Read lubukusu Bikh. 26 Bible Online

Bikh. 26 - lubukusu bible

Bikh. 26

¹Akuripa aboolela Paulo ali, “Nakhusibuule olomalome kakowo wamwene.” Paulo okesia ne kumukhono mala alomaloma kakewe ali,

²“Omwami Akuripa: Samwene mbona ndi, luno ndi ne ekhabi khuba ebweeni wowo ne nekaana bibiindu nibio Bayaudi basitakile bino, sikila

³ewe wamwene omanyile bulayi kimiima kiosi kie Bayaudi ne bibiindu nibio baukhanilamo. Nono, khusaba wekhaliilikhe undekeeresie.

⁴“Bayaudi boosi babeene bamanyile nga namenya khukhwama mu bwana bwase. Bamanyile chingila nicho menyeelemo ne bulamu bwase bwoosi, khurakikhira mu sibala siase sisiene, ne mu Yerusalemu.

⁵ Aba bali benya khuaana buloli bwase, bamanyile bali khukhwama mu khurakikha namenyanga nga omusaangi owe kumukaanda kuliinda kamalaka ke dini yefwe kwe Bafarisayo.

⁶Ne luno ndi ano mu muse khuyaalwa sikila lilieyikina nilio ndi nalio mu lisuubisia nilio Wele alakiilisia bakuuka befwe,

⁷lilieyikina chana nilio Chikholo ekhumi na chibili che babaandu befwe cheyikina khunyoola nga ne basaaya Wele kumuusi ne siilo. Ne omwami lilieyikina lino nilio likila ne sitakwa ne Bayaudi bano!

⁸Siina sikila enywe muli ano nemubona muli se kanyalikha khusuubila muli Wele alamusia ba bafwa?

⁹ “Ese samwene nebaasia ndi ndakhola buli siindu nisio nyala khuyingania lisina lia Yesu owe Nasareti.

¹⁰Kameene ako niko nakhola mu Yerusalemu. Nanyoola bunyali khukhwama khu basaayi bakhulu mala nayila babaandu ba Wele bakali mu siboe; ne nga bakhalakilwa khufwa, sesi narakho kumukhono ndi bafwe.

¹¹Siise sikali nabanyaasianga mu masinakooki ne khukhaka khubakhola bekaane lisuubila liabwe. Naba ne lirima likali khu nibo, liakila nacha ne mu ngoba chingeni khubapia sibi.

¹²“Esino sisiakila nenja e Damasika ne bunyali ne kamalaka khukhwama khu basaayi bakhulu.

¹³Omwami nga naba khu ngila mwiangilwe, nabona buwaanga bukhila bwe nyaanga, bwecha khukhwama mu ngaaki bwakhosia, bwambotookhelela ese ne babaandu nibo naba nabo.

¹⁴Fweesi khwakwa aasi, mala naulila kumumilo ne kulomaloma khwise mu Lueburania kuli, ‘Saulo, Saulo! Siina sikila ne unyaasia? Olikho wenyaasia wamwene, oli nga eeyi ne esaamba esiimbo eyo Mwami wayo owakibaya.’

¹⁵Nareeba ndi, ‘Ewe naanu, Omwami?’ Nio Omwami akobosia ali, ‘Ese Yesu, niye ewe olanyaasianga.

¹⁶Ne kakhali yinyokha wime. Nakhubonekheele khukhurobora obe omukholi wase. Okhoyela khuboolela babaandi niko oboone khwise luno, nende niko khakhwekesie mu ndaalo chichiicha.

¹⁷Kane khuonie khukhwama khu baandu ba Isiraeli ne khu Be Chikholo nibo ndi khurumamo.

¹⁸Obekule chimoni ne khubarusia mu siilima obayile mu buwaanga, lundi obarusie mu bunyali bwa Sietani bache khu Wele, nio khubirira mu lisuubila liabwe mwise, bubwoni bwabwe bubeelwe nio banyoole bubwikhalo bwabwe mu barobore ba Wele.’

¹⁹“Khwako, Omwami Akuripa, se nakhola sileka khu malola niko nanyoola khukhwama mwikulu tawe.

²⁰ Khurakikhira mu Damasika, ne mu Yerusalemu, ne mu Buyuda mwoosi ne mu Be Chikholo. Ese nelwacha ndi, khukhwola bekanile bubwoni bwabwe, bakobolele Wele, mala bakhole bikholwa bibiekesia bili bekaniile.

²¹Siaba sifuno sino sisiakila Bayaudi bafwakhila nga naba ne ndi mu Lukaangu, mala bakhaka khu khunjira.

²²Wele anjeetile khukhwola endaalo yino, khwako nemile ano khuana buloli bwase khu boosi, khu bakhoongo ne bakhali bakhoongo tawe sitube. Nilio ndoma lili busa lilala elio nilio bang'oosi ne Musa baloma bali licha khwekholekha.

²³ Bali khukhwola Kristo anyaasibwe mala abe owe khunyoa khulamukha khukhwama mu lifwa, elwache buwaanga bwe buonia khu Bayaudi ne khu Be Chikholo.”

²⁴Nga Paulo ne aloma ario, Fesito amuyibila ali, “Paulo, ewe oli ne kamalalu! Busomi bowo bukali bwakhulaluusie!”

²⁵Paulo akobosia ali, “Omwami, ese se nalalukhekho tawe! Ndikho ndoma bung'ali mu milengaala.

²⁶Omwami Akuripa! Omanyile bibiindu bino bioosi, nyala khulomaloma khwiwe ne bunyindaafu bwoosi sikila manyile ndi mbao siosi siosi sisiekisa khwiwe tawe, sikila kano se kakholekha mu bwikisi tawe.

²⁷Omwami Akuripa, osuubila mu bang'oosi? Manyile ndi obasuubila!”

²⁸Akuripa akobosia Paulo ali, “Wibaasia oli mu siise sitiiti sino olakhola sesi mbe Omukristo?”

²⁹Paulo amukobosia ali, “Sibeele siise sitiiti namwe sikali, lisaba liase khu Wele lili mbo, ewe ne babaandi babandekereesie luno babe nga ese ne endi, ne kakhali se khuli khubowa chipiingo nga ese tawe!”

³⁰Nio omwami, ne omuruki, Banisi, ne babaandi boosi ba baaba ne bekhaale nabo benyokha,

³¹oli barekukha baloma bali, “Omundu yuno se akholakho sisiindu siosi siosi sikila afwe namwe abowe tawe?”

³²Nio Akuripa aboolela Fesito ali, “Omundu yuno andi alekhuulilwe abanga bali se asaba kumunwa khubona omwami Kaisari tawe.”