Read lubukusu Bikh. 14 Bible Online

Bikh. 14 - lubukusu bible

Bikh. 14

¹Ne bali Ikoni bengila boombi mu sinakooki eye Bayaudi, mala belwacha. Babaandu bakali Bayaudi ne Bakiriki alala basuubila.

²Ne Bayaudi bakhasuubila tawe, baachilisia Be Chikholo ne khubakhola babiile basuubili.

³Ne kakhali Paulo ne Baranaba bachiililila khumenyayo lukali ne balomaloma ne bunyindaafu ko Mwami. Omwami naye aandalasia burume bwabwe bwe kumwalaalo kwewe mu khubaelesia kamaani khukhola kamayia ne bikholwa bie liiukia.

⁴Babaandu be mu lukoba babukhana, balala baloonda Bayaudi ne babaandi barumwa.

⁵Enyuma wako Bakiriki balala ne Bayaudi, ne babemeelesi babwe, bakhalaka khu khupia siibi barumwa ne khubapa kamabaale.

⁶Nga barumwa ne bamanya kamene ako, belukhila mu ngoba cha Lisitura ne Teribe mu Likaonia ne chingoongo chiili siimbi ne nao.

⁷Ebweeneyo belwacha Elomo Endayi.

⁸Mu Lisitura abamo omundu omuleme owalemala khukhwama mu khusaalwa khwewe, aba sanyala khukeenda tawe.

⁹Omundu mwenoyo aba ekhaale arekeeresie nga Paulo ne elwacha. Paulo amuloleelela mala abona ali, ali ne lisuubila linyala liamuonia.

¹⁰Aloma ne kumumilo kwe aangaki ali, “Yinyokha wime!” Omundu oyo enyokha khangu, mala arakikha khukeenda.

¹¹Babaandu bakali abo nga ne babona niko Paulo akhola, barakikha khu khuupa luyoka mu lulomo lwabwe Lulikaonia bali, “Bawele becheele mu lukoondo lwe babaandu!”

¹²Batiuukha Baranaba bali Seusi, Paulo bali Herimesi sikila niye aaba omulomalomi Omukhulu.

¹³Mala omusaayi owa wele niye balaanga bali Seusi, niye lukaangu lwewe lwaba enje we lukoba, areera chiuunwa ne bimuli esilibwa, sikila niye ne babaandu abo benya khurusia embosio khu barumwa.

¹⁴Baranaba ne Paulo nga ne baulila niko babaandu benya khukhola, batabulaka chingubo chabwe mala batimaka bacha akari we babaandu abo ne khuyokela bali,

¹⁵ “Balebe, sikila siina ne mulikho mukhola kamakhuwa kano? Efwe khuli babaandu busa bulayi bwene nga enywe! Khuli ano khumureerera Elomo Endayi, khumuboolela enywe murure khu biindu bikhamuyeeta tawe, muche khu Wele omenyile mindali owabuumba likulu, sibala, enyanja nende bioosi bilimo.

¹⁶Khaale Wele alekha babaandu boosi bakhole nga ne benya.

¹⁷Kakhaba kario, buli lwoosi Wele aananga buloli bubwekesia buli aliio, khubirira mu biindu bilayi nibio akholanga. Amureereranga efula khukhwama mungaaki ne khumuelesia bibiaalwa mu siise silayi. Lundi amuelesianga biakhulia ne busangaafu mu miooyo kienywe.”

¹⁸Ne akhaba ne baloma bario, bwaba bulume khu khiingilila babaandu abo balekhe khubarusilia embosio.

¹⁹Nio Bayaudi balala becha khukhwama e Andioka mu Pisitia ne Ikoni, bafukiilisiana ne babaandu abo, baapa Paulo kamabaale, bakela bali afwiile nio bamukhuruura bamurusia enje we lukoba.

²⁰Ne nga basuubili ne babuusiana bamubotookhelela niio aaba, enyokha mala akobola mu lukoba. Endaalo yaloondakho niye ne Baranaba bacha e Teribe.

²¹Paulo ne Baranaba belwacha Elomo Endayi mu Teribe banyoola babeeka bakali. Nio bakobola e Lisitura ne Ikoni, lundi boola e Andioka mu Pisitia.

²²Batinyilisia basuubili ne khubachuuba bachiililile mu lisuubila. Bababoolela bali, “Khukhwola khubirire mu butinyu bukali nio khwingile mu bwami bwa Wele.”

²³Buli mu kanisa barobora babemeelesi, ne khubirira mu lisaba ne khukhweyima khulia, babara ebweeni wo Mwami, niye basuubila.

²⁴Nga ne bamala bario, babirira mu ngoongo cha Pisitia, boola e Pamufilia.

²⁵Nga bamala khukhwilwacha elomo mu Perika ne mala bacha Atalia,

²⁶ne khukhwama ebweeneyo bakobolela mu liaro e Andioka, abuundu yaba niio babara aasi we kumwalaalo kwa Wele khulwe kimilimo nikio yaba batabusiisie.

²⁷Nga ne boola e Andioka, babuusia alala babaandu be kanisa ne khubaboolela koosi niko Wele aaba ne abarumikhiire khukhola, lundi nga aaba ne ekuule engila khu Be Chikholo khusuubila.

²⁸Nio bamenyayo siise sileeyi ne basuubili.