Read lubukusu Bikh. 15 Bible Online

Bikh. 15 - lubukusu bible

Bikh. 15

¹ Babaandu balala bama e Buyuda becha e Andioka mala barakikha khukhwekisia basuubili bali, “Semunyala khuonisibwa ne mukhakhebiilwe nga Lilaka lia Musa ne liboola tawe.”

²Paulo ne Baranaba bayingana nabo lukali khu likhuwa lino, nio liakhalakwa bali Paulo ne Baranaba alala ne babaandikho khube mu sibala sia Andioka, bache Yerusalemu babonane ne barumwa ne babemeelesi khu likhuwa lino.

³Barumwa ne kanisa, ne nga baba ne bacha babirira Foenike ne Samaria, ne baboola nga Be Chikholo ne balakobolelanga Wele. Kamakhuwa mene ako kareera busangaafu bukali khu basuubili.

⁴Nga ne boola mu Yerusalemu, bakaanilwa ne kanisa, barumwa, ne babemeelesi. Nio bababoolela koosi niko Wele aaba ne akholile khubirira mu nibo.

⁵Nio balala khu basuubili ba baaba be mumukaanda kwe Bafarisayo benyokha baloma bali, “Be Chikholo khukhwola bakhwebwe, lundi baboolelwe khuria Lilaka lia Musa.”

⁶Barumwa ne babemeelesi be kanisa bekhala alala khukhwinoosia lireeba liene elio.

⁷ Enyuma we khuloleelela mwikhuwa elio khu siise sileeyi, Petero enyokha aloma ali, “Bawandaayase, mumanyile muli Wele andobora khaale khukhwama mwinywe nilwache burume bwe Elomo Endayi khu Be Chikholo, nio baulile ne khusuubila.

⁸ Ne Wele, omanyile kamebaasio ka buli mundu ekesia abuwaanga ali afukiliile be Chikholo khulwe khubaelesia Roho Omutakatifu bulayi bwene nga ne akhuelesia efwe fwesi.

⁹Se atomboola akari wefwe ne nabo tawe. Ababeela bubwoni bwabwe sikila basuubila.

¹⁰Khwako, siina sikila enywe luno ne mwenya khukhaka Wele nga ne mularechanga busiro khu mikoongo kie basuubili khaba nibwo akhaba efwe fwabeene namwe bakuuka befwe baakhanyala khusuta tawe?

¹¹Efwe khusuubila khuli khubirira mu mwalaalo kwo Mwami Yesu, efwe khulaonisibwa bulayi bwene nga nibo.”

¹²Babaandu boosi basila ne khurekeeresia Baranaba ne Paulo, nga baboola kamayia nende bie khuukia nibio Wele aaba ne akholile mu Be Chikholo khubirira mu nibo.

¹³Nga bamala khulomaloma, Yakobo asuta kumumilo kwewe aloma ali, “Bawandaayase, ndekeeresie!

¹⁴Simoni ama khukhwinoosia nga Wele mu khunyoa ne echa mu Be Chikholo khubukulamo babaandu khulwe lisina liewe.

¹⁵Chilomo che bang'oosi chifukiilisiana elala ne nakano, niio liiandiko liloma lili,

¹⁶ “Omwami aloma ali, ‘Enyuma we kamakhuwa kano ndakobola, ndakobosiao bubwami bwa Daudi. Niio bwatechukha ndabwombakha lundi, mala mbukhole bube bwe kamaani lundi.

¹⁷Nio babaandu baramire Be Chikholo boosi nibo nalaanga khuuba babaase samwene, balecha niio ndi.

¹⁸Omwami owakhola kano kamanyikhana khaale aloma ario.’ ”

¹⁹Yakobo achiililila khuloma ali, “Ese ndola ndi, se khukhoyeele khwanaania Be Chikholo balakobolelanga Wele tawe.

²⁰ Ne kakhali, khukhoyeele khubaandikile ebarwa khubaboolela balekhe khulia siakhulia siosi siosi siili sie kumusaango, siaanilwe nga siianwa khu bifwaani, be bebee bukhobani, lundi bakhalia enyama yosi yosi, niyo bakokile, namwe khulia ne khunywa kamalasile tawe.

²¹Sikila Lilaka lia Musa liasomilwe khu siise sileeyi mu masinakooki buli endaalo eye Sabato, ne kamakhuwa kewe kelwachibwanga mu buli lukoba.”

²²Nio barumwa, ne babemeelesi alala ne kanisa yoosi bakhalaka khurobora babaandu balala khukhwama mu sipupu esio bache e Andioka alala ne Paulo ne Baranaba. Barobora babaandu babili nibo basuubili baria lukali, Yuda owalaangwa Barisaba ne Sila.

²³Ba baruma ne ebarwa yino: “Efwe, barumwa ne babemeelesi be kanisa, khuli bawandaayenywe, khuruma kimileembe khu bawandaayefwe boosi ba basaalwa mu Chikholo ba bamenya e Andioka, Siria ne Silisia.

²⁴Khwaulile bali babaandu babaandi ba barura mwifwe, bamunaanisie ne khumwonaka kimiooyo kienywe sikila niko baloma, ne efwe se khwabalakakho balome likhuwa liosi liosi tawe.

²⁵Khwako, khwekhaale alala mala fwesi khwafukiilisiana khurobora barumwa, khubarume khwinywe. Balecha ne basaale befwe bakoosi Baranaba ne Paulo,

²⁶babeana bulamu bwabwe khukholela Omwami Yesu Kristo.

²⁷Nono, khulikho khuruma Yuda ne Sila; kane babenabo bamuboolele ne kumunwa niko khuandiike kano.

²⁸Lialolekhaane lilayi khu Roho Omutakatifu ne nafwe, khukhamutiuukha enywe busiro bukali tawe, ne kakhali kamalaka kali ne bukhala niko kano;

²⁹Mukhalia biakhulia bie kimisaango nibio baosiisie khu bifwaani, namwe kamalasile, namwe enyama eye sisiaayo sikokiilwe tawe. Mwiyaye mukhaba be sifwaabi tawe. Mulaba bulayi mwaba ne mweliinda khu makhuwa kano. Muliindwe.”

³⁰Basibula barumwa chana abo bacha e Andioka, ebweeneyo balaanga basuubili alala mala babaelesia ebarwa eyo.

³¹Nga ne basoma ebarwa eyo, kamakhuwa kakabaamo, kabasangaasia ne khubachuuba.

³²Yuda ne Sila ba baaba bang'oosi, bakachula ne balebe abo khu siise sileeyi ne ba bachuuba ne khubaramo kamaani.

³³Enyuma we khubayo khulwe siise, basuubili ba basibula mu muleembe bakobola niyo ba baabaruma baba. [

³⁴Ne kakhali Sila akhalaka khuramayo.][2]

³⁵Paulo ne Baranaba barama e Andioka khulwe siise, baambaana ne babaandi ne bekisia ne khukhwilwacha Elomo Endayi eyo Mwami.

³⁶Nga chindaalo ngekhe chabira, Paulo aboolela Baranaba ali, “Khukoboleyo khulambuule bawandaayefwe mu buli lukoba nimwo khwelwacha elomo eyo Mwami, khubone nga ne balikho bachiililila.”

³⁷Baranaba enya bache ne Yoana Mariko yesi.

³⁸ Ne kakhali Paulo se enya bache ne Mariko tawe, sikila aabalekha e Pamufilia, aloba khuchiililila nabo mumilimo kiabwe.

³⁹Kamayiingamo kamarafu kabao, mala baukhana. Baranaba abukula Mariko, baniina emeeli bambukha Saipurasi.

⁴⁰Ne Paulo arobora Sila mala bacha, enyuma we basuubili khubara mu buliindi bwe kumwalaalo kwo Mwami.

⁴¹Nio Paulo abirira mu Siria ne Silisia ne atinyilisia chikanisa.