Read lubukusu Bikh. 17 Bible Online

Bikh. 17 - lubukusu bible

Bikh. 17

¹Paulo ne Sila babirira Amufipoli ne Apolonia, boola e Tesalonike niio esinakooki eye Bayaudi yaba.

²Khuloondekhana ne kumwiima kwa Paulo kwa busiele, acha mu sinakooki. Ebweeneyo mu chisabato che kamachuuma kataru, ayingananga ne babaandu khu maandiko kamatakatifu,

³ababoolela ne khubekisia nga abeele khukhwola Kristo anyaasibwe ne khulamukha khukhwama mu lifwa. Paulo ababolela ali, “Yesu niye ndikho muboolela, yuno niye Masiiya.”

⁴Babaandu balala bafukiilila ka Paulo mala bacha ne Paulo ne Sila; akhaba bakhasi babemeelesi bosi bakhola bario ne Bakiriki bakali babesaaya Wele.

⁵Ne kakhali Bayaudi balala bakhasuubila tawe bakhendekha mala babuusia babaandu bamayaanu be mu soko mu chingila, batubaana alala baba sipupu, mala benya khurakikha sisiayuumba mu sirekere. Babotookhelela lukoba lwa Chasoni ne bayiima Paulo ne Sila, nio ba bareere ebweeni we babaandu boosi babuusanie.

⁶Ne nga ne bakhabanyoola tawe, bakhuruura Chasoni ne basuubili babaandi khukhwola khu bakhulu be lukoba, ne beyasa bali, “Babaandu bano bakaluukhaasie sibala sioosi buli abuundu, ne luno bali mu lukoba lwefwe luno,

⁷ne Chasoni abengisie munju yewe. Boosi balafunakaanga lilaka lio mwami, ne baloma bali aliio omwami okundi niye balanga bali Yesu.”

⁸Nio babaandu ne babemeelesi be lukoba nga baulila kano baambwa lirima.

⁹Bakhulu baruungia Chasoni ne babasie chirupia nio balekhuulwa.

¹⁰Oli mu silo, basuubili babukula Paulo ne Sila ba bayila e Berea. Nga boolayo bacha mu sinakooki.

¹¹Babaandu be bweeneyo baba barekerefu khukhila be Tesalonike. Barekeeresia burume obwo ne silukuluku sikali, ne bemenieelesia kamaandiko kamatakatifu buli endaalo, nio bamanyilisie kaaba bali niko Paulo ne Sila balomanga kaba kang'ali.

¹²Bakali khu nibo basuubila, ne bakhasi Bakiriki be liria ne babaandu boosi basuubila.

¹³Ne nga Bayaudi ba Tesalonike ne baulila bali Paulo elwachile elomo eya Wele mu Berea mwosi, bechayo, barakikha sisiayuumba ne khuachilisia babaandu.

¹⁴Mu khangu busa basuubili abo, bayila Paulo acha sia nyanja; ne Sila ne Timoteo barama mu Berea.

¹⁵Babaandu babayila Paulo bacha naye khukhwola Ateni, mala bakobola ne lilakiilisia khukhwama khu Paulo bali, Sila ne Timoteo bamuloondekho khangu nga ne banyala.

¹⁶Nga Paulo aaba nasilindiilila Sila ne Timoteo mu Ateni abiililwa lukali nga abona bifwaani bikali mu lukoba olwo.

¹⁷Nio mu sinakooki ayingana ne Bayaudi ne babaandu Be Chikholo ba basaayanga Wele, ne buli ndaalo khu soko aayingananga ne babaandu babechanga embi naye.

¹⁸Balala khu bekisia be Epikuro ne Basitoiki bayingana naye. Babaandi khu nibo bareeba bali, omusilu owibonia yuno alakhakanga khukhuboolela efwe siina? Balala bakobosia bali, “Kalolekhana olalomalomanga ke ba wele bakeni.” Baloma bario sikila Paulo aba alikho elwacha ka Yesu ne ke lilamukha.

¹⁹Khwako babukula Paulo, bamuila ebweeni we kumuse kwe lukoba bali Areopako, baloma bali, “Khwenya khumanye liliekisia liya nilio olikho olomakho lino.

²⁰Bibiindu bilala nibio khuulile ne kamaru kefwe, bilolekha khuba bikeni busa khwifwe, nono khwenya khumanye bifuno biabio bili siina.”

²¹(Sikila babaandu boosi mu Ateni ne bakeni boosi bamenyilemo barumikhiranga biise biabwe khulomaloma ne khuulila kamakeni.)

²²Paulo eema ebweeni we kumuse kwe lukoba mala aloma ali, “Naboone ndi enywe babaandu mu menyile mu Ateni muli babaandu be dini mu ngila choosi.

²³Sikila nga nakeendile mu lukoba lwenywe luno ne khubona abuundu niio musaayilanga, nanyoolile alutare niyo baandikakho bali, ‘Khu Wele okhamanyikhaane oyo.’ Khwako Wele niye musaayanga ne mukhamumanyile oyo, omwene oyo, ali niye ese luno ndikho mwilwachila.

²⁴ Wele, owabuumba sibala ne bilimo bioosi, ali Omwami owe likulu ne liloba, ne se amenyanga mu ngaangu chichombakhwa ne babaandu tawe.

²⁵Namwe se enya sisiindu siosi siosi nisio khunyala khwaana khulwe khumurumikhira tawe, sikila ali omwene oanaanga bulamu, kumuya nende buli siindu khu buli mundu.

²⁶Khukhwama khu mundu mulala, abuumba Chikholo che babaandu choosi achikhola khumenya buli abuundu mu sibala sioosi. Omwene anyoa akhalaka khale siise ne chinjakha cha buli abuundu niio bakhoyela khumenya.

²⁷Akhola ario, nio bamuyiime, wakana bamunyoola. Ne kakhaba kario, Wele se ali aleeyi khu buli mulala khwifwe tawe.

²⁸Nga omundu mulala aloma ali, ‘Mu niye efwe khumenya, lundi khukeenda lundi khubaao!’ Kali nga balala mu mienya kienywe baaloma bali, ‘Akhaba efwe fwesi khuli babaana bewe.’

²⁹Ne nga khuli babaana ba Wele, se khukhoyeele khwebaasia khuli, liba liewe lili busa nga esahabu namwe efwesa namwe libaale liliabeechwa ne busicha bwo mundu tawe.

³⁰Mu siise nisio babaandu babeela basilu, Wele ekhola nga okhabona tawe. Ne luno, alaka babaandu boosi buli abuundu bekanile.

³¹Sikila amala khurao endaalo niyo alikhalalilamo sibala sioosi, mu buluungi mu ngila eyo mundu mulala niye arobora, Wele ekesia babaandu nga alamusia omundu chana oyo khukhwama mu lifwa!”

³²Nga ne baulila Paulo nalomaloma ke khulamukha khukhwama mu lifwa, balala bamuchekha ne babaandi baloma bali, “Khwenya khuulile lundi kamakhuwa menako.”

³³Nio Paulo arura mu libuusiana acha.

³⁴Baandu balala baambana naye mala basuubila. Balala khu beene abo aaba Tonisio mulala khube kumuse, ne omukhasi yesi abakho lisina liewe bali Tamara, ne babaandu babaandi.