Read lubukusu Bikh. 10 Bible Online

Bikh. 10 - lubukusu bible

Bikh. 10

¹Abao omundu mu Kaesarea lisina liewe bali Korinelio, owaba omwimeelesi omukhulu we banamae be bubwami bwe Barumi ba balaangwa bali, “Sikoosi sie banamae ba Italia.”

²Aba omundu owe dini owaria Wele. Niye nende be lisaaye lwewe boosi basaayanga Wele. Akholanga kamakali khuyeeta Bayaudi bataambi ne lundi asabanga Wele busiele.

³Embi chisa tisa che kumuusi, aba ne kamalola abona malaika owa Wele ne echa niio ali mala amulaanga ali, “Korinelio!”

⁴Korinelio aloleelela malaika chana mu buri mala aloma ali, “Omwami, siina?” Malaika chana amukobosia ali, “Wele asimisiibwe ne lisaba liowo ne bikholwa bie buaani, mala erekeekhe khu khukobosia.

⁵Khorume babaandu balala e Yopa balange omundu olaangwa bali Simoni Petero.

⁶Ali omukeni munju mwa Simoni omuali owe kamaafu omenyile siimbi ne nyanja.”

⁷Nga malaika arekukha acha, Korinelio alaanga bakholi bewe babili no musikaari, omundu waria Wele mulala khu bakholi bewe ba busiele.

⁸Ababoolela kakaba ne kekholekhe koosi mala abaruma khucha Yopa.

⁹Endaalo eyaloondakho, nga baaba khu lukeendo ne benya khwola Yopa, Petero aniina khunju khusaba, chaba embi chisa sita che kumuusi.

¹⁰Enjala yamulia mala enya khulia, nga siakhulia ne siaba ne sising'oonwa, aaba ne kamalola.

¹¹Abona likulu liekuukhe ne sisiindu silekhanga aasi sisiabonekha nga esuuka embalaayi elikho yikhisibwa ne kimikhanda kine khwiloba.

¹²Mu niyo chabamo chisaang'i chingano choosi, che bikele bine, ne chichiindi nga chimbakilia ne chinyuni che mundaa.

¹³Kumumilo kwecha kwaloma kuli, “Petero, yinyokha; wire mala olie!”

¹⁴Nio Petero aloma ali, “Omwami sekholakho ndio ata atiiti ene tawe. Ese khaliakho sisiindu siosi siosi sie kumusaango namwe sili sinyaalu tawe.”

¹⁵Kumumilo chana kwamubolela lundi kuli, “Okhebaasia sisiindu siosi siosi nisio Wele afukiilila khuba sikwalaafu sibe sie kumusaango tawe.”

¹⁶Kano kekholekha khukhwola khataru, mala sisiindu chana siabukulwa ne khuyilwa mwikulu.

¹⁷Oli Petero asiiuka sifuno sie kamalola ako, babaandu chana nibo Korinelio aba na arumire yaba bareebire niyo enju eya Simoni yaba mala abele nono bolile asilibwa bemile.

¹⁸Balaanga, bareeba bali, “Munju muno alimo omukeni olaangwa bali Simoni Petero?”

¹⁹Petero aaba asikhaka khumanyilisia niko kamalola ako kaboola, ne Roho amuboolela ali, “Ulila! Babaandu bataru balikho bakhuyiima.

²⁰Nono yirekekha mala wikhe, okhakhiinda khucha nabo tawe, sikila ese niye oobarumire.”

²¹Khwako Petero ekha aasi mala aboolela babaandu abo ali, “Ese niye mulayiimanga. Mwenyile siina?”

²²Bamukobosia bali, “Omwimeelesi we banamae Korinelio akhurumire. Ali omundu omulayi owaria Wele lundi niye Bayaudi boosi baria. Malaika owa Wele amubooleele khukhulaanga ewe oche munju mwewe, nio aulile niko omuboolela.”

²³Nio Petero abakaanila, mala abasaaya bakone munju omwo siilo esio. Nga bwasia, Petero aacha nabo, ne basuubili balala babama Yopa bosi bacha ne naye.

²⁴Endaalo eloondakho boola Kaesarea, Korinelio alala ne balebe ne basaale bewe, nibo aaba ne alangile, baaba bamuliindile.

²⁵Nga Petero aaba nakana khwingila munju, Korinelio arura enje khumwakaanila, aasikama aasi ne khumusaaya.

²⁶Ne kakhali Petero amwinyosia ne khumuboolela ali, “Yiima, sikila ese ndi omundu busa nga ewe.”

²⁷Petero achiililila khulomaloma ne Korinelio ne balikho bengila munju. Aanyoolamo babaandu bakali bebuusiisiemo.

²⁸Petero aababoolela ali, “Enywe mumanyile bulayi bwene muli Omuyuda yesi yesi se afukiililwa mu lilaka lie dini yewe akeniye namwe aambaane ne babaandu Be Chikholo chichiindi tawe. Ne kakhali Wele aanjekeesie ndekhe khwibaasia ndi kuli kumusilo khukhola ndio.

²⁹Nio nga ne wanaangile, nechile sendobile tawe. Nono, khureeba ndi, sikila siina ne unaangile?”

³⁰Korinelio aaloma ali, “Yabeele esaa nga yino eri, chindaalo chitaru chiweele, chisa tisa che ekolooba, naba munju mwase ndikho saba. Ao ne nao omundu okundi eema ebweeni wase aba efwarire chingubo ching'enang'ena

³¹ne aloma ali, ‘Korinelio! Wele aulile lisaba liowo ne buaani bwowo biafukiiliilwe.

³²Ruma omundu e Yopa khu mundu olaangwa bali Simoni Petero. Akeniiye mungo mwa Simoni omuali owe kamaafu, omenyile siimbi ne nyanja.’

³³Khwako khulangile khangu, ne wakholile bulayi khukhwicha. Luno khuli ano fweesi ebweeni wa Wele, khwaliindiliile khuulila liosi liosi nilio Omwami akhuelesie khu khubolela.”

³⁴ Abwenao Petero arakikha khuloma ali, “Luno namanyile ndi ng'ali Wele se aromboranga babaandu tawe.

³⁵Wele afukiilila omundu yesi yesi owe ekholo yosi yosi omwisaaya ne khukhola kali ng'ali.

³⁶Mumanyile burume nibwo Wele aruma khu baana ba Isiraeli; ne elwacha Elomo Endayi eye kumuleembe khubirira mu Yesu Kristo, ooli Omwami owa boosi.

³⁷Mumanyile kamakali kakakholeekhe mu sibala sia Isiraeli sioosi, khurakikhira Kalilaya, Yoana ne amalile khukhwilwacha ke libatiisia.

³⁸Mumanyile ka Yesu owa Nasareti nga Wele aamua Roho Omutakatifu ne bunyali, Acha buli abuundu nakhola kamalayi ne khuonia boosi babamiinwa ne Sietani, sikila Wele abechanga ne naye.

³⁹Efwe khuli baloli ba buli siindu nisio akhola mu sibala sia Isiraeli ne mu Yerusalemu. Bamwiira mungila eye khumubamba khu musalaba.

⁴⁰Ne kakhali Wele amulamusia khukhwama mu bafu enyuma we chindaalo chitaru, amukhola abonekhe.

⁴¹Se abonekha khu baandu boosi tawe, ne kakhali khu baloli nibo Wele arobora khaale, efwe khukhwalia ne khunywa naye namalile khulamukha khurura mu lifwa.

⁴²Lundi akhulaka khukhwilwachila babaandu Elomo Endayi, ne khubaboolela nga Wele ne amurobora niye khuba Omukhalaki owe balamu ne bafu.

⁴³Bang'oosi boosi bamulomalomangakho, ne baloma bali yesi yesi omusuubila, bubwoni bwewe bulabeelwa khubirira mu maani ke lisina liewe.”

⁴⁴Nga Petero aba nasilomaloma ario, Roho Omutakatifu ekha khu boosi ba baaba ne barekeeresie burume bwewe.

⁴⁵Bayaudi basuubili ba baaba ne bechile khukhwama e Yopa ne Petero, bauka nga Wele naba ne aanile siianwa siewe sia Roho Omutakatifu khu Be Chikholo bosi.

⁴⁶Sikila babaulila ne balomaloma mu nimi chingeni ne khufumia Wele. Abwenao Petero alomaloma ali,

⁴⁷“Babaandu bano banyoolile Roho Omutakatifu, nga efwe fwesi ne khwanyoola. Nono aliio omundu yesi yesi onyala khubakhiingilila khubatiisibwa ne kameechi ku?”

⁴⁸Khwako aaloma babatiisibwe mu lisina lia Yesu Kristo. Nio bamureeba amenye nabo chindaalo ngekhe.