Read lubukusu Bikh. 11 Bible Online

Bikh. 11 - lubukusu bible

Bikh. 11

¹Barumwa ne basuubili babaandi be mu Buyuda mwoosi baulila bali Be Chikholo bosi banyoolile elomo eya Wele.

²Nga Petero ne acha e Yerusalemu, Bayaudi chana babenyanga Be Chikholo bakhebwe, bamwikiicha ne baloma bali,

³“Siina sikila ewe ne wachiile walia ne babaandu basiinde?”

⁴Nio Petero ababoolela mubwichufu koosi kakaba ne kekholeekhe, khukhwama mu khurakikha. Ababoolela ali,

⁵“Nga ne naba ne saba mu lukoba lwa Yopa, naba ne kamalola nabona sisiindu siikha aasi sifwaana nga esuuka embalaayi ne yikhisibwa aasi mu mikhanda chayo chine khukhwama mwikulu, mala yakamila niio ese naba.

⁶Nekhecha mukari mala nabonamo bibiaayo ne chisaang'i che mundaa, nga chimbakilia ne chinyuni che mundaa.

⁷Nio naulila kumumilo ne kuloma khwise kuli, ‘Petero, yinyokha, ochiire olie!’

⁸Ne kakhali naloma ndi, ‘Tawe, Omwami! Sikila sisiindu sie kumusaango namwe sinyaalu sikhengilakho mukhanwa mwase tawe.’

⁹Kumumilo chana kwalomaloma lundi khukhwama mwikulu kuli, ‘Nibio Wele ang'oona okhabilanganga oli binyaalu tawe.’

¹⁰Lino liakholekha khukhwola khataru, ekhumaliilikha biakobosebwa mwikulu.

¹¹Siise siene esio ne sisiene babaandu bataru baba barumirwe khwise khukhwama Kaesarea, abele boolile anju niio naba.

¹²Roho aamboolela ali nje nabo khatitila tawe. Khwacha ne basuubili basiaase sita bano khukhwama Yopa khukhwola Kaesarea, mala fweesi khwengila munju mwa Korinelio.

¹³Korinelio akhuboolela nga ne abona malaika ne emile munju mwewe, ne amuboolela ali, ‘Ruma omundu mulala Yopa alaange omundu olaangwa bali Simoni Petero.

¹⁴Alakhuboolela burume bulakhuonia ewe wamwene nende be nju yowo boosi.’

¹⁵Ne nga narakikha khulomaloma, Roho Omutakatifu abekhakho bulayi bwene nga ekha khwifwe mu khurakikha.

¹⁶ Abwenao nakhebulila kamakhuwa niko Omwami aaloma ali, ‘Yoana arumikhira kameechi khu batisia, ne enywe mulabatiisibwa ne Roho Omutakatifu.’

¹⁷Kaaba bali Wele aabaelesia siianwa sisiene nga ne akhuwa efwe nga ne khwasuubila mu Mwami Yesu Kristo, abeele ese naanu ooyingania Wele?”

¹⁸Nga ne baulila kano, balekha kamayiingamo kabwe mala bafumia Wele, ne baloma bali, “Nono aba Wele aelesie akhaba Be Chikholo boosi bubweyaangu bwe khukhwikanila mala bamenye.”

¹⁹ Balala khu basuubili basalanila sikila khunyaasibwa khukhwabao nga Sitefano ne erwa, bacha boola e Foenike, Saipurasi ne e Andioka. Ne belwacha burume chana obwo khu Bayaudi bong'ene.

²⁰Ne basuubili babaandi, babama Saipurasi ne Kireni, bacha e Andioka basalanisia burume obwo akhaba khu Bakiriki, ne belwacha Elomo Endayi eyo Mwami Yesu.

²¹Kamaani ko Mwami kaba nabo, babaandu bakali basuubila ne khukobolela Omwami.

²²Kamakhuwa kano kolela ekanisa mu Yerusalemu, nio baruma Baranaba ache e Andioka.

²³Nga ne ola ne khubona nga Wele ne aelesie baandu chikhabi, asangaala nekhubaa kumwoyo boosi babe basuubilifu lundi bang'ali khu Mwami ne kimiooyo kiabwe kioosi.

²⁴Baranaba aba omundu omulayi, owechusibwa Roho Omutakatifu ne lisuubila, ne babaandu bakali beecha khu Mwami.

²⁵Mala Baranaba acha e Tasasi khuyiima Saulo.

²⁶Nga ne amunyoola, amuyila e Andioka, ne khu mwiiko kwosi boombi babonanga babaandu be kanisa ne bekisia sipupu siboofu. Yaba e Andioka niyo basuubili banyoela khulaangwa bali, “Bakristo.”

²⁷Mu siise sienesio, bang'oosi balala bacha Andioka khukhwama Yerusalemu.

²⁸ Mulala khu nibo lisina bali Akabasi, eema ne khulwe kamaani ka Roho ang'oola ali enjala engali elikho yiicha khu sibala sioosi. (Enjala yino yecha mu liamiia lia Kilautio).

²⁹Babeeka abo bafukiilisiana bali, buli mundu khu nibo arume siosi siosi nisio anyala khuyeeta babasiaabwe bamenyile e Buyuda.

³⁰Bakhola bario, mala barumira babemeelesi be kanisa chirupia khubirira khu Baranaba ne Saulo.