Read lubukusu Bar. 13 Bible Online

Bar. 13 - lubukusu bible

Bar. 13

¹Buli mundu khukhwola arie be bunyali mu serekari, sikila bunyali se bunyala bwabao ne bukhamile khu Wele tawe, ne bunyali buliio, bwareebwao ne Wele.

²Omundu yesi yesi oyingania bunyali buliio ayingania niko Wele arobobore, ne omundu yesi yesi okhola ario ereerera omwene likhalakilwa.

³Sikila bakhola kamalayi se baria babaami tawe, ne kakhali bakhola kamamayaanu nibo baria. Wenya olekhe khuba ne buuri khu baami? Nono, khola kali kamalayi, mala balakhufumia,

⁴sikila bali bakholi ba Wele bakhola kimilimo nio ewe obe bulayi. Ne waaba nokhola kamamayaanu, barie sikila bunyali bwabwe bwe khuaana khuukuuma buli ng'ali. Bali bakholi ba Wele mala baananga siiukuumo sia Wele khwaabo bakholanga kamamayaanu.

⁵Khulwe sifuno sino khukhwola murie be bunyali. Ne semuria busa sikila siiukuumo sia Wele tawe, ne kakhali muria khulwe khuba ne kumuleembe mu mebaasio ke mu miooyo kienywe.

⁶ Elio nilio likila ne muruunganga busuuru, sikila babaami be bunyali balikho bakholela Wele kimilimo nga ne balikho ne bakhola kimilimo kiabwe.

⁷Baruunge nibio benya, yeruungila wamwene ne kimiaandu kiowo mala wekesie buriaani khu nibo boosi.

⁸Mukhaba ne likobi liosi liosi khu mundu tawe, nekhali mube ne likobi lie khusiimana buli mundu ne owasie. Omundu yesi yesi okholanga ario aria Lilaka.

⁹ Kamalaka, “Okhakhola bueeyi tawe, okhera tawe, okheba tawe, okhekoomba sio wasio tawe” kano koosi, ne kakaandi kosi kosi kali alala nako, katasibwa alala mala kaba Lilaka lilala, “Siima owasio nga ne wesiima wamweene.”

¹⁰Waaba nosiima omundu yesi yesi, sonyala wamukholela kamabi tawe, nono, khuli khuria Lilaka lioosi khuli khusiima.

¹¹Khukhwola mukhole lino, sikila manya muli siise siamwolilekho khu sisimukha khukhwama mwilo lienywe. Sikila siise sie khuonisibwa khwefwe sili siimbi luno khukhila nga mataayi ne khwasuubila lwe khunyoa.

¹²Silo sili siimbi khuwao, kumuusi kuli siimbi ano. Khekhwakame khukhola bibiindu bie sisiilima, mala khubukule bulwaani bwe khukhupanila mu buwaanga.

¹³Likeenda liefwe libe lilayi, nga babaandu bamenyile mu buwaanga bwe kumuusi, likhabao lilia lie sifwaabi namwe bumeesi tawe, sifwaabi namwe liba libi, khu khuupana namwe khukhalikhililwa tawe.

¹⁴Ne kakhali bukula bulwaani bwo Mwami Yesu Kristo, mala mukharekeeresia ke liba lienywe lie bubwoni ne khukhola ke liliekoomba lialio tawe.