Read lubukusu Bikh. 27 Bible Online

Bikh. 27 - lubukusu bible

Bikh. 27

¹Nga ne liabisibwa bali khukhoyeela khucha Italia khu birira khu nyanja, baana Paulo ne baboe babaandi khu Chuliasi owaba Naitiriani omukhulu owe kamae, owemeelelanga sipupu silaangwa sili “Sipupu sia Kaisari.”

²Khwaniina e meeli khukhwama Aturamitio, eyaba ne yerekekhe khucha khubirira mu mafubukho ke chimeeli mu sibala sia Esia. Nio khwacha ne Arisitakaasi, Omumasedonia khukhwama e Tesalonike.

³Nga bwasia khwola e Sidoni. Chuliasi aba omulayi khu Paulo mala amufukiilila khucha khubona basaale bewe, bamuyeete nibio aaba ne enya.

⁴Khwama abwenao khwachiililila, sikila ekhuungu yauchanga khukhwama ebweeni, khwabirira lubeka lwe sibala sia Saipurasi, sisiakarwa ne kameechi, ebweeneyo ekhuungu yaaba engeekhe.

⁵Khwambukha enyanja eya Silisia ne Pamufilia, khwacha khwola Mira mu Lukia.

⁶Abwenao, naitiriani chana oyo anyoola e meeli eyama Alekisanduria eyaba necha Italia, mala akhwingisiamo.

⁷Khwacha kalaa khulwe chindaalo chingali mala ekhumaliilikha khwola siimbi mu lukoba lwa Nito ne khubirira mu butinyu bukali. Ekhuungu se yakhufukiilila khukhwesenda lundi aleeyi lubeka lwene olwo tawe, khwako khwekha khwabirira lubeka lwe sibala sisiakarwa ne kameechi sia Kurete, ne khulandila khu lukuku lwa Salimoni.

⁸Khwalandilanga khundulo khwalwo siimbi siimbi, mala mu butinyu bukali khwola abuundu alaangwa bali, “Lifubukho lie Buonelo,” se ali aleeyi khukhwama mu lukoba lwa Lase tawe.

⁹Khwemao siise sileeyi, lialolekhana ne buli busiku khuchiililila ne lukeendo, sikila Endaalo eye khukhweyimana khulia yaba yabirire. Nio Paulo abakaambila ali,

¹⁰“Basaakhulu, naboone ndi lukeendo luno khukhwama ano lulaba ne busiku. Emeeli ne bisutwa bilonekha akhaba ne bulamu bwefwe bwoosi bunyala khutiba.”

¹¹Ne kakhali Naitiriani aulila niko Kaputeni ne omwene meeli baloma, mala aloba ka Paulo.

¹²Ne sikila mwifubukho omwo se mwaba mulayi khumenyamo mu munaane tawe, bakali bafukiilisiana khuchiililila ne lukeendo, ne kanyalikhana boole e Foenike, bamenyeyo mu munaane. Foenike lili lifubukho lia Kurete lilialoleelela akari we siafubo ne mumbo ne akari we siafubo ne bunaswa.

¹³Ekhuungu eya kalaa yaucha khukhwamila siafubo, nono babaandu bebaasia bali balakhola niko benyile khukhola, kakila bakhuula sichaangi sie meeli, barakikha khuchila siimbi siimbi khu lukulu lwa Kurete nga kanyalikha.

¹⁴Ne ao ne nao ekhuungu eye kamaani kamakali niyo balanga bali, “Eye Bunaswa-bukwe” yaucha khukhwama e sikiingi.

¹⁵Yaucha emeeli mala nga ne bwaba butinyu khucha lubeka nilwo yama, khwalekha yakhuyila niio yaba ne elikho elosia.

¹⁶Khwanyoola niio khwekhiinga nga ne khwaba ne khulanda siafubo eye khabala khalaangwa Keuta. Abwene ao, mu butinyu bwenobwo khwanyala khuonia liliaro ne emeeli.

¹⁷Khwalikhwesa liecha khu sikiingi khu ngaaki mala khwaliboela kimikoye khu meeli tatatata. Baba ne buuri bali wakana banyala bengila mu muyekhe kwe khu sikiingi siili siimbi ne lukuku lwa Libia, nio baulukusa engubo eye meeli nio emeeli euchwe busa ne ekhuungu.

¹⁸Embembeesi eye kamaani yachiililila khuucha, ne nga ne bwasia barakikha khumwaata mu meechi bisutwa bie khu meeli,

¹⁹ne endaalo eloondakho bamwaata lundi bilala khu biindu bie khu meeli mu nyanja.

²⁰Khulwe chindaalo chingali enyanga namwe ching'enieesi se biabonekhanakho tawe, ne kakhali ekhuungu yachiililila khuucha lukali. Ekhumaliilikha lilieyikina liefwe lie khuona liakhuwamo.

²¹Enyuma we babaandu khuba ne njala khulwe siise sileeyi, Paulo eema ebweeni wabwe mala aloma ali, “Basaakhulu, abanga mwambulila andi se mwarura e Kurete tawe; mala andi se khwengiile mu butinyu buno ne khutibia nibio khwabeele nabio tawe.

²²Ne kakhali luno musaba mube banyindaafu! Se aliio namulala khwinywe okane atibie bulamu bwewe tawe; emeeli yong'ene ekane yonekhe.

²³Sikila silo sia luno, malaika owa Wele wase niye saayanga anjichilekho

²⁴mala aloma ali, ‘Paulo, okharia tawe! Khukhwola wime ebweeni wo mwami Kaisari. Bulayi bwa Wele khwiwe bwaoniisie bulamu bwe babaandu boosi bali khu lukeendo luno ne nawe.’

²⁵Nono, nyindaalila basaakhulu sikila suubila mu Wele ndi kalakholekha bulayi bwene nga ne mboolelwe.

²⁶Ne kakhali ekhuungu elakhuyila khwikhupe khu sikiingi sie sibala nabulebe.”

²⁷Mwaba mu silo muukhola ekhumi na khane, ne khwaba khulikho khuuchwa ne embembeesi khu nyanja eya Mediterenia. Embi mu silo akari babaandereba be meeli baabona bali khwembiisie khu sibala.

²⁸Nio bekhisia kumukoye mu meechi kuboelwekho busiro, banyoola bali buli buleeyi bwe chimita kamakhumi kane. Oli khwesendakho atiiti bakhola bario lundi mala ne banyoola bali buli buleeyi bwe chimita kamakhumi kataru.

²⁹Baria bali kane e meeli yikhupe khu lwanda, nio bekhisia mu nyanja bichaangi bine khukhwama enyuma we meeli mala basaba bali busie khangu.

³⁰Nio babaandereba be meeli bakhaka khukhwilukha khurura mu meeli; bekhisia liliaaro mumeechi bekhola nga bali khucha khu khwikhisia bichaangi mu meechi khukhwama ebweeni we meeli.

³¹Nio Paulo aboolela naitiriani omukhulu owe liie ne banamae ali, “Kaaba bali be mu meeli se balikho bacha khurama mu meeli tawe, aba se mulaona tawe.”

³²Nio banamae bakhala kimikoye kikiaamba liliaro, mala balilekha liche ne embembeesi.

³³Oli makhelebeende, Paulo abasaba boosi balie siakhulia ali, “Mu ndaalo ekhumi na chine, mwama khuba ne liaayaaya, ne khu ndaalo chino choosi se mwalilenge sisiindu tawe.

³⁴Nono, musaba mulie siakhulia nio mube balamu. Se aliio olatibia akhaba lichuune lilala liewe tawe.”

³⁵Nga Paulo aamala khuloma ario, abukula kumukaati, aapa orio khu Wele ebweeni wabwe boosi, akumesula, mala arakikha khulia.

³⁶Banyindaalila kimiooyo, mala buli mulala alia.

³⁷Fweesi alala mu meeli khwaba babaandu chimia chibili ne kamakhumi saba na sita.

³⁸Boosi nga balia bekura, bamwaata engaanu yoosi mu nyanja banguyia emeeli.

³⁹Nga bwasia, ba baaba mu meeli khumanya sikiingi tawe, nio babona lukhuna lwe nyanja ne lukulu lwe kumuyekhe, nio bakhalaka bali, ne kanyalikhana, bayile e meeli khu sikiingi esio.

⁴⁰Nio balekha bichaangi bisiikhe mu nyanja, ne mu siise sienesio bakangulula kimikoye kikiabowa khu makhono kaluungisia e meeli. Nio baboa engubo ebweeni we meeli nio ekhuungu eyile emeeli ebweeni, mala khwacha e sikiingi.

⁴¹Ne kakhali emeeli yekhupa khu sikiingi sie kumuyekhe mala yaanda ebweeni khunyala khucha tawe. Ne lubeka lwe enyuma emeeli yafunikhaka mu bitonyi sikila bibuli bie kameechi bikali.

⁴²Banamae berekekha khukhwira baboe boosi bali bakhakhola bario basoka boola khu sikiingi mala belukha tawe.

⁴³Ne kakhali naitiriani omukhulu oyo enya khuonia Paulo, kakila abakhiingilila khukhola bario. Ne kakhali arusia lilaka boosi bamanyile khusoka banyoe basune khurura mu meeli basoke boole khu sikiingi;

⁴⁴baramire baloondekho, ne beambile khu mbao namwe khu bitonyi bie chimbao che meeli eyaba nefunikhaakemo. Kaba kario nio fweesi khwola bulayi khu sikiingi.