Read lubukusu Bar. 11 Bible Online

Bar. 11 - lubukusu bible

Bar. 11

¹ Nono, ndeeba ndi. Wele aloba babaandu bewe ku? Ng'ali se kali kario tawe! Ese samwene ndi Omuisiraeli, owe lisaaye lia Aburahamu, owe kholo eya Benjamini.

²Wele se aloba babaandu bewe nibo arobora khukhwama mu khurakikha tawe. Mumanyile niko liiandiko liboola, niio Elicha ekongochela Wele khulwe khu sitaka Isiraeli,

³ “Omwami, berire bang'oosi bowo ne khutechulaka alutare chowo. Ese seng'ene niye oramire mala balakhakanga khukhunjira.”

⁴ Wele amukobosia ali siina? “Ndi ne babaandu chielefu saba bakhasaayakho sifwaani sia Baali tawe.”

⁵Kali busa kario akhaba luno. Eliio esaabu ndiiti eye babaandu baramire nibo Wele arobore sikila kumwalaalo kwewe.

⁶Burobosi bwewe se buli khulwe bikholwa biabwe tawe, ne kakhali buli khulwe kumwalaalo kwewe. Sikila abanga bali burobosi bwewe buli khu niko babaandu bakhola, andi kumwalaalo kwewe se kuli ng'ali tawe.

⁷Nono siina? Babaandu ba Isiraeli se banyoola niko bayimanga tawe. Sipupu sitiiti nisio Wele arobora siong'ene nisio sisianyoola. Ne baramire boosi baminyalila kumulaango kwa Wele.

⁸ Nga liiandiko liboola, “Wele akhola kamebaasio kabwe ne kimiooyo kiabwe kialendaala, khukhwola khu ndaalo yino, se banyala babona namwe baulila tawe.”

⁹ Ne Daudi aboola ali, “Bakhoya barekwe ne khutiililwa mu naikara chabwe Bakhoya bakwe, bakhoya baukuumwe,

¹⁰Chimoni chabwe chikhoya chabofula, nio balekhubona tawe, mala bakholwe beunamile mu minaanio kiabwe biise bioosi.”

¹¹Nono, ndeeba ndi. Nga Bayaudi ne betuya bakwa, babunila elala ku? Se kali kario mu ngila yosi yosi tawe! Sikila bakhola bubwoni, buonia bwachile khu Be Chikholo, nio Bayaudi bakhalikhililwe.

¹²Bubwoni bwe Bayaudi bwareera chikhabi che buiinda mu sibala, ne kumutaambo kwabwe kwe mumwoyo kwareera chikhabi che buiinda khu Be Chikholo. Nono, chikhabi chiliba chingali chiriena nga esaabu eye Bayaudi ne ekhechusibwe!

¹³Ndikho luno ndomaloma khwinywe Be Chikholo. Nga ese ne ndi Omurumwa khu Be Chikholo, ndebonia khulwe kimilimo kiase.

¹⁴Wakana nyala nakhola babaandu be kholo yase eng'ene bakhalikhililwa, nio nyale khuoniakho balala khu nibo.

¹⁵Sikila nga Bayaudi balobwa, babaandu boosi bakaluukhasibwa khukhwama mu khuba basiku ba Wele baba basaale bewe. Nono, kaliba kariena nga bafukiililwa? Buliba bulamu khu bafu!

¹⁶Kaaba bali sitonyi sie khunyoa sie kumukaati[2] siianwa khu Wele, aba kumukaati kwoosi kuli kukwewe, ne kaaba bali chiisi che kumurongooro chaanilwe khu Wele, aba akhaba chisakia chosi chili chichewe.

¹⁷Chisakia ndalakho che kumurongooro kumuseituni kumubiaalwa chafuniilwe ne khurusibwakho, ne lusakia lwa Museituni kwe mundaa lwaambaasiibwe khu museituni kumubiaalwa chana. Enywe be Chikholo muli nga kumurongooro kwa museituni kwe mundaa, mala luno mulikho musaanga mu bulamu bwe kamaani bwa roho bwe Bayaudi.

¹⁸Nono, khukhwola mulekhe khulekelesia abo babafunakwa barusibwao nga chisakia. Munyala mwesuunia muriena? Enywe muli busa lusakia, se mutiililila kimili tawe, kimili nikio kimutiililila enywe.

¹⁹Ne ewe olaboola oli, “Yee, chisakia charemwa charurakho khuaana bubweyaangu khwise.”

²⁰Ako kali ng'ali baremwa barusibwakho sikila se basuubila tawe, ne ewe warama mu bweyaangu obwo sikila wasuubila. Ne okheboneselia khu lienelio tawe, ne kakhali ba omuri.

²¹Wele saramia Bayaudi tawe, bali nga chisakia che kumurongooro, ewe wibaasia oli alakhuramia ku?

²²Ano khubona nga Wele nali omulayi ne lundi nga nali omurafu. Ali omurafu khwaabo bakwile, ne omulayi khwiwe waaba nochiililila mu bulayi bwewe. Ne waaba nokhakhola orio tawe, wesi olaremwa.

²³Ne Bayaudi baba ne balekha khusuubila khwabwe, balakalusibwa mu bweyaangu nimwo babamo, sikila Wele anyala khukhola kamene ako.

²⁴Enywe Be Chikholo muli nga lusakia lwe kumuseituni kwe mundaa nilwo baremire mala nono, liaukhana ne liba lia busiele, lwaambaasiibwe khu murongooro kumuseituni kumubiaalwa. Bayaudi bali nga kumurongooro kwa miseituni kumubiaalwa, mala liliba liliangu lukali khu Wele khuambaasia chisakia chicharemwa chino khu murongooro kwacho lundi.

²⁵Bawandaayase, buliio bung'ali bubwakukhuulilwa nibwo nenya mumanye, sikila bulamuliinda mukhakhola murio mweyibaasia nga muli bakesi tawe. Sileka sie babaandu ba Isiraeli se silibao buli lwoosi tawe. Siliio khukhwola nga esaabu eye Be Chikholo eyolaana eliicha khu Wele.

²⁶ Ne abwenao Baisiraeli boosi balionisibwa nga liiandiko ne liboola, “Omuonia aliama Sayuni, mala arusieo bumayaanu bwoosi, khukhwama mu be lisaaye lia Yakobo.

²⁷ Ndikhola endakaano yino nabo nga ne ndirusiao bubwoni bwabwe.”

²⁸Sikila baloba Elomo Endayi. Bayaudi bali basiku ba Wele, khu bulayi bwenywe Be Chikholo. Ne kakhali sikila burobosi bwa Wele, bali basaale bewe sikila bakuuka babwe.

²⁹Sikila Wele sakaluukhasianga kamebaasio kewe khulwo oyo niye arobora ne khubiita chikhabi tawe.

³⁰Ne khwinywe Be Chikholo, mu ndaalo chichabira mwaba mukharia Wele tawe, ne luno mwanyoolile siisa sia Wele sikila sileka sie Bayaudi.

³¹Mu ngila neng'ene, sikila siisa nisio mwanyoolile, Bayaudi luno se baria Wele tawe, nio akhaba boosi luno boole khunyoola siisa sia Wele.

³²Sikila Wele akholile babaandu boosi baboe be sileka, nio ekesie siisa khu nibo boosi.

³³ Buiinda bwa Wele buli bukali buriena! Limanya liewe ne bukesi bwewe buli bwe angaaki lukali buriena! Naanu onyala khwinoosia niko abisiisie? Naanu onyala wamanyilisia chingila chewe?

³⁴ Nga liiandiko ne liboola lili, “Naanu omanyile kamebaasio ko Mwami? Naanu onyala amukaambila?

³⁵ Naanu owamuelesiakho sisiindu siosi siosi, nio ekhumaliilikha amuruunge?”

³⁶ Sikila bibiindu bioosi biabaang'anwa ne naye, ne bibiindu bioosi bimenyela khubirira mu niye ne khulwa niye luyali lube khu Wele mindali! Amina.