Read lubukusu Bikh. 7 Bible Online

Bikh. 7 - lubukusu bible

Bikh. 7

¹Omusaayi Omukhulu Lukali areeba Sitefano ali, “Kano kali ka ng'ali?”

² Sitefano akobosia ali, “Bawandaayase ne bapaapa, ndekeeresie! Kuuka wefwe Aburahamu nasiili khucha khumenya e Harani tawe, Wele owe luyali amubonekhela mu Mesopotamia mala

³amuboolela ali, ‘Rura mu sibala siowo, olekhe balebe bowo mala oche mu sibala nisio khakhwekesie.’

⁴ Nio Aburahamu arura mu sibala siewe mala acha amenya e Harani. Raraawe owa Aburahamu nga afwa, Wele auuyia Aburahamu amureera mu sibala nisio luno mumenyilemo sino.

⁵ Abwene ao Wele se aelesiakho Aburahamu sitonyi sie kumukuunda okwo akhaba sikelo sie efuuti kube kukwewe tawe. Ne kakhali Wele asuubisia khumua niye kumukuunda okwo kube kukwewe nende be lisaaye liewe. Mu siise nisio Wele asuubisiliamo Aburahamu, se abaakho ne omwana tawe.

⁶ Kano niko Wele amuboolela ali: Lisaaye liowo lilimenya mu sibala sikeni, niyo liliba nasioobi ne lilinyasibwa lukali khulwe kimiiko chimia chine.

⁷ ‘Ne kakhali ndikhalakila babaandu nibo balinyaakhanila, ne enyuma wako balirura mu sibala esio mala bakhanjesaile ano.’

⁸ Nio Wele aelesia Aburahamu sikhebo sibe sisiekesio sie endakaano eyo. Khwako Aburahamu akheba Isaaka khu ndaalo eya munaane khukhwama nga ne asaalwa; Isaaka akheba omwana wewe Yakobo, ne Yakobo akheba babaana bewe ekhumi na babili, bakuuka bamanyikhaane mu kholo yefwe.

⁹ “Babaana ba Yakobo bakhendekhela wandaayabwe Yosefu mala bamukusia khuba nasioobi mu Misiri. Ne kakhali Wele aba naye,

¹⁰ mala amukobosia omulamu enyuma we khubirira mu matinyu kewe koosi. Nga Yosefu echa ebweeni wo mwami owa Misiri, Wele aelesia Yosefu lifukiililwa ne limanya nga echa ebweeni wo mwami Farao. Nio Farao akhola Yosefu aaba omuruki mu sibala sia Misiri ne khunju eye bubwami.

¹¹ Mu nyanga echo enjala yakwa mu Misiri mwoosi ne mu Kanaani mala yareera butinyu bukali. Bakuuka befwe se banyoola bilio tawe,

¹²Ne Yakobo nga aulila ali biakhulia bili e Misiri, arumayo babaana bewe bali bakuuka befwe khuchayo lwe bweeni.

¹³ Oli lukhola khabili Yosefu ebuula khu bawandaaye, mala omwami owe Misiri amanya be lisaaye lwa Yosefu.

¹⁴ Nio Yosefu arumania likhuwa khu raraawe Yakobo, khumuboolela niye ne babaana bewe boosi, babaandu baboola kamakhumi saba na baraano beche mu Misiri.

¹⁵ Nio Yakobo acha e Misiri, niyo niye omwene ne babaana bewe bafwila.

¹⁶ Kimibili kiabwe kiayilwa e Shekemu niio kiasiikhwa mu ng'ani niyo Aburahamu akula ne chirupia khukhwama khu kholo eya Hamori.

¹⁷ “Nga siise sie lisuubisia nilio Wele aelesia Aburahamu ne siembiya, esaabu eye babaandu befwe mu Misiri yaba yakuchile lukali.

¹⁸Ekhumaliilikha omwami okundi okhamanyakho Yosefu tawe arakikha khukhwamiia Misiri.

¹⁹ Abea bakuuka befwe lundi aaba omurafu khu nibo, abaingiilila barusie babaana babwe mu chingo chabwe nio bali bafwe.

²⁰Siaba siise sino nisio Musa aasalilwamo, mala aaba omwana owe lukoondo lulayi mu moni cha Wele. Alelelwa mungo khulwe kimieesi kitaru,

²¹ ne nga ne bamurusia mungo mwabwe, omukhaana owo mwami Farao, amwangala mala, acha naye amukhusia nga omwana wewe.

²²Musa eekisibwa limanya liosi lie ba Bamisiri, aaba omundu omukali mu makhuwa ne mu bikholwa.

²³ “Musa nga aba ne kimiiko kamakhumi kane, akhalaka khucha khumanya nga Baisiraeli basie ne bakholelwanga.

²⁴Abona Omuisiraeli mulala ne akholelwa bubi ne omumisiri, nio aacha amuyeeta, mala eera Omumisiri khulwe khumwiyacha.

²⁵Ebaasia ali, manya babaandu bewe kane bamanye bali Wele alikho acha khubasoola nibo khumurumikhira niye khubalekhuula, ne kakhali se bamanya bario tawe.

²⁶Endaalo eya loondakho abona Baisiraeli babili ne bapana mala akhaka khubakaya ne aloma ali, ‘Balebe rekeeresia, enywe muli Baisiraeli mweng'ene; siina sikila ne mupana muri?’

²⁷Ne oyo owaba ne arangaane owasie asindikha Musa, ne khumureeba ali, ‘Naanu owakhukhola ewe khuba omwami lundi omukhalaki khwifwe?

²⁸Ewe wenya khukhunjira nga werire Omumisiri oyo likolooba?’

²⁹ Nga Musa ne aulila kano, elukha mu Misiri acha amenya mu sibala sia Midiani, asaalilayo babaana babili be siseecha.

³⁰ “Enyuma we kimiiko kamakhumi kane ne kiwele, malaika abonekhela Musa munjaso che kumulilo kuburukha mu sichakha, mu sichiimi embi ne sikulu sia Sinai.

³¹Musa aarangararwa khu niko abona, nga ne acha siimbi ne sichakha nio abone bulayi, aulila kumumilo kwo Omwami ne aloma ali,

³²‘Ese ndi Wele owe bakuuka bowo, Wele owa Aburahamu, Isaaka ne Yakobo.’ Musa aterema mala aambwa buuri khaba khulolayo tawe.

³³Omwami amuboolela ali, ‘Fuula biraaro biowo, sikila abuundu niio wimile ao, ali abuundu atakatifu.

³⁴Naboone siibi nisio babaandu baase balimo mu Misiri. Nauliile khukhweloocha khwabwe, mala nekhile aasi mbarusiemo. Nono yiicha; khurume e Misiri.’

³⁵ “Musa ali niye babaandu ba Isiraeli baloba, nga bamureeba bali, ‘Naanu owakhukhola ewe omwami lundi omukhalaki khwifwe?’ Oyuno ali busa omwene niye Wele aruma khubaruka ne khubaelesia bulekhuule khulwe buyeeti bwa malaika, owamubonekhela mu sichakha sisiaba ne siburukha.

³⁶ Arangirira babaandu khurura mu Misiri, akholanga kamayia ne bikholwa bie liiukia mu Misiri, a nyanja eya Shamu, ne kakaandi mu sichiimi khu miiko kamakhumi kane.

³⁷ Musa yuno niye owaboolela babaandu ba Isiraeli ali, ‘Wele alimurumira omung'oosi bulayi bwene nga anduma ese, ne aliba mulala khu baandu benywe.’

³⁸ Musa yuno niye owaba ne babaandu ba Isiraeli ba babusania mu sichiimi; abayo ne bakuuka befwe ne malaika owalomaloma naye khu sikulu sia Sinai. Anyoola kamalaka kaana bulamu khukhwama khu Wele mala akhuelesia efwe.

³⁹“Ne kakhali bakuuka befwe baloba khumuria; bamulekelesia mala bekoomba bali andi bakoboole e Misiri.

⁴⁰ Nio baboolela Aruni bali, ‘Khung'oonele bawele bakane bakhuraangirire. Se khwamanyile sisiekholeekhe khu Musa oyo, owakhureerire khurura mu Misiri tawe.’

⁴¹ Nio abwenao bang'oona sifwaani sifwaana euunwa, basiaanila embosio mala baba ne naikara khulwe lukoosi lwe sifwaani nisio babeene beng'ooneele.

⁴² Nio Wele abafutarira mala abalekhuula basaaye ching'enieesi nga ne kaandikwa mu sitabu sie bang'oosi kali: ‘Baandu ba Isiraeli! Nga ne mwaba mu sichiimi khu miiko kamakhumi kane, chimbosio che bibiaayo nicho mwarusia, se mwandusira ese tawe.

⁴³Liiema nilio mwasuta, liaba lia Moleki, ne sifwaani sia wele Refani, wele wenywe we eng'enieesi, biaba bifwaani nibio mwakhola nio mu bisaaye. Khwako ndamuyila mu mbaambe engelekha owa Babiloni.’

⁴⁴ “Bakuuka befwe baaba ne liiema lia Wele Omunyali Owa Bioosi mu sichiimi. Liaba liakholwa nga Wele ne aboolela Musa khulikhola, khuloondekhana ne efwaani niyo Wele amwekesia.

⁴⁵ Enyuma we siise, bakuuka befwe ba banyoola liiema khu ba raara babwe, balisuta bacha nalio nga baaba ne bacha ne Yoshua ne bela mu sibala nisio Wele aonamo Be Chikholo nga bakuuka befwe baaba ne bengilamo. Liamenyayo khukhwola mu siise sia Daudi.

⁴⁶ Daudi asiimisia Wele mala amureeba amufukiilile aane bumenyo khulwa Wele owa Yakobo.

⁴⁷ Ne kakhali aba Solomoni niye owamwombakhila enju.

⁴⁸“Ne kakhali Wele owe Angaaki Lukali se amenyanga mu chinju chichombakhwa ne babaandu tawe; nga omung'oosi ne aloma ali,

⁴⁹ “Omwami aboola ali, ‘Mwikulu eli endebe yase eye bubwami, ne sibala sili endebe eye bikele biase. Mulanjombakhila enju eya lukano siina? Waena niio ese nyala namenya?

⁵⁰Sendi ese samwene owabuumba bibiindu bino bioosi tawe ku?’ ”

⁵¹ Sitefano achiililila khuloma ali, “Enywe mwaluma emirwe muriena! Mukhakhebwa mu miooyo ne kamaru kenywe tawe. Muli busa nga bakuuka benywe; buli lwoosi mukhiingililanga Roho Omutakatifu!

⁵²Eku, aabakhoo omung'oosi yesi niye bakuuka benywe bakhapia siibi tawe? Beera barumwa ba Wele ba baboola khukhwicha khwo Omukholi wewe Omuluungi. Mala luno, enywe mwamuchaamile, ne khumwiira.

⁵³Enywe ninywe mumwanyoola lilaka lia Wele liliareerwa ne malaika, ne semwaliria tawe!”

⁵⁴Basaakhulu be kumuse nga ne baulila ka Sitefano, bakhalala lukali mala banyiisia mumoni.

⁵⁵Ne Sitefano, aaba echusiibwe ne Roho Omutakatifu, aalola mwikulu, mala abona luyali lwa Wele ne Yesu naye emile a kumukhono kumuseecha kwa Wele.

⁵⁶Aloma ali, “Lola! Naboone likulu liekuukhe ne Omwana wo Mundu emile kumukhono kumuseecha kwa Wele!”

⁵⁷Be kumuse bayokela lukali bafuunikha kamaru kabwe ne kamakhono, mala boosi batima bamutiila,

⁵⁸bamumwaata enje we lukoba, mala bamupa kamabaale. Baloli balekha kamakooti kabwe abikele bio musoleeli owalaangwa bali Saulo.

⁵⁹Bachiililila khu khupa Sitefano kamabaale, ne naye asaba Omwami ali, “Omwami Yesu, yakaanila kumwoyo kwase!”

⁶⁰Asikama aasi mala asaba ne kumumilo kwe angaaki ali, “Omwami! Okhabekiicha khulwe bubwoni buno tawe.” Oli amala khuloma ario ne asumbukha.