Read lubukusu Bikh. 20 Bible Online

Bikh. 20 - lubukusu bible

Bikh. 20

¹Sisiayuumba sie Efeso nga siawa, Paulo alaanga basuubili boosi becha alala, abatinyilisia mala niye acha Masedonia.

²Abirira mu ngoongo echo ne atinyilisia babaandu ne burume bukali. Nio ola Akaya,

³niyo amenyayo kimieesi kitaru. Nga aaba ne erekeekhe khucha Siria aamanya ali Bayaudi bamukwangwaanile; mala akhalaka khukobola Efeso ne abirira mu Masedonia.

⁴Sosipateri okhwa Pairasi owama Berea, aronga naye, akhaba Arisitakaasi ne Sekundo khukhwama Tesalonike, Kayo khukhwama Teribe, ne Timoteo, Tichikasi ne Turofimo khukhwama mu sibala sia Esia.

⁵Barangira ebweeni bakhuliindila efwe e Turoa.

⁶Enyuma wa Naikara eye kumukaati kukhalimo limela tawe, khwaniina mu liaaro e Filipi, ne enyuma we chindaalo chiraano khwola mu Turoa mala khwamenyamo lichuuma lilala.

⁷Khu ndaalo eye ebweeni eye lichuuma, khwebusia alala khunyoola siakhulia sie busangaanilo. Paulo aaba enyile khurekukha endaalo eloondakho, khwako achilila khukhwilwachila babaandu khukhwola mu silo akari.

⁸Chitaa chingali chaba chilikho chikhosia mukorofa nimwo khwaba ne khwakaananiile.

⁹Omusoleeli mulala owalaangwa bali Yutiko aaba ekhaale khwitirisia, Paulo nga aaba nachiililila khukhwilwacha, Yutiko arakikha khuungula kalaa kalaa nabwila liilo liamuyuula mala akona. Oli asili ario aanukha khukhwama khu korofa ekhola khataru mala akwa aasi, aba oli bamwinyosia banyoola afwiile khale.

¹⁰Ne kakhali Paulo ekha aasi mala enama amutilakho, amuoleelesia mala aloma ali, “Mukheendekhelela tawe, sikila asili omulamu!”

¹¹Nio Paulo aniina lundi mukorofa omwo, mala, amesula kumukaati ne khulia, mala achilila khukhwilwacha khu siise sileeyi nabwila bwasia ne arekukha.

¹²Babaandu bayila omusoleeli chana oyo engo nali omulamu busa, mala batinyilisibwa lukali.

¹³Efwe khwaniina mu meeli khwarangira khwacha Asosi niyo khwaba ne khucha khuelekesia Paulo nga aaba ne alaka, sikila se enya khurumikhira emeeli tawe, enya khukeenda busa.

¹⁴Nga akhunyoola efwe Asosi, khwamuniinia mu meeli, khwacha e Mitilene.

¹⁵Khwachila mumeeli oli busia khwola e Kiosi. Endaalo eya loondakho khwola Samosi, oli busia lundi khwola e Mileto.

¹⁶Paulo aaba akhalaake ali alachiililila ne lukeendo alekhe khubirira Efeso, nio akhatibia siise sikali mu Esia tawe. Ayuyanga ario, nio oole Yerusalemu ne kanyalikhana mu ndaalo emboofu eya Pendekositi.

¹⁷Paulo ne aaba e Mileto aarumania likhuwa khu bemeelesi be ekanisa eya Efeso bakaanaane naye.

¹⁸Nga becha ababoolela ali, “Enywe mumanyile nga ese namenyanga mwinywe siise sioosi khukhwama endaalo niyo nolela mu sibala sia Esia.

¹⁹Mumanyile nga narumikhira Omwami mu khwiboombia khwosi, ne kamasika kamakali. Nakhola kimilimo kiase nga omukholi owo Mwami mu sinyasio sisianjichakho sikila ekwangwaani eye Bayaudi.

²⁰Mumanyile muli nga nelwachanga burume ne khukhwikisia abuwaanga ne mu chingo chenywe, se nalekha khumuboolela sisiindu siosi siosi sinyala khuuba sie buyeeti khwinywe tawe.

²¹Khu Bayaudi nende Be Chikholo boosi, nabakaambila ndi bakhoya bekanile bubwoni bwabwe mala bakobolele Wele ne khusuubila mu Mwami wefwe Yesu.

²²Ne luno, mu khuria Roho Omutakatifu, ndikho nja e Yerusalemu, semanya kakane kanjekholekhekho ebweeneyo tawe.

²³Ne kakhali Roho Omutakatifu alasuubisianga ali siboe ne sibi bianindiliile mu buli lukoba.

²⁴ Ne seneyibaasilia bulamu bwase samwene khuba sisiindu khwise tawe; nisio nenya siong'ene sili khutabusia burume bwase ne khumala kimilimo kiase nikio Omwami Yesu ambelesia khukhola, ne nikio kino, khukhwilwacha Elomo Endayi eye kumwalaalo kwa Wele.

²⁵“Ese nakeendilenge ei neyi mwinywe mwesi ne nilwacha bubwami bwa Wele. Ne luno, namanyile ndi se aliio namulala khwinywe okhambonekho lundi tawe.

²⁶Khwako muboolela abuwaanga endaalo eya luno ndi: Aaba bali mulala khwinywe acha khutiba, kamafuki kewe se kalaba khwise tawe.

²⁷Sikila se nalekhakho khumubuulila enywe sifuno sia Wele sioosi tawe.

²⁸Nono khemweliinde mwabeene ne kamakheese niko Roho Omutakatifu aara mu makhono kenywe ali muliinde. Khemube babaayi be kanisa eya Wele, niyo omwene akhola khuba yewe, khubirira mu mafuki ko Mwana wewe.

²⁹Manyile ndi ne ngane ndureo, bisuuche birafu bilamwingilamo, ne se bilakholelakho siisa kamakheese tawe.

³⁰Siise siloola nisio babaandu balala bakharure mumukaanda kwenywe mwabeene mala balome bubeeyi ne khutiimia basuubili nio babaloondekho.

³¹Ba meso, mala mukhebulile muli, khu miiko kitaru, nekisia buli mulala khwinywe silo ne kumuusi ne ndila.

³²“Ne luno mubiikha mu buliindi bwa Wele ne mu burume bwe kumwalaalo kwewe, burume bunyala khumwombakha ne khumuelesia enywe chikhabi nicho Wele aabiikhila babaandu bewe boosi.

³³Se nekoombakho efwesa, namwe esahabu namwe engubo yo mundu yesi yesi tawe.

³⁴Enywe mwabeene mumanyile muli nakhola kimilimo ne kamakhono kase kano, nio nyoole buli siindu nisio ese ne babasiaase khwenya.

³⁵Namwekesia mu biindu bioosi ndi, mu khukhola kimilimo ne kamaani khuri, khukhwola khuyeetekho batekhele, ne khukhebulila kamakhuwa niko Omwami Yesu omwene aloma ali, ‘Chikhabi chingali chili mu khuaana khukhila mu khwakaanila.’ ”

³⁶Nga Paulo ne amala ario, asikama aasi nabo asaba.

³⁷Boosi baba balikho balila nga bamwekwayila ne bamukheesia kimileembe kie khulekhana.

³⁸Babiililwa lukali sikila aba alomile ali se bakhamubonekho lundi tawe. Nio bacha naye sia meeli.