Read lubukusu Bikh. 1 Bible Online

Bikh. 1 - lubukusu bible

Bikh. 1

¹ Khu mukoosi Teofilo: Mu sitabu siase sitaayi, naandika bibiindu bioosi nibio Yesu aakhola ne khukhwikisia khukhwama nga ne arakikha kimilimo kiewe,

²khukhwola endaalo niyo abukulilwakho ayilwa mwikulu. Ne akhabukulwa khuyilwa mwikulu tawe, aana lilakiilisia khubirira mu maani ka Roho Omutakatifu khu baandu nibo aarobora khuba barumwa bewe.

³Mu ndaalo kamakhumi kane enyuma we lifwa liewe, aababonekhela barumwa bewe ne ekesia abuwaanga mu ngila choosi ali, aaba omulamu. Bamubona, mala alomaloma nabo ke bubwami bwa Wele.

⁴ Nga ne becha alala, abalakiilisia ali, “Mukharura mu Yerusalemu tawe, ne kakhali khemulindiilile siianwa nisio namuboolela, siianwa nisio Paapa asuubisia khuaana.

⁵ Yoana abatiisia ne kameechi, ne mu ndaalo ndiiti chichiicha, mulabatiisibwa mu Roho Omutakatifu.”

⁶Nga barumwa bakaanana alala bareeba Yesu bali, “Omwami, mu siise sino olakoboselia Baisiraeli bubwami?”

⁷Yesu abakobosia ali, “Se kali kakenywe khumanya siise namwe chindaalo nicho Paapa omwene aarao mu bunyali bwewe tawe.

⁸ Ne mulanyoola kamaani siise nisio Roho Omutakatifu akhamwichekho, mala mulaba baloli base mu Yerusalemu, mu Yuda mwoosi ne mu Samaria ne khukhwola khu siakamo sie sibala.”

⁹ Nga aamala khuloma ario, abukulwa aniina mwikulu ne bamuloleleele, mala lifuumbi liamutiimbia, nibo khumubona lundi tawe.

¹⁰Oli basiiunguusa mu ngaaki bario, nga aaba ne alikho acha, ao ne nao babaandu babili, ba baaba ne chingubo chiwaanga ba bemao.

¹¹Ba baboolela bali, “Bakalilaya, sikila siina ne mwimile nekhuloleelela mu ngaaki? Yesu yuno, obukulwe khurura khwinywe engisibwa mwikulu, alikobola mu ngila ne ng'ene niyo mu mubonelemo nacha.”

¹²Mala barumwa bakobola Yerusalemu khukhwama khu sikulu sia Miseituni embi e kilomita ndala.

¹³ Bengila mu lukoba mala baniina mu lusiro lwe angaki nimwo bamenyanga: Petero, Yoana, Yakobo ne Andereya, Filipo ne Tomasi, Baturimayo ne Matayo, Yakobo okhwa Alufayo, Simoni omusiloti ne Yuda okhwa Yakobo.

¹⁴Bano boosi bebuusianga alala khusaba buli busiele alala ne babaandu ne bakhasi, ne Maria maawe owa Yesu, ne bawandaaye ba Yesu.

¹⁵Mu ndaalo echo, Petero eema akari we basuubili (boosi baba babaandu emia ndala ne kamakhumi kabili) mala aloma ali,

¹⁶“Bawandaayase, liiandiko liaba khukhwola lichusibwe nilio Roho Omutakatifu alomalomela mu Daudi nga ne ang'oola ka Yuda, owarangirira abo ba babaamba Yesu.

¹⁷Yuda aaba owe kumukaanda kwefwe, sikila aaba aaroborwa khukhola ne nafwe kimilimo kino.”

¹⁸ (Yuda aakula kumukuunda ne chirupia nicho aanyoola mu bumayaanu bwewe, aakwa atikhamo, bie munda biarura.

¹⁹Babaandu boosi ba bamenya mu Yerusalemu baulila kakekholekha, nio kumukuunda okwo mu lulimi lwabwe bakulanga bali Akelitama, liboola lili, “Kumukuunda kwe sifuki.”)

²⁰ “Sikila nga kaandikwa mu sitabu sie kimienya kali, ‘Enju yewe erame busa; omundu yesi yesi akhakimenyamo tawe.’ Lundi kaandikwa kali, ‘Omundu okundi abukule bubweyaangu bwewe.’

²¹“Khwako, khukhwola omundu okundi aambaane nafwe nga omuloli khuloondekhana ne khulamukha khwo Mwami Yesu. Khukhwola abe mulala khu nibo khwabechanga nabo busiele nga ne khwakeendanga no Mwami Yesu

²² khurakikhira mu siise sie libatiisia lia Yoana khukhwola khu ndaalo niyo Yesu abukulilwamo khukhwama khwifwe khuniina mwikulu. Mulala khu bano khukhwola abe omuloli alala ne nafwe khu lilamukha liewe.”

²³Khwako bebaasia khu baandu babili: Yosefu, niye balanganga bali Barisaba (lundi amanyikhana bali Yusito), ne Matiasi.

²⁴Mala basaba Omwami bali, “Omwami, ewe omanyile kamebaasio ka buli mundu, nono, khwekesie mulala khu babili bano niye ewe oroboore

²⁵khukhwila mu bukholi nga omurumwa mu bweyaangu bwa Yuda owaukha akobola abuundu wewe.”

²⁶Mala baapa chikura, khu babili, nio Matiasi aroborwa atasibwa khu barumwa ekhumi na mulala.