Read lubukusu Bikh. 8 Bible Online

Bikh. 8 - lubukusu bible

Bikh. 8

¹Ne Saulo afukiilila khukhwirwa khwa Sitefano. Endaalo ng'eneyo ekanisa mu Yerusalemu yarakikha khunyaasibwa burafu. Basuubili boosi, khurusiakho barumwa basalanila bacha mu ngoongo cha Yuda ne Samaria.

²Babaandu basuubili basiikha Sitefano, basooma ne khumulila lukali.

³ Ne Saulo akhaka khukhwonakaka ekanisa; engilanga mu buli munju, ne akhuruura basuubili be siseecha nende be siikhasi enje, ne khubara mu siboe.

⁴Basuubili basalanila bacha buli abuundu, ne belwacha elomo endayi.

⁵Filipo aaserengekha acha mu lukoba luboofu lwa Samaria elwacha elomo endayi eya Kristo khu baandu be ebweeneyo.

⁶Babaandu bakali barekeeresia lukali niko Filipo ababoolela, nga bamurekeeresia mala babona kamayia niko akhola.

⁷Bisieeno biarura mu baandu bakali ne bikukuula lukali. Babaandu bakali ba bafwokoya baona.

⁸Nio ekhoyo engali yaaba mu lukoba olwo.

⁹Ne abao omundu owamenyamo niye balanga bali Simoni, owakholanga bufumu bwewe ne aukia Basamaria, elangaanga ali, ali omundu omukali lukali,

¹⁰ne buli mundu mu lukoba, khukhwama khu bakeekhe khukhwola khu bakhulu bamurekeeresianga niye ne baloma bali, “Omundu yuno ali, bunyali bwa Wele bulaangwa buli, ‘Bunyali Bukali’.”

¹¹Bamurekeeresianga sikila siise sileeyi aabaukianga khu bufumu bwewe.

¹²Nga ne basuubila kamelwacho ka Filipo ke Lomo Endayi eye Bubwami bwa Wele, ne khu Yesu Kristo, baseecha ne bakhasi ba batiisibwa.

¹³Akhaba Simoni chana yesi aasuubila, ne enyuma we khubatiisibwa, aaba siimbi ne Filipo mala auka nga ne abona bie khuukia bikali ne kamayia ka kaaba ne kakholwa.

¹⁴Barumwa mu Yerusalemu baulila bali babaandu ba Samaria bafukiiliile Elomo eya Wele, nio ba barumira Petero ne Yoana.

¹⁵Nga ne boolayo, basabila basuubili banyoole Roho Omutakatifu.

¹⁶Sikila Roho Omutakatifu aba akhekhakho khu yesi yesi ebweeneyo tawe; baaba babatiisibwa busa mu lisina lio Mwami Yesu.

¹⁷Nio Petero ne Yoana babarakho kamakhono kabwe, mala banyoola Roho Omutakatifu.

¹⁸Simoni abona ali basuubili bamalile khuebwa Roho Omutakatifu khubirira mu khurebwakho kamakhono ne barumwa. Nio aana chirupia khu Petero ne Yoana,

¹⁹ne aloma ali, “Mbe sesi bunyali buno, nio yesi yesi niye ndakho kamakhono anyoole Roho Omutakatifu.”

²⁰Ne Petero amukobosia ali “Wiuuma ne chirupia chowo, sikila wibaasia oli, onyala wakula siianwa sia Wele ne chirupia!

²¹Se olikho ne kumukabwa namwe sitonyi mu milimo kiefwe tawe, sikila kumwoyo kwowo se kuli kumuluungi ebweeni wa Wele tawe.

²²Nono, khewekanile, lirekekha liowo limayaanu lino, mala osabe Omwami akhubeele khulwe khukhwibaasia sisiindu nga sino siri.

²³Sikila nakhuboone oli ne likhendekha likali mala oli omuboe owe bubwoni.”

²⁴Simoni aboolela Petero ne Yoana ali, “Ne musiima sabile khu Mwami, nio bibiindu nibio mulomalome bino bikhanjekholekhakho tawe.”

²⁵Ne enyuma we khuaana buloli ne khukhwilwacha elomo eyo Mwami, Petero ne Yoana bakobola e Yerusalemu. Khu lukeendo lwabwe belwacha Elomo Endayi mu birekere bikali bia Samaria.

²⁶Malaika owo Mwami aboolela Filipo ali, “Yirekekha wikhe emwalo siafubo, khu ngila yama e Yerusalemu necha Kasa.” (Engila yino leelo sebira tawe.)

²⁷Nio, Filipo erekekha acha. Mu siise siene esio abao Omuesopia omuchili owaba khu ngila naloota engo. Omundu yuno aaba omubiikhi omukhulu owe chirupia cha Kwini owa Esopia owalaangangwa bali Kandasi, aama Yerusalemu khusaaya Wele,

²⁸ne aaba ekhaale mwikaari, alasomanga sitabu sio mung'oosi Isaya.

²⁹Roho Omutakatifu aboolela Filipo ali, “Khoche siimbi ekaari ao mala oliloondekho.”

³⁰Filipo atima achao mala aulila ne alikho asoma sitabu sio omung'oosi Isaya, nio Filipo amureeba ali, “Olikho oelewa niko olikho osoma ku?”

³¹Omuesopia chana amukobosia ali, “Nyala khumanya ndiena omundu na khanjinosieele” Mala alaanga Filipo aniine mwikaari ekhale naye.

³² Sitonyi sie liiandiko nisio aba ne alikho asoma siaba sino: “Aba nga likheese lilikho ne liyilwa khu khwirwa, nga limeeme likhameleela ne balibeka tawe. Khwako, se ang'amula tawe.

³³Afwocholwa ne khukhwimwa bung'ali. Se aliio onyala aboola ke lisaaye liewe tawe sikila bulamu bwewe bwarusiibwe khu sibala.”

³⁴Omuesopia oyo areeba Filipo ali, “Mboolele, omung'oosi yuno alikho aloma khu naanu? Khu mwene namwe khu mundu okundi?”

³⁵Nio Filipo arakikha khulomaloma; khukhwama khu sitonyi sie liiandiko lino, amuboolela Elomo Endayi eya Yesu.

³⁶Nga ne baba ne bali khu ngila ne bacha, boola abuundu niio kameechi kali. Omuesopia chana aloma ali, “Bona, kameechi. Siina sisikhiingilila ese khubatiisibwa?” [

³⁷Filipo amukoboosia ali, “Waaba ne osuubila ne kumwoyo kwowo kwosi, onyala khubatiisibwa.” Naye akobosia ali, “Yee, nasuubiile ndi Yesu Kristo ali Omwana owa Wele.”][1]

³⁸Omuesopia oyo arusia lilaka likaari lime, nio Filipo ne omundu chana bekha mu meechi mala Filipo amubatiisia.

³⁹Nga ne barura mumeechi Roho owo Mwami abukula Filipo. Omuesopia khu mubonakho lundi tawe, mala achiililila ne lukeendo lwewe ne busangaafu.

⁴⁰Filipo akhebulila busa ali abuundu alaangwa Asetusi; abirira buli mu lukoba ne elwacha Elomo Endayi nabwila ola e Kaesarea.