Read lubukusu Bar. 15 Bible Online

Bar. 15 - lubukusu bible

Bar. 15

¹Efwe khuli be kamaani mu lisuubila khwolaana khuyeete batekhele khulwe khubukula busiro bwabwe. Khukhesiimisia fwabeene tawe.

²Ne kakhali, fweesi khwolaana khusiimisie bawandaayefwe khulwe bulayi bwabwe, babeene nio khwole khubombakha mu lisuubila.

³ Sikila Kristo se esiimisia omwene tawe. Ne kakhali nga liiandiko liboolanga lili, “Bukhomo nibwo bakhukhoma ewe bwakwa khwise.”

⁴Buli sisiindu sisiaandikwa mu maandiko siaandikwa khukhwikisia efwe, nio khwolaane khuba ne lilieyikina khubirira mu lifwiilisia ne khuramo kumwoyo nibio kamaandiko kaananga.

⁵Ne Wele niye, liliefwiilisia ne khuramo kumwoyo biamangakho, amukhole enywe mube ne buambaani khu mwabeene ne mwabeene khulwe khuloonda likhola lia Kristo Yesu,

⁶nio enywe mweesi alala mwole khufumia Wele lundi Paapa owo Mwami wefwe Yesu Kristo ne kumumilo mulala.

⁷Nono, yakaanilana mwabeene ne mwabeene, khulwe luyali lwa Wele, nga Kristo amwakaanile enywe.

⁸Sikila muboolela ndi bulamu bwe bukholi bwa Kristo bwaba khulwe Bayaudi, khukhwekesia khuli Wele ali omusuubilwa, khukhola lisuubisia liewe khu bakuuka babwe libe ng'ali,

⁹ ne khukhola akhaba Be Chikholo banyale khufumia Wele khulwe siisa siewe. Nga liiandiko liboolanga lili, “Nono khakhufumie ewe mu Be Chikholo.” Ndimba efuma eye lisina liowo.

¹⁰ Lundi liiandiko liboola lili, “Yekhoya, Be Chikholo, ne babaandu ba Wele!”

¹¹ Lundi “Fumia Omwami Wele, Be Chikholo boosi, babaandu mwesi mufumie!”

¹² Ne lundi, Isaya aboola ali, “Owe lisaaye lia Chesi alicha, alicha khukhwamiia Be Chikholo, mala balimweyikina.”

¹³Wele niye lilieyikina liakukhakho oole khumwichusia enywe ne kumwikhoyo kwoosi ne kumuleembe khubirira mu lisuubila lienywe mu niye, nio lilieyikina lienywe lichiililile khuchoa khulwe bunyali bwa Roho Omutakatifu.

¹⁴Bawandaayase. Ese samwene ne ulila ng'ali ndi enywe muli ne bulayi bukali, ndi muli ne bukesi bwoosi, mala mwabeene munyala khukhwekisiana.

¹⁵Ne mu barwa yino nabeele ne bunyindaafu khulwe kamakhuwa nabulebe niko mukhebusie enywe. Nabeele omunyindaafu sikila bubweyaangu nibwo Wele ambelesie

¹⁶khulwe khuba omukholi owa Yesu Kristo khukholela Be Chikholo. Khola nga omusaayi mu khwilwacha Elomo Endayi khukhwama khu Wele, nio Be Chikholo boole khuba siianwa sifukiililwa khu Wele, sisiianwa khu niye ne Roho Omutakatifu.

¹⁷Nono, mu buambaani ne Yesu Kristo, nyala nesuunia khulwe bukholi bwase khulwa Wele.

¹⁸Ndaba Omunyindaafu mala ndomalome khu niko Kristo akholile kong'ene khubirira mwise khukhola Be Chikholo barie Wele. Akholile kano khubirira mu makhuwa ne bikholwa,

¹⁹khulwe bunyali bwe kamaya nende ke khuukia, ne khulwe bunyali bwa Roho owa Wele. Nono, khu lukeendo lwoosi khukhwama Yerusalemu khukhwola Iluriko, nelwachile elala Elomo Endayi khu Kristo.

²⁰Silukuluku siase buli lwoosi sibechanga khukhwilwacha Elomo Endayi abuundu niio bakhaulilakho Kristo tawe, nio khakholandio nombakha khu musiingi nikwo omundu okundi ombakha tawe.

²¹ Nga liiandiko ne liboolanga lili, “Abo nibo bakhaboolela kakewe tawe, balibona, ne abo bakhaulila tawe balimanyilisia.”

²² Khwako nakhiingililwa biise bikali khumukeniia enywe.

²³Ne luno nga ne malile kimilimo kiase mungoongo chino lundi nga nama khwenyanga khulwe kimiiko kimikali niche mubone enywe,

²⁴neyikina khukhola ndio luno. Nenya khumubona enywe nendi khu lukeendo lwe khucha Sipeini, mala nenya munjeete nje eyo, enyuma we khukhwekhoyela khumubona enywe khulwe siise.

²⁵ Ne luno luri, ndikho nja Yerusalemu mu bukholi bwe babaandu ba Wele ebweeneyo.

²⁶Sikila mu bulekhuule chikanisa mu Masedonia ne Akaya chabisia khuaana siianwa khuyeeta bataambi mu baandu ba Wele mu Yerusalemu.

²⁷ Libisia elio liaba liliabwe babeene, ne, khulwa ng'ali, bakhoyela babayeeta nibo. Sikila Bayaudi basaanga mu khabi chabwe cha Roho nende Be Chikholo. Be Chikholo bolaana khurumikhira chikhabi che kimiaandu khuyeeta Bayaudi.

²⁸Nga ne khamale kimilimo kino mala mbaelesie chirupia choosi chiaanibwe khu nibo, kharakikhe lukeendo lwe khucha Sipeini ne khamukeniye enywe nendi khu lukeendo lwenolu.

²⁹Nga nekheche khwinywe, manyile ndi kheche ne sikelo sisichufu sie chikhabi cha Kristo.

³⁰Bawandaayase ese muchuuba enywe, khulwo Mwami wefwe Yesu Kristo ne khulwe busiime nibwo Roho aananga. Ambaana ne nase khusabe ne kumwoyo kwoosi khu Wele, sikila ese.

³¹Saba muli ndindwe bulayi khukhwama khu bakhasuubila tawe, bali mu Buyuda mala bukholi bwase mu Yerusalemu bwoole khufukiililwa ne babaandu ba Wele ebweeneyo.

³²Ne kheche khwinywe mu bwichufu bwe kumwikhoyo, liaba ne lili lilienya lia Wele, mala nekhoye khuolela mu bukeni ewenywe.

³³Wele, niye kumuleembe kwefwe kwamakho, ole khuba alala ne nanywe mwesi. Amina.