

³Yesu abakobosia ali, “Bubofu bwewe se buli sikila bubwoni bwewe, namwe bwe basaasi bewe tawe. Ali omubofu nio kamaani ka Wele kabonekhe ne kakhola kimilimo mu niye.

⁴Enje ne siili kumuusi, khukhwola khukhole kimilimo kioyo owanduma ese; siilo silikho siicha niio omundu akhanyala akhola kimilimo tawe.

⁵ Ese ne siili mu sibala, ndi buwaanga bwe sibala.”

⁶Yesu namalile khuboola kano afucha aasi atubaasia liloba ne kamare mala abakha litosi chana siamoni wo mundu oyo

⁷mala aboola ali, “Khoche osaabe mu moni mwitiisi lia Siloamu.” (Liboola lili “Owarumwa”). Omundu chana acha. Asaaba mu moni, mala akobola ne alikho abona.

⁸Nio babamenya naye siimbi ne babaandu babamubona ne esabiilisia kano ne kakhekholekha, bareeba bali, “Omundu yuno se ali niye owikhalanga ne esabiilisia?”

⁹Balala baloma bali, “Yee niye” ne babaandi baloma bali, “Se ali niye tawe, afwaanana busa naye.” Nio omundu chana omwene aloma ali, “Niise.”

¹⁰Bamureeba bali, “Kali kariena luno olikho obona?”

¹¹Akobosia ali, “Omundu olaangwa Yesu arokile litosi ambakha siamoni chase amboolela nje Siloamu saabe mu moni. Khwako njiile, mala nga saabile, abwene ne abwene, naona.”

¹²Bamureeba bali, “Ali waena?” Naye abakobosia ali, “Se manya tawe.”

¹³Babamenya naye siimbi bayila omundu oyo khu Bafarisayo.

¹⁴Endaalo niyo Yesu akholelamo litosi ne khuonia omubofu yuno yaba eye Sabato.

¹⁵Nio, Bafarisayo bareeba omundu chana lundi bali, “Wamile oriena Waona?” Aababoolela ali, “Aakhile litosi khu moni chase, nasaaba mu moni, mala luno nyala nabona.”

¹⁶Bafarisayo balala baloma bali, “Omundu ookholile kano se anyala aaba ne aama khu Wele tawe, sikila se aria lilaka lie Sabato tawe.” Kakhaba kario, babaandi baloma bali, “Omundu omwoni anyala ariena khukhola kamayia nga kano.” Mala liliabukhana liabao akari wabwe.

¹⁷Nio Bafarisayo bachana bareeba omundu oyo lundi bali, “Oloma oli akhuonisie ewe bubofu bwowo, ewe oboola siina khu niye?” Omundu chana abakobosia ali, “Omung'oosi niye.”

¹⁸Bayaudi be bunyali, kakhaba kario, se bafukiilila khusuubila bali omundu oyo aba omubofu mala luno anyala abona tawe, khukhwola nga ne balaanga raraawe ne maawe.

¹⁹Babareeba bali, “Yuno omwana wenywe niye muboolanga muli asaalwa omubofu; nono kabeele kariena luno anyala aabona?”

²⁰Basaasi bewe babakobosia bali, “Khu manyile khuli ali omwana wefwe mala asaalwa omubofu.

²¹Ne se khumanya kali kariena nga luno anyalile khubona tawe namwe se khumanya abeele naanu omuonisie bubofu bwewe tawe. Mureebe omwene, ali omundu omukhulu busa omwene anyala akobosia!”

²²Basaasi bewe baloma bario sikila abeele bariire Bayaudi be bunyali ba baba ne bafukiilisiane bali balaoona khukhwama mu sinakooki omundu yesi yesi osuubila ali Yesu ali Kristo.

²³Esio nisio sisiakila basaasi bewe baloma bali, “Ali omundu omukhulu mureebe omwene!”

²⁴Lukhola khabili balaanga omundu owasaalwa omubofu chana mala bamuboolela bali, “Khusuubisie ebweeni wa Wele oli olaboola bung'ali! Khumanyile khuli omundu okhuonisie yuno ali omwoni.”

²⁵Omundu oyo abakobosia ali, “Ese se manya nali omwoni namwe nakhali omwoni tawe, ese manyile sisiindu silala, naba omubofu ne luno mbona.”

²⁶Bamureeba bali, “Siina nisio akhukholilekho? Akhuonisie bubofu bwowo ariena?”

²⁷Akobosia ali, “Namubooleele khale mala se mwenya khurekeeresia tawe. Siina sikila ne mwenya khuulila lundi? Namwe mwesi mwenyile khuba babeeka bewe?”

²⁸Bamulaama ne baloma bali, “Ewe oli Omweeka wo mundu oyo ne efwe khuli babeeka ba Musa.

²⁹Khu manyile khuli Wele alomaloma khu Musa; ne omundu oyo naye, se khu manyile akhaba niio aama tawe!”

³⁰Omundu chana aakobosia ali, “Likhuwa lino lili lie khuukia! Enywe se mumanyile niio aama tawe, mala aambonisie ese bubofu bwase!

³¹Khumanyile khuli Wele se arekeeresianga babooni tawe; arekeeresianga babaandu bamuria ne khukhola niko niye enya.

³²Khukhwama mu khurakikha khwe sibala, se aliio owaulilakho bali omundu yesi yesi eekula chimoni cho mundu owasaalwa omubofu tawe.

³³Banga omundu yuno se eecha khukhwama khu Wele tawe, andi se aanyala khukholakho siosi siosi tawe!”

³⁴Bamukobosia bali, “Ewe wasaalwa mu bwoni lundi wakhulila mu bwoni onyala oriena khukhwekisia efwe?” Mala bamuoona, mu sinakooki.

³⁵Nga Yesu ne aulila kakaba ne kekholekhe, anyoola omundu chana mala amureeba ali, “Ewe osuubila mu Mwana wo Mundu?”

³⁶Omundu oyo aamukobosia ali, “Omwami, mboolele, naanu niye nio nyale khu musuubila!”

³⁷Yesu aamuboolela ali, “Wamuboone khale, niye olikholomaloma nawe siise sino.”

³⁸Omundu chana aaloma ali, “Omwami nasuubiile!” Mala aasikama ebweeni wa Yesu.

³⁹Yesu aaloma ali, “Necha khu sibala khuno khukhalaka, nio babofu babone ne abo babona bekele babofu.”

⁴⁰Bafarisayo balala ba babao bamuulila ne aloma kano mala bamureeba bali, “Aakhaba fwesi khuli babofu?”

⁴¹Yesu aabakobosia ali, “Abanga bali muli babofu andi se muli ne bubwoni tawe; ne kakhali sikila muloma muli, mubona, aba lino liekesia lili enywe musiili ne bubwoni.”