Read lubukusu Bikh. 25 Bible Online

Bikh. 25 - lubukusu bible

Bikh. 25

¹Chindaalo chitaru ne chibirire, enyuma wa Fesito khukhwola mu lukoongo olwo, aama Kaesarea, aacha Yerusalemu.

²Basaayi bakhulu alala ne babemeelesi be Bayaudi bamuboolela kamasitako ka Paulo. Bekoonjelela Fesito

³abareerere Paulo e Yerusalemu; sikila baba bakholile ekwangwaani eye khumwirira khu ngila.

⁴Nio Fesito akobosia ali, “Paulo ali omuboe e Kaesarea ne ese ambi ari ndachayo.

⁵Lekha babemeelesi benywe ne nase khuche e Kaesarea mala basitake omundu yuno aaba ne akhola sisiindu siosi siosi sibi.”

⁶Fesito aamala nabo chindaalo munaane namwe ekhumi mala aacha e Kaesarea. Oli Endaalo eloondakho, ekhala mu koti khu khalaka mala arumania bareere Paulo.

⁷Nga Paulo ne oola, Bayaudi babaama Yerusalemu benyokha bema bamubotookhelela mala barakikha khuloma bibiindu bikali biibi bie bubeeyi khu Paulo nibio babeene bakhanyala bekesia ne bili biang'ali tawe.

⁸Ne kakhali Paulo ekaana ali, “Ese se nakholakho libi liosi liosi khu Lilaka lie Bayaudi, namwe khu Lukaangu, namwe khu mwami we Barumi tawe.”

⁹Ne Fesito enya Bayaudi bamusiime, nio areeba Paulo ali, “Onyala khufukiilila khucha Yerusalemu mala oyaalwe kamasitako kano ebweeni wase?”

¹⁰Paulo aloma ali, “Nemile ebweeni we koti yo mwami eye bukhalaki, niio khoyela njaalwe. Nga ewe wamwene nomanyile ese se nakholelakho Bayaudi sisiindu sibi tawe.

¹¹Aba bali nafuna lilaka ne khukhola sisiindu sisiolaana khalakilwe khufwa, se saba ndekhwe busa tawe. Ne kaba bali bung'ali se buli mu niko basitakilakho tawe, aba se aliio omundu onyala anda mumakhono kabwe tawe. Ndeloochela omwami Kaisari.”

¹²Nga Fesito amala khulomaloma nende be koti yewe akobosia ali, “Wenya wiloochele omwami Kaisari, nono ndakhuyila owa Kaisari.”

¹³Enyuma we siise sitiiti, omwami Akuripa ne Banisi beecha e Kaesarea, khu khwakaanila Fesito.

¹⁴Oli bamalayo chindaalo chingali, Fesito aboolela omwami ka Paulo: ali, “Omundu ali ano niye Felikisi aalekha mu siboe

¹⁵ne nga nacha Yerusalemu, basaayi bakhulu ne babemeelesi bamusitaka mala bandeeba mukhalakile.

¹⁶Ne nababoolela ndi, efwe Barumi, se khuli ne kumwiima kwe khuyila ebweeni omundu yesi yesi ositakiilwe khu musaango nasiili khubonana ne bamusitakile moni na moni ne khuba ne bubweyaangu bwe khuloma kakeewe tawe.

¹⁷Nga ne becha ano, senatibiakho siise tawe, endaalo yaloondakho ne ng'ene nekhala mu koti naana lilaka, omundu oyo areerwe mukari.

¹⁸Babamusitaka benyokha bema, ne se bamusitakakho khu liosi liosi khu niko nebaasia ndi banyala bamusitakakho tawe.

¹⁹Ne kakhali niko baba nako kaba kamayiingamo khuloondekhana ne dini yabwe ne omundu niye balanga bali Yesu, owafwa, ne kakhali Paulo aloma ali, Yesu ali omulamu.

²⁰Senamanya nisio khola nio manye kamakali khuloondekhana ne kamakhuwa kano tawe. Nio nareeba Paulo aba ne afukiilila khucha e Yerusalemu khuyaalwa khu makhuwa kano.

²¹Ne Paulo eloocha aoche ebweeni wa Kaisari. Asaba khuliindwa nio Kaisari akhalake kumusaango kwewe. Khwako narusia kamalaka aliindwe nabwila nendi muyila khu mwami Kaisari.”

²²Akuripa aboolela Fesito ali, “Nenya mbulile ko mundu yuno samwene.” Fesito akobosia ali, “Okhakaulile muchuli.”

²³Nga ne bwasia, Akuripa ne Banisi beecha ne esambo engali ne bengila abuundu niio baaulililanga kamakhuwa. Baaba alala ne naitiriani be kamae ne babemeelesi be lukoba. Nio Fesito arusia lilaka, mala Paulo areerwa mukari.

²⁴Fesito aloma ali, “Omwami Akuripa ne babaandi mwesi muli ano nafwe, bona omundu yuno niye Bayaudi boosi bali ano ne mu Yerusalemu bakheenya tawe, bandereere lilieloocha liabwe. Ne bakukuula bali, se akhoyeela abe omulamu tawe.

²⁵Ne se namunyoolilekho ne sisiindu siosi siosi sinyala khukila akhalakilwe lifwa tawe. Sikila niye omwene asabile khukhwiloochela omwami Kaisari, nakhalake muyileyo.

²⁶Ne se ndi ne sisiindu nisio nyala khuandikila omwami Kaisari tawe. Nono namureerire ano ebweeni wenywe, ne lukali khwiwe omwami Akuripa, nio nemalile khukhwemenieelesia kakeewe mbe nende nisio nyala khuandika.

²⁷Sikila nibaasia ndi lili lie busilu khwise khuyila omuboe ne khaboolile abuwaanga kamasitako kewe tawe.”