Read lubukusu Bikh. 13 Bible Online

Bikh. 13 - lubukusu bible

Bikh. 13

¹Mu kanisa eya e Andioka babaamo bang'oosi ne babekisia. Khu nibo aaba Baranaba, Simioni, (owalaangwa Mumali), Lukio (owa Kireni), Manaeni (niye Herodi akhusia), ne Saulo.

²Nga baba ne basaaya Omwami, ne khukhweyimana khulia, Roho Omutakatifu ababoolela ali, “Ra alubeka Baranaba ne Saulo, bakhole kimilimo nikio mbalangiile.”

³Enyuma we khukhweyima khulia ne khusaba, ba barakho kamakhono ne khubasibula bache.

⁴Nga Baranaba ne Saulo ne bamala khurumwa ne Roho Omutakatifu, bacha Seleusia bengilila emeeli abwenao, bacha khu sibala sisiakarwa ne kameechi sia Saipurasi.

⁵Nga ne boola e Salamisi, belwacha elomo eya Wele mu masinakooki ke Bayaudi. Yoana olaangwa Mariko aba nabo khubayeeta kimilimo.

⁶Bakeenda khu sibala okhwo bola Pafosi, bakaananayo omundu ookhola kamaya omuyaudi owalaangwa Bari-Yesu. Omundu yuno aaba omung'oosi we bubeeyi.

⁷Abechanga omusaale wo muruki owe sibala esio bali Serikio Paulo, owaba omundu omukesi. Omuruki oyo alaanga Baranaba ne Saulo beecha niio aba sikila enya khuulila elomo eya Wele.

⁸Ne kakhali Elimasi (liboola lili omundu ookhola kamaya mu Lukiriki), abayingania, nakhaka khurusia omuruki chana khu lisuubila.

⁹Ne kakhali Saulo owamanyikhana lundi bali Paulo, mukhwichusibwa ne Roho Omutakatifu; aunguusa omufumu oyo mumoni

¹⁰ne aloma ali, “Ewe oli omwana owa Sietani! Oli omusiku owa buli siindu siosi siosi siili silayi. Oli ne buubacha bwa Sietani chingano choosi, ne buli lwoosi obelelelanga khukhaka khukaluukhasia bung'ali bwo Mwami bube bubeeyi!

¹¹Luno omwami alakhukhola ewe obofule lundi se olabona buwaanga khu siise tawe.” Ao ne nao Elimasi arakikha khubona sisiilima, namufweli yamufuunikha chimoni, arakikha khukeenda nabotookhelela akhaka khunyoola yesi yesi amutile kumukhono.

¹²Nga omuruki chana oyo abona ario, asuubila. Sikila auka lukali nga ne aulila kamekisio ko Mwami.

¹³Paulo ne babasie bama Pafosi baniina emeeli bacha boola mu lukoba lwa Perika, mu Pamufilia. Ao Yoana olaangwa Mariko abalekha akobola e Yerusalemu.

¹⁴Khukhwama Perika boola e Andioka eya Pisitia, ne mu sabato bacha mu sinakooki mala bekhala aasi.

¹⁵Nga ne bamala khusoma Lilaka lia Musa ne kamaandiko ke bang'oosi, babemeelesi be sinakooki ba barumira likhuwa bali, “Bawandaayefwe, mwabakho ne likhuwa lie khutinyilisia babaandu, ne musiima lomaloma.”

¹⁶Paulo enyokha eema asuta kumukhono mala achiililila khuloma ali, “Baana ba Isiraeli nende Be Chikholo mwesi muli ano musaayanga Wele ndekeeresie!

¹⁷ Wele owe babaandu ba Isiraeli arobora bakuuka befwe mala akhola babaandu bano baaba ekholo eye kamaani mu sise nisio bamenya e Misiri nga bakeni. Wele abarusia mu Misiri ne kamaani kewe kamakali,

¹⁸ Abekhaliilikha khu miiko kamakhumi kane nga ne baaba mu sichiimi.

¹⁹ Arusiamo chikholo saba mu sibala sia Kanaani aelesia babaandu bewe sibala esio khuba sisiabwe.

²⁰ Kano koosi kabukula embi kimiiko chimia chine ne kamakhumi karaano. “Enyuma wa kano, aabaelesia bakhalaki khukhwola khu sise sio mung'oosi Samweli.

²¹ Ne nga basaba khuba no mwami, Wele abaelesia Saulo okhwa Kishi khukhwama mu kholo eya Benjamini, khuba omwami wabwe, khu miiko kamakhumi kane.

²² Ne amalile khumurusiao, Wele akhola Daudi khuba Omwami wabwe. Kano niko Wele alomaloma khuloondekhana ne Daudi ali, ‘Nanyoolile Daudi okhwa Chesi, ali omundu osiimisia kumwoyo kwase, omundu okana khu khola koosi niko nenya ndi akhole.’

²³Khubirira mu lisaaye lia Daudi, niye Wele akhola khuba Omuonia owe babaandu ba Isiraeli, nga aba ne alaka.

²⁴ Yesu ne akharakikha kimilimo kiewe tawe, Yoana elwachila babaandu ba Isiraeli boosi ali, bekanile bubwoni bwabwe nio babatiisibwe.

²⁵ Nga Yoana aaba ne alikho amaliilisia kimilimo kiewe aboolela babaandu ali, ‘Mwibaasia muli ese naanu niye? Ese sendi niye mulindiililanga oyo tawe. Ne kakhali rekeeresia! Alikho echa enyuma wase, ne ese se nolaana khukaangulula biraaro biewe tawe.’

²⁶“Bawandaayase, ba Isiraeli, be lisaaye lia Aburahamu ne nanywe Be Chikholo mweesi musaayanga Wele, Efwe nifwe khukhwarumirwa burume bwe buonia buno!

²⁷Sikila babaandu bamenyile mu Yerusalemu ne babemeelesi babwe se bamanya bali ali Omuonia tawe, namwe se bamanyilisia kamakhuwa ke bang'oosi ka kasomwanga buli Esabato tawe. Khwako baakhola kamakhuwa ke bang'oosi kechusibwa nga ne bakhalakila Yesu.

²⁸ Ne kakhaba kario se banyoola sifuno sie khumukhalakila lifwa tawe, babolela Pilato khumukhalakila lifwa.

²⁹ Ne nga ne bamala khukhola buli siindu nisio kamaandiko kaboola khu niye, bamwikhisia khu musalaba ne khumura mu ng'ani.

³⁰Ne kakhali Wele amwinyosia khukhwama mu lifwa,

³¹ chindaalo chingaali abonekhela nibo aakeendanga nabo khukhwama Kalilaya khucha Yerusalemu. Bano nibo baloli khu niye khu baandu ba Isiraeli.

³²Ne efwe khuliano khubareerera Elomo Endayi: nga Wele ne asuubisia bakuuka befwe ali alikhola.

³³ Luno amalile khukhukholela, efwe khuuli lisaaye liabwe, khulwe khulamusia Yesu khukhwama mu bafu. Nga kaandikwa mu sitabu sie chinyimbo sie khabili kali, ‘Ewe oli omwana wase omusoleeli; endaalo eya luno nabeele Raraao.’

³⁴ Ne kano niko Wele aloma nga ne amulamusia khukhwama mu lifwa, nio akhabolela mu siliindwa tawe. ‘Ndakhuelesia chikhabi chindakatifu lundi cha ng'ali nicho nasuubisia Daudi.’

³⁵ Khwako aloma lundi mu lunyilili luluundi ali, ‘Se olalekha omutakatifu wowo abolele mu siliindwa tawe.’

³⁶“Nono, Daudi mu siise siewe akhola niko Wele aafunaana, afwa. Aasiikhwa alala ne bakuuka bewe, mala kumubili kwewe kwabolela mu siliindwa.

³⁷Ne se keekholekha kario khuyo niye Wele alamusia khukhwama mu lifwa tawe.

³⁸Enywe mwesi, Baisiraeli basiaase, manya muli burume bwe khubeelwa bubwoni bwilwachibwa khwinywe khubirira mu Yesu.

³⁹Ne yesi yesi osuubila mu niye aaba omulekhuule khukhwama khu bwoni bwoosi nibwo Lilaka lia Musa likhanyala liamukhola aba omulekhuule tawe.

⁴⁰Nono lola bulayi, niko bang'oosi baloma kakhakhola kario kekholekha khwinywe tawe:

⁴¹ “Kaandikwa kali, ‘Lola, enywe be chilomo che khuuina! Khemurangararwe mala mufwe! Sikila nisio ndikho khola luno, sili sisiindu nisio mukhalisuubila tawe, omundu yesi yesi akhamwinooselia.’ ”

⁴²Nga Paulo ne Baranaba baaba ne barura mu sinakooki omwo, babaandu abo babenya bakobole lundi mu ndaalo eye sabato eloondakho, balomalome lukalikho khu biindu bienebio.

⁴³Enyuma we babaandu ne barurire mu khubuusiana okhwo, Bayaudi bakali nende Be Chikholo ba baaba ne bekaniile ne khuba be kumukaanda kwe ba Yuda, baloonda khu Paulo ne Baranaba. Nio barumwa abo baloma nabo ne khubachuuba bachiililile khumenya mu mwalaalo kwa Wele.

⁴⁴Esabato yaloondakho, embi buli mundu mu lukoba olwo echa khurekeeresia elomo yo Mwami.

⁴⁵Nga Bayaudi ne babona babaandu bakali abo sikhalikhali siabechulamo; baloba niko Paulo aba ne alomaloma lundi bamukhoma.

⁴⁶Kakhaba kario Paulo ne Baranaba balomalomela abuwaanga mu bunyindaafu bali, “Liaba lie bukhala bali elomo eya Wele ekhoyela khunyoa khulomalomwa khwinywe. Ne sikila mwakikaanile, mwilola muli se mwolaana khunyoola bulamu bwa mindali tawe, khulamulekha mala khuche mu Be Chikholo.

⁴⁷ Sikila lino lili lilaka nilio Omwami akhuelesia efwe nga aloma ali, ‘Nakhukholile ewe khuuba buwaanga khu Be Chikholo, nio sibala sioosi sionisibwe.’ ”

⁴⁸Nga Be Chikholo ne baulila kano, basangaala ne khufumia burume bwo Mwami, ne boosi babaroborwa khu bulamu bwa mindali basuubila.

⁴⁹Elomo eyo Mwami yasalaanila buli abuundu mu lukoongo olwo lwoosi.

⁵⁰Ne kakhali Bayaudi baachilisia bakhulu be mu lukoba ne bakhasi be liria mu Be Chikholo ba basaayanga Wele. Barakikha khunyaasia Paulo ne Baranaba babaona barure mu lukoongo lwabwe olwo.

⁵¹Nio Paulo ne Baranaba ba basisakulilakho lutamuusi lwe khu bikele biabwe nga sibwaabo, mala bacha Ikoni.

⁵²Basuubili mu Andioka baba ne liliekhoya likali lundi bechusibwa Roho Omutakatifu.