Read lubukusu Bikh. 16 Bible Online

Bikh. 16 - lubukusu bible

Bikh. 16

¹Paulo achiililila ola e Teribe ne Lisitura, niio omukristo niye balanga bali Timoteo amenya. Maawe aaba omuyaudi mala yesi aaba omukristo, ne raraawe aaba Omukiriki.

²Basuubili boosi mu Lisitura ne mu Ikoni balomaloma bulayi bwa Timoteo.

³Paulo enya khubukula Timoteo ache ne naye, khwako amukheba. Akhola ario sikila Bayaudi boosi ba bamenya mu sibala esio bamanya bali raraawe owa Timoteo aba Omukiriki.

⁴Nga ne baba ne babira mu ngoba echo, baelesia basuubili kamalaka niko barumwa ne babemeelesi be kanisa mu Yerusalemu babisia, ne khubaboolela bakarie.

⁵Nio chikanisa chatinyilisibwa mu lisuubila ne khukucha buli endaalo.

⁶Babirira mu ngoongo cha Firikia ne Kalatia, sikila Roho Omutakatifu se abafukiilila khukhwilwacha mu lukoongo lwa Esia tawe.

⁷Nga ne boola khulwakha lwa Misia, bakhaka khukhwingila mu sibala sia Bisinia, ne kakhali Roho owa Yesu se abafukiilila tawe.

⁸Khwako, babirira mu Misia, bachiililila boola e Turoa.

⁹Oli musilo Paulo aba ne kamalola, abona omundu mulala owa Masedonia emile alikho amuboolela ali, “Yambukha wiche e Masedonia okhuyeete!”

¹⁰Nga Paulo amala khubona kamalola kano, khwerekekha khucha Masedonia, sikila khwamanya khuli Wele akhulangile khucha khukhwilwacha Elomo Endayi khu baandu abo.

¹¹Khukhwama Turoa, khwambukhila mu meeli khwola e Samotirake, oli bwasia lundi khwola e Neapoli.

¹²Khukhwama ao, khwacha khwola mu sibala sia Filipi, lukoba luboofu mu lukoongo lwa Masedonia mala luli mu bwami bwe Barumi. Khwamenya mu lukoba olwo chindaalo ndiiti chiri.

¹³Endaalo eye Sabato khwarura enje we lukoba, khwacha aluuchi niio khwebaasia khuli manya Bayaudi basabilangao. Khwekhala aasi khwalomaloma khu bakhasi ba baaba ne bebuusiisieyo.

¹⁴Khu bakhasi ba bakhurekeeresia ne khulomaloma, abakho mulala owaria Wele, lisina liewe bali Litia, amenyanga mu lukoba lwa Siatira. Aakusianga chingubo chifwaana buseemwa. Omwami ekula kumwoyo kwewe aulila kamakhuwa niko Paulo alomanga.

¹⁵Niye ne be nju bewe ne bamalile khubatiisibwa, akhulaanga ewewe ne aloma ali, “Mwaaba ng'ali ne muboone muli ese nasuubiile Omwami, yiicha mwikhale munju mwase.” Khwako akhwikoonjelela khuche naye.

¹⁶Endaalo ndala, yaba khulikho khucha abuundu e khuusaba, khwakaanana omukhaana mulala nasioobi owaba ne kumusaambwa kwe bulakusi. Omukhaana yuno mu bulakusi bwewe areereranga bakhoongo bewe chirupia chingali.

¹⁷Omukhaana yuno aloonda khu Paulo ne nafwe, ne akukuula ali, “Babaandu bano bali bakholi ba Wele owe Angaaki Lukali, balikho bamuboolela engila eye buonia.”

¹⁸Achiililila khukhola ario khu ndaalo chingali. Ekhumaliilikha Paulo abiililwa mala amurafwira, ne khuboolela sisieeno esio ali, “Mu lisina lia Yesu Kristo, khurafwira omururemo!” Ao ne nao sisieeno siarura mu mukhana oyo.

¹⁹Bakhoongo bo mukhaana oyo nga ne babona bali lilieyikina liabwe lie khunyoola kimiaandu liawele, baamba Paulo ne Sila, ba bakhurura babaila khu soko ebweeni we babemeelesi.

²⁰Babareera ebwami we Barumi baloma bali, “Babaandu bano Bayaudi nibo ne kakhali balakoyanianga lukoba lwefwe.

²¹Bekisia kimiima kikhafukiilisania ne lilaka liefwe nga Baruumi tawe, lundi efwe se khukhoyela khukikhola tawe.”

²²Babaandu baambaana nabo, baapa Paulo ne Sila. Bakhalaki babafula chingubo ne kamaani mala baboula kimikhomwa.

²³Oli bamala khuboula babekaliilila mu siboe, mala banamae be mu siboe baboolelwa khubaliinda lukali.

²⁴Khuloondekhana ne kamalaka niko omunamae oyo aebwa, abara munju eye mukari lukali eye baboe ne khubaboa bikele khu bisiindi bisiro.

²⁵Oli embi mu silo akari, Paulo ne Sila baba ne basaba ne khukhwimba kimienya kifumia Wele, baboe babaandi baba barekeeresie.

²⁶Siise esio, sibala siarakikha khuterema lukali, enju eye baboe yaterema. Ao ne nao kimiliango kioosi kiekukha, ne kiminyololo kikiaboa buli mundu kiakangulukha.

²⁷Omunamae oliindanga baboe enyokha abona ali kimiliango kie siboe kiekuukhe, ebaasia ali fwaana baboe boosi belukhe, nio arusia embalu yewe mala enya khukhweyira.

²⁸Nio Paulo alaanga ne kumumilo kwe angaaki ali, “Okheyira tawe, efwe fweesi khuli muno.”

²⁹Omunamae oyo alaanga bareere etaa, mala atima eengila mukari, akwa mu bikele bia Paulo ne Sila nareenga.

³⁰Nio abarusia enje abareeba ali, “Khola ndiena nio mbonisibwe?”

³¹Bamukobosia bali, “Khosuubile mu Mwami Yesu mala olaonisibwa alala ne be nju yowo boosi.”

³²Nio bamwilwachila elomo eyo Mwami, niye ne be nju yewe boosi.

³³Omunamae chana oyo ababukula mu saa eyo abasiinga kamakoonjo kabwe, ne abwene ne abwene, niye omwene nende be nju yewe boosi baabatiisibwa.

³⁴Nio abukula Paulo ne Sila abaila ewewe, abaelesia siakhulia. Niye ne be nju yewe boosi bakhola naikara bekhoya sikila siise sino abele basuubile Wele.

³⁵Nga ne bwasia, Barumi be bunyali baruma banamae babwe khu muliindi we siboe oyo bali, “Lekhuula babaandu abo bache.”

³⁶Nio omunamae wenju eye baboe aboolela Paulo ali, “Bakhulu barumire lilaka bali ewe ne Sila mulekhuulwe. Luno munyala mwarura mala mwacha engo mu muleembe.”

³⁷Ne kakhali Paulo aboolela bakhulu be banamae ali, “Efwe khuli Baruumi, mala baakhuupile bariena ebweeni we babaandu ne khukhura mu siboe ne bakhakhuyaalile tawe? Luno bebaasia bali banyala bakhuulekhuula mu bwikisi! Se kali kario tawe. Babeene khukhwola beche ano bakhuulekhule.”

³⁸Nio banamae bacha baboolela bakhulu be Barumi koosi, ne nga baulila bali Paulo ne Sila bali be mu bwami bwe Baruumi, baaba ne buuri.

³⁹Kakila bacha ba basaba sibelwa, mala babarusia mu siboe ne khubekoonjelela barure mu lukoba olwo.

⁴⁰Paulo ne Sila bacha munju eya Litia. Mu mwenemwo bakaananilamo ne basuubili, bababoolela kamakhuwa ke khubachuuba mala nibo bacha.