Read lubukusu Bikh. 21 Bible Online

Bikh. 21 - lubukusu bible

Bikh. 21

¹Ne Khumalile khulekhana nabo ne khukhwingila mu meeli, emeeli yaluungikha busa khwola abuundu bali Kosi. Endaalo yaloondakho, khwola Rotesi mala khukhwama ao khwacha abuundu bali Patara.

²Ebweeneyo khwanyoolayo emeeli eyaba ne elikho echa Foenike, nio khwengilamo khwarekukha.

³Khwacha khwola abuundu niio khunyala khubona Saipurasi mala khwabirira siafubo wayo nabwila khwola Siria. Khwacha khu sikiingi e Tiro yaba niio emeeli echa khurusibwamo bisutwa.

⁴Ebweeneyo khwanyoolayo basuubili mala khwamenya nabo lichuuma. Khubirira mu Roho bakaania Paulo alekhe khucha e Yerusalemu.

⁵Ne siise siefwe ne nabo nga siawa, khwarekukha khwacha. Boosi alala ne bakhasi babwe ne babaana barura mu lukoba bakhuroongia khukhwola sia nyanja nio fwesi khwasikama khwasaba.

⁶Khwakheesiana kimileembe kie khulekhana mala efwe khwacha mumeeli ne nabo bakobola engo.

⁷Khwachiililila ne lukeendo lwefwe khukhwama e Tiro khwola e Tolemai niio khwakheesia basuubili mala khwekhala nabo endaalo ndala.

⁸ Endaalo yaloondakho khwarekukha khwola mu Kaesarea. Ebweeneyo khwamenya munju mwo mwilwachi Filipo, mulala khu baandu saba babaroborwa khuba nga bayeeti mu Yerusalemu.

⁹Aba ne babaana bewe bakhaana bane bakhacha munju tawe, baba ne siianwa sie bung'oosi.

¹⁰ Khwaba khwabeleyo chindaalo chingali kho, omung'oosi bali Akabasi ola khukhwama e Buyuda.

¹¹Echa niio khwaba, abukula kumusiipi kwa Paulo, eboa bikele ne kamakhono kewe, mala aloma ali, “Kano niko Roho Omutakatifu aloma, Omwene musiipi kuno alabowa mu ngila yino ne Bayaudi mu Yerusalemu, mala bamure mu bunyali bwe babaandu Be Chikholo.”

¹²Nga khwaulila khurio, efwe ne babaandi ba babao khwekoonjelela Paulo alekhe khucha e Yerusalemu.

¹³Nio abakobosia ali, “Mulakholanga siina? Mulenyanga ese fwe kumwoyo? Ese senerekeekhe khubowa mu Yerusalemu khwong'ene tawe, nerekeekhe akhaba khufwilayo sikila lisina lio Mwami Yesu.”

¹⁴Se khwanyala khu muyusia chinganakani tawe, nio khwarusiakho kumwoyo mala khwaloma khuli, “Lekha lilienya lio Mwami likholekhe.”

¹⁵Enyuma we khubaayo khulwe siise, khwarekekha bibiindu biefwe khwacha Yerusalemu.

¹⁶Balala khu beeka ba Kaesarea bacha nafwe, bakhuyila munju niyo khwaba ne khucha khumenya eya Munasoni owama Saipurasi, mulala khu beeka be khunyoa.

¹⁷Nga ne khwola Yerusalemu, basuubili bakhwakaanila ne busangaafu.

¹⁸Endaalo yaloondakho khwacha ne Paulo owa Yakobo, mala babemeelesi be kanisa boosi baabayo.

¹⁹Paulo abakheesia ne khubaboolela koosi niko Wele aaba ne akholile mu Be Chikholo khubirira mu milimo kiewe.

²⁰Nga ne bamala khumu ulila, boosi bafumia Wele ne khuloma bali, “Wandaayefwe Paulo, onyala khubona oli Bayaudi chielefu bekelile basuubili, mala boosi beanile khutiila Lilaka.

²¹Baboolelwe bali ewe olekisianga Bayaudi boosi bamenyile mu sibala sie babaandu Be Chikholo banjukhe Lilaka lia Musa, ne khubaboolela bakhakheba babaana babwe namwe baloonde kimiima kie Bayaudi tawe.

²²Nono aba khukhola khurie? Sikila balaulila bali wechile.

²³ Lino nilio khwenya ewe okhole. Babaandu bane bali ano babechubile.

²⁴Khoche, oambaane nabo mu mulukha kwe khukhwekwalaasia obaruungire kimiruungo kiabwe; nio banyale khubeka lichuune liabwe. Mu ngila yino buli mundu kane amanye ali, bung'ali se bulikho mu biindu nibio balaboolelwanga khwiwe bino tawe, ne ewe wamwene omenyile khuloondekhana ne Lilaka lia Musa.

²⁵ Ne khu basuubili bali mu Be Chikholo, khwabarumiire ebarwa ebaboolela nga khwafukiilisiane khuli khukhwola balekhe khulia siakhulia siosi siosi siianilwe khu bifwaani. Lundi bakhalia kamalasile, namwe sisiaayo nisio bakokile tawe, ne kakhali khukhwola beliinde khuloondekhana ne sifwaabi.”

²⁶Nio Paulo abukula babaandu abo, ne endaalo eyaloondakho akhola kumulukha kwe khukhwekwalaasia alala nabo. Nio engila mu Lukaangu, ne khubamanyisia esaabu eye chindaalo che khukhwekwalaasilamo. Nio embosio eanwe khulwa buli mulala.

²⁷Chaba oli chindaalo saba echo chili embi khuwa, Bayaudi balala khukhwama Esia babona Paulo mu Lukaangu. Baachilisia babaandu boosi mala bafwakhila Paulo.

²⁸Baapa luyoka bali, “Baana ba Isiraeli, khuyeete! Yuno niye omundu owikisianga babaandu boosi buli abuundu kamakhuwa kamabi khu baandu ba Isiraeli, khu Lilaka lia Musa, ne khu Lukaangu luno. Ne akhaba luno areerire Be Chikholo mu Lukaangu ne khunyaalutia Abuundu Atakatifu ano!”

²⁹ (Baloma kano sikila baba baboone Turofimo Omuefeso nali ne Paulo mu lukoba, nio bebaasia bali Paulo aba amuilile mu Lukaangu.)

³⁰Chingoyaani chaba mu lukoba mwoosi mala babaandu boosi batima babusiana, bafwakhila Paulo bamukhuruura bamurusia mu Lukaangu. Nio bilibwa bie Lukaangu biekalwa ao ne nao.

³¹Nga babaandu abo bakhakanga khukhwira Paulo, likhuwa liolela naitiriani omukhulu owe kamae bali sisiayuumba sili mu Yerusalemu mwoosi.

³²Ao ne nao naitiriani omukhulu owe kamae oyo abukula banamae balala ne babemeelesi babwe batimaka mu lukoba niio babaandu chana baba. Nga babaandu abo ne babona banamae, balekha khukhupa Paulo.

³³Naitiriani oyo acha niio Paulo ali, amuaamba, ne khurusia lilaka ali abowe kiminyololo kibili. Nio areeba ali, “Omundu yuno naanu niye, ne akholile siina?”

³⁴Baapa luyoka ne baloma bibiindu bibiabukhaane. Kumukoyaano kwabao kwakila omukhulu owe kamae aakorwa khumanya sisiikholeekhe sisiene, kakila aboolela banamae bewe bayile Paulo mu kambi eye banamae.

³⁵Oli boola abuniinilo, sisiayuumba siakucha siakila banamae bamema Paulo mungaaki.

³⁶Boosi bamuloondangakho ne beyasa bali, “Mwire!”

³⁷Nga banamae ne baba siimbi khukhwingisia Paulo mu lukoba, alomaloma khu naitiriani omukhulu owe kamae ali, “Nosiima lekha ndomalomekho khwiwe?” Naitiriani oyo amukobosia ali, “Ewe omanyile Lukiriki?

³⁸Ewe se oli Omumisiri, owarakiikhe sisiayuumba anyumakho ao, mala wekhupa mu sichiimi ne babaandu babeeri chielefu chine, ba baaba ne bulwaani tawe ku?”

³⁹Paulo akobosia ali, “Ese ndi Omuyaudi, nasaalwa Tasasi mu Silisia, lukoba lulwamanyikhana lukali. Ne musiima ndekhe ndomalome ne babaandu bano.”

⁴⁰Nio naitiriani oyo amuelesia kumunwa, mala Paulo eema khu buniinilo, asisia babaandu ne kumukhono. Nga ne basila, Paulo alomalomela mu Lueburania ali,