Read lubukusu Bikh. 19 Bible Online

Bikh. 19 - lubukusu bible

Bikh. 19

¹Apolo ne asiili mu Korinjo, Paulo aakeenda mu ngoongo ng'ene echo mala ola mu Efeso, mu bwenomwo aanyoolamo babeeka,

²nio abareeba ali, “Nga ne mwasuubila mwanyoola Roho Omutakatifu?” Bamukobosia bali, “Khaba khukhaulilakho sisiindu bali Roho Omutakatifu siliio tawe”

³Paulo areeba ali, “Kaba kario, aba libatiisia lia lukano siina nilio enywe mwanyoola?” Bamukobosia bali, “Libatiisia lia Yoana.”

⁴ Paulo aloma ali, “Libatiisia lia Yoana liaba khwaabo babekanila bubwoni bwabwe, ne khuboolela babaandu ba Isiraeli khusuubila mu oyo olikho owiicha enyuma wewe, niye Yesu.”

⁵Nga ne baulila kano, babatiisibwa mu lisina lio Mwami Yesu.

⁶Paulo abarakho kamakhono kewe, ne Roho Omutakatifu abekhakho; balomaloma mu nimi chimbia ne khung'oola.

⁷Boosi baaba embi babaandu ekhumi na babili.

⁸Paulo aacha mu sinakooki, mala khulwe kimieesi kitaru alomalomanga ne babaandu bunyindaafu. Ayinganaanga nabo ne khubasaaya khulwe bubwami bwa Wele.

⁹Ne kakhali balala baba ne sileka, baloba khusuubila, barakikha abuwaanga khuloma kamabi khuloondekhana ne Ngila yo Mwami. Kakila Paulo abalekha abukula basuubili bewe aacha nabo ne abeyikia buli ndaalo munju eye khukhwikisia eya Turanu.

¹⁰Achiililila khukhola ario khu siise sie kimiiko kibili, nabwila babaandu boosi ba baamenya mu lukoongo lwa Esia, Bayaudi ne Bakiriki baulila elomo eyo Mwami.

¹¹Wele aakhola kamaya kakhasala tawe khubirira mu Paulo.

¹²Babaandu babukulanga bitambaa bie mukhono ne chingubo cha Paulo, ne bachiyilila balwale mala bulwaale bwabwe buwa. Ne akhaba ba baaba ne bisieeno biabaruramo.

¹³Bayaudi balala ba bakeendanaanga busa eyi ne neyi ne barusia bisieeno, boosi bakhaka khurumikhira lisina lio Mwami Yesu khurusia bisieeno. Ne baboolela bisieeno bali, “Khumurafwira mu lisina lia Yesu, niye Paulo elwachanga.”

¹⁴Babao basoleeli saba bo Omusaayi Omukhulu Lukali owe Bayaudi, owalaangwa bali Sikeba bakholanga bario.

¹⁵Ne kakhali sisieeno siababoolela sili, “Ese manyile Yesu, lundi Paulo yesi mumanyile, ne enywe naanu?”

¹⁶Nio omundu owabamo sisieeno oyo, abachunukhila ne kamaani kamakali mala abakhila boosi. Bekhupa enje ne chimbala ne chingubo chabwe chatabulwake.

¹⁷Bayaudi ne Bakiriki boosi ba baamenya Efeso baulila kano koosi, baambwa buuri, ne lisina lio Mwami Yesu liaebwa efuma engali.

¹⁸Basuubili bakali beecha, ne beyama abuwaanga koosi niko bakholaanga.

¹⁹Bakali ba bakholanga bufumu, babuusia bitabu biabwe alala, mala babiosela ebweeni we babaandu boosi. Bakhola esaabu eye bukusi bwe bitabu ebio bwoola chirupia chielefu khamusini.

²⁰Mu ngila eye kamaani yino, elomo eyo Mwami yachiililila khusalanila ne khuba ne kamaani kamakali.

²¹Enyuma we kamakhuwa ako, Paulo akhalaka mu Roho khucha Yerusalemu khubirira Masedonia ne Akaya. Aaloma ali, “Enyuma we khukhwola Yerusalemu lilamiina nole akhaba e Rumi yosi.”

²²Nio aruma babili khu bayeeti bewe, Timoteo ne Rasito, bacha Masedonia ne naye arama Esia khu siise sitiiti.

²³Siaba siise sino nisio sisiayuumba sibi siabela mu Efeso sikila Engila eyo Mwami.

²⁴Abamo omubasi owe bibia lisina liewe Demetirio, owabasanga bifwaani bie lukaangu lwa wele owe siikhasi niye balanga bali Aritemi. Bubasi obwo bwareereranga Demetirio ne baabasi basie bukhala bukali.

²⁵Nio Demetirio abuusia baabasi basie abo boosi ne babaandi be kimilimo nga kimiene ekio, mala ababoolela ali, “Baandu enywe, mumanyile muli buiinda bwefwe bwamanga mu milimo kino.

²⁶Nono, mwabeene munyala khubona ne khuulila niko omundu Paulo yuno alakholanga. Alaboolanga ali ba wele babakholwa no mundu babenabo se bali bawele tawe, mala aakaluukhasie babaandu mu Efeso muno ne embi mu ngoongo cha Esia choosi.

²⁷Nono khuli ne busiku, kumulimo kwefwe kulaba ne lisina libi. Se kali ako kong'ene tawe, aba lundi lukaangu lwa wele omukhasi omukali Aritemi se lulaba ne sifuno tawe, ne bulayi bwewe bulonakwa mala niye ali wele niye buli mundu asaayanga mu Esia mwoosi, ne mu sibala sioosi.”

²⁸Nga babaandu bakali abo ne baulila kamakhuwa kano, lirima liabakhaya, baapa luyoka bali, “Aritemi owa Efeso ali Omukali!”

²⁹Luyoka lwechula mu lukoba lwoosi. Nio bafwakhila Kayo ne Arisitakaasi ne Bamasedonia babili ba bakeendanga ne Paulo, baabakhuruura ba bareera munju eye kiminyawe.

³⁰Paulo omwene enya khucha ebweeni we babaandu abo, ne kakhali basuubili bamukhaya.

³¹Bakhulu babaandi ba Esia, ba baaba basaale bewe, barumira Paulo likhuwa ne bamukaania bali akhacha ebaandu abo munju eye kiminyawe tawe.

³²Siise siene esio likoyana liabao, buli mundu aapa luyoka; balala baloma kano babaandi kakaandi, ne babaandi khaba khumanya sikilile ne babusania alala tawe.

³³Balala khu baandu abo bebaasia bali Alekisanda niye owaba mwene makhuwa ako, sikila Bayaudi bamukhola niye acha ebweeni. Ne Alekisanda ne kumukhono kwewe abasisia khu khwenya bamurekeeresie, mala akhaka khulomaloma ne khukhwikaana.

³⁴Ne nga bamanya bali aaba Omuyaudi, boosi baapila alala luyoka lwe kamakhuwa kamafwaanane khulwe chisa chibili; bali, “Aritemi owa Efeso ali Omukali”

³⁵Ekhumaliilikha omuandiki omukhulu mu lukoba, asisia babaandu, ababoolela ali, “Baandu base ba Efeso, buli mundu amanyile ali lukoba lwa Efeso luno luli luliinda lukaangu lwa Aritemi ne libaale litakatifu liliakwa khukhwama mwikulu.

³⁶Se aliio onyala khuyingana kamakhuwa kano tawe. Nono khwako, khukhwola mulekhe sisiayuumba, mukhakhola sisiindu siosi siosi mu khuyuyukhana tawe.

³⁷Mwareerire babaandu bano ano ne se bakhunuulile bie mu lukaangu namwe khuloma bibiindu biibi khu bawele befwe tawe.

³⁸Demetirio ne bakholi bewe ne bali ne kamasitako khu mundu yesi yesi, khuli ne baruki lundi khuli ne chindaalo che chikesi, khwako kamasitako kanyala kakholebwa ebweeneyo.

³⁹Ne mwaba ne mwenya sisiindu sisiindi sikhilakho ao, aba kane sikololosibwe mu siikhasio siifukiililwa sie babaandu boosi.

⁴⁰Sikila khunyala khwasitakwa khu siayumba khulwe kakekholeekhe endaalo eya luno. Se khuli nga khubeelwa khu luyoka luno tawe, ne lundi se khuli ne sifuno silayi khu siayuumba sino tawe.”

⁴¹Enyuma we khuloma kano, aabolela babaandu baloote.