Read lubukusu Bikh. 9 Bible Online

Bikh. 9 - lubukusu bible

Bikh. 9

¹Mu biise bienebio Saulo achiililila khuriikhirisia ne khukhwira babeeka bo Mwami. Acha wo Omusaayi Omukhulu Lukali,

²mala asaba chibarwa che khukhwemanyisia khu masinakooki ke mu Damasika, ne anyoolayo babeeka be Engila yo Mwami, anyale khubaamba, baseecha ne bakhaasi, mala abakobosie Yerusalemu.

³Nga Saulo embiyia lukoba lwa Damasika, ao ne nao buwaanga khukhwama mungaaki bwameniuukha niio aaba.

⁴Akwa aasi mala aulila kumumilo ne kumuboolela kuli, “Saulo, Saulo! Siina sikila ne ukhupia siibi”

⁵Saulo naye areeba ali, “Ewe naanu Omwami?” Kumumilo chana kwamukobosia kuli, “Ese ndi Yesu niye ewe olikho uupia siibi.

⁶Yinyokha mala wingile mu lukoba, mubwenomwo olaboolelwa nisio okhoyela khukhola.”

⁷Babaandu ba baroonga ne Saulo baba bemileo basilile busa. Baulila kumumilo okwo ne se babona omundu oloma tawe.

⁸Saulo enyokha khukhwama aasi mala amoka, ne kakhali se anyala khubona siindu tawe. Nio bamutiila kumukhono bamuila mu Damasika.

⁹Amala chindaalo chitaru nakhabona tawe, ne mu siise sienesio, se aliakho namwe anywa siindu tawe.

¹⁰Abao omukristo mu Damasika lisina liewe bali Anania. Abona kamalola Omwami ne amuboolela ali, “Anania!” Akobosia ali, “Omwami, ndi ano.”

¹¹Omwami amuboolela ali, “Yinyokha oche khu ngila elaangwa Eyaluungikha, munju eya Yuda, reebera mumwenomwo omundu owaama e Tasasi niye balanga bali Saulo. Alikho asaba.

¹²Ne mu malola Saulo abona omundu lisina liewe bali Anania, engila mukari mala amurakho kamakhono nio ole khubona lundi.”

¹³Anania akobosia ali, “Omwami, babaandu bakali bambooleele ko mundu yuno lundi nauliile bibiindu biibi bioosi nibio akholile khu batakatifu bowo mu Yerusalemu.

¹⁴Luno echile mu Damasika ne bunyali khukhwama khu basaayi bakhulu khuboa babaandu boosi bakhusaayanga ewe.”

¹⁵Ne kakhali Omwami amuboolela ali, “Khoche, sikila namuroboore niye khukhukholela kimilimo, khukhola lisina liase limanyikhane khu Be Chikholo ne khu baami ne khu baandu ba Isiraeli.

¹⁶Ne ese samwene kane mwekesie koosi niko akhoyela anyaasibwe khulwe lisina liase.”

¹⁷Nio Anania acha, engila munju nimwo Saulo aaba, mala amurakho kamakhono ne khuloma ali, “Wandaayase Saulo, Omwami Yesu omwene owakhubonekheele ne oli khu ngila ne wiicha, andumire obone lundi mala wichusibwe Roho Omutakatifu.”

¹⁸Abwene ne abwene bibiindu nga kamabaambu biakwa khukhwama khu moni cha Saulo, nio abona lundi. Enyokha mala abatiisibwa;

¹⁹anyoola kamaani namalile khulia. Saulo aamenya chindaalo ndiiti ne basuubili mu Damasika.

²⁰Aacha mu masinakooki ne khurakikha khukhwilwacha ali Yesu ali Omwana owa Wele.

²¹Boosi babamuulila baraangararwa ne khureebana bali, “Se ali niye no mwene owerirenge abo basaaya omundu Yesu chana mu Yerusalemu? Lundi se echile ano khulwe sifuno sino sisiene ne sisiene, khuaamba babaandu baasaya Yesu abakobosie khu basaayi bakhulu?”

²²Ne kakhaba kario lililwacha lia Saulo liachiililila khuba ne kamaani lukali, ne liliekisia liewe liboola lili Yesu aaba Kristo, liengila mu Bayaudi bamenyile mu Damasika batamba nilio bamukobosia.

²³ Enyuma we chindaalo chingali, Bayaudi babuusiana mala bakhola ekwangwaani khu khwira Saulo,

²⁴ne kakhali aboolelwa ekwangwaani eyo. Baliindanga khu bilibwa bie lukoba kumuusi ne siilo bali bamwire.

²⁵Ne siilo silala, babeeka ba Saulo bamubukula bamura mu muiinda mala bamwepesielia mu mwanya kwe lisiisi lie lukoba.

²⁶Saulo acha mu Yerusalemu mala akhaka khuambaana ne babeeka, ne se basuubila bali luno aabeele omweeka tawe, mala boosi bamuria.

²⁷Ne Baranaba echa abukula Saulo amuyila khu barumwa. Abenooselia nga Saulo aabona Omwami khu ngila, nga Omwami ne alomaloma naye, lundi ababoolela nga Saulo ne elwachile lisina lia Yesu mu bunyindaafu mu Damasika.

²⁸Khukhwama ao Saulo amenya nabo, akeenda mu Yerusalemu mwoosi, ne elwacha mu bunyindaafu mu lisina lio Mwami.

²⁹Alomalomanga ne khukhabiisiana ne Bayaudi babalomanga Lukiriki, nio bakhaka khumwiira.

³⁰Nga basuubili ne bamanya bario, babukula Saulo bamureera e Kaesarea mala bamulekha ache e Tasasi.

³¹Khwako ekanisa mu Yuda mwoosi, Kalilaya, ne Samaria yaba ne siise sie kumuleembe. Khubirira mu buyeeti bwa Roho Omutakatifu, yanyoola kamaani mala yakucha ne khumenya mu buri bwo Mwami.

³²Petero akeenda buli abuundu, ne endaalo ndala aacha khubona babaandu ba Wele bamenyile mu lukoba lwa Lita.

³³Ebweeneyo anyoola omundu owafwokoya, lisina liewe bali Ainea, okhanyalanga khukhwinyokha khu sitanda siewe khu miko munane tawe.

³⁴Petero amuboolela ali, “Ainea, Yesu Kristo aakhuoniisie. Yinyokha mala wale sitanda siowo.” Ao ne nao Ainea enyokha.

³⁵Babaandu boosi ba baamenya mu Lita ne mu Sharoni bamubona, mala bakobolela Omwami.

³⁶Mu Yopa, abao omukhasi lisina bali Tabisa owaba omusuubili, lisina liewe mu Lukiriki bali Dorikasi, sifuno bali “Ekhisi.” Aaba ne bikholwa bilayi bie busiime khu bataambi.

³⁷Siise sienesio Dorikasi alwala mala afwa. Babaandu basiinga kumubili kwewe, bakwalisia mu korofa.

³⁸Yopa ne Lita bili busa siimbi, nga basuubili ne baulila bali Petero ali Lita, baruma babaandu babili khumulaanga, bali, “Nosiima yiicha khangu.”

³⁹Khwako Petero arekukha mala acha nabo. Ne nga olayo, bamuyila mu korofa chana. Banamulekhwa boosi babusiana niio Petero aaba ne balila ne khumwekesia chingubo choosi nicho Dorikasi anabaanga nasiili mulamu.

⁴⁰Petero aabarusia enje boosi. Asikama aasi asaba; mala amubolela ali, “Tabisa, yinyokha!” Tabisa amoka, ne nga ne abona Petero, enyokha ekhala.

⁴¹Petero amwesendao amwinyosia mala alanga basuubili alala ne banamulekhwa chana, mala abaelesia Tabisa nali omulamu.

⁴²Kamakhuwa kano kasalanila buli abuundu mu Yopa, mala babaandu bakali basuubila mu Mwami.

⁴³Petero amenya mu Yopa chindaalo chingali ne Simoni omuali owe kamaafu.