Read lubukusu Bikh. 12 Bible Online

Bikh. 12 - lubukusu bible

Bikh. 12

¹Mu siise sienesio, Omwami Herodi arakikha khunyaasia balala khu beeka be kanisa.

²Era Yakobo wandaaye owa Yoana ne embalu.

³Nga ne abona ali liasiimisie Bayaudi, achiililila ario mala aamba ne Petero yesi. (Kano kakholekha mu siise sia naikara eye kimikaati kikhalimo limela tawe.)

⁴ Petero namalile khuaambwa areebwa mu siboe, baamurakho banamae bipupu bine. Buli silala siaba ne banamae bane khu muliinda. Herodi arekekha khumureera mu lisitakwa ebweeni we babaandu Epasaka ne wele.

⁵Nio Petero aarama mu siboe, ne kakhali e kanisa yachiililila khusaba Wele ne kumwoyo kwoosi.

⁶Mu silo, nio busie Herodi areere Petero ebweeni we babaandu, Petero aaba akonile akari we banamae babili. Yaba bamuboyile kiminyololo kibili, lundi banamae baaba esilibwa we siboe baliindiilile.

⁷Ao ne nao, malaika owo Mwami emao, mala buwaanga bwakhosia mu siboe omwo. Nio malaika chana asisiikha Petero libeka, amusiisimusia ne aloma ali, “Yinyokha Khangu!” Ao ne nao kiminyololo kiakwa khukhwama khu makhono ka Petero.

⁸Nio malaika aloma ali, “Yeboa kumusiipi kwowo, mala wefware biraaro biowo.” Petero akhola ario, nio malaika chana amuboolela ali, “Yefwara likooti liowo khuche.”

⁹Petero amuloondakho ne se amanya ali, niko malaika akhola ako kaba kang'ali tawe; akelanga ali kamalola.

¹⁰Babira khu musikaari owe khunyoa nende owa khabili, ekhumaliilikha beecha khu silibwa sie bichuuma siicha mu lukoba. Silibwa esio sisiene siekukha, mala barura enje. Bekha khu ngila eya mwalo, mala ao ne nao malaika alekha Petero.

¹¹Nio Petero amanya kamwikholekhekho, mala aloma ali, “Nono nakhamanya ndi kali ng'ali! Omwami arumire malaika wewe khukhundusia mu bunyali bwa Herodi, ne khurura mu buli siindu nisio Bayaudi bebaasianga bali silakholekha.”

¹²Nga ne amanya ario, acha munju mwa Maria maawe owa Yoana owe lisina liliindi bali Mariko, ebweeneyo babaandu bakali baba bebuusiisieyo khu saba.

¹³Petero akhong'oonda khu lwiiki lwenje, mala omukhaana bali Roda omukholi owe munju omwo acha khukhwikula.

¹⁴Omukhaana chana amanya kumumilo kwa Petero, mala ekhoya lukali. Busangaafu bwakila khwikulayo tawe, ne kakhali atima akobola munju ababoolela ali, “Petero ali khu muliango!”

¹⁵Baboolela omukhaana oyo bali, “Okwa kamalalu ewe!” Ne kakhali niye aandalasilia elala ali kali kang'ali. Nio bamukobosia bali, “Oyo malaika wewe.”

¹⁶Siise esio Petero achiililila khukhong'oonda. Ekhumaliilikha bekula lulwiiki, ne nga bamubona, bauka.

¹⁷Petero abasisia ne kumukhono kwewe mala basila, ababolela nga Omwami ne amurusiisie mu siboe. Nio aloma ali, “Boolela Yakobo ne basuubili babaandi boosi kano.” Nga amala ario arekukha acha abuundu aandi.

¹⁸Oli bwasia, bulomani bwabao akari we banamae khu kakaaba ne kekholeekhe khu Petero.

¹⁹Herodi arusia lilaka bayime Petero, ne se bamunyoola tawe. Nio areeberesia banamae mala arusia lilaka berwe. Enyuma wa kano, Herodi arura e Buyuda acha amenyakakho mu Kaesarea.

²⁰Herodi aakhalalila lukali babaandu ba Tiro ne Sidoni, khwako becha mu bipupu khumubona. Banyoa bafukiilisiana ne Bulasito omwimeelesi we lichipi khuba lubeka lwabwe nio bali abayeete. Nio bacha khu Herodi bamusaba kumuleembe, sikila sibala siabwe siasakhanga biakhulia khukhwama mu sibala sio mwami oyo.

²¹Khu ndaalo nabulebe, Herodi efwara chingubo che bubwami, ekhala khu ndebe yewe eye bubwami, mala alomaloma khu baandu.

²²Babaandu baapa luyoka ne baloma bali, “Se ali omundu olikho olomaloma tawe, ne kakhali Wele!”

²³Abwene ne abwene malaika wo Mwami eera Herodi sikila se aelesia Wele luyali tawe. Chinyeende chamulia siise esio aafwa.

²⁴Elomo eya Wele yachiililila khubalaa.

²⁵Baranaba ne Saulo bamaliilisia kimilimo kiabwe mala bakobola khukhwama Yerusalemu, becha ne Yoana olaangwa Mariko.