Read lubukusu Bar. 16 Bible Online

Bar. 16 - lubukusu bible

Bar. 16

¹Siima khumuboolela ndi yaaya Fwepe okholelanga e kanisa eya Senjirea ali omulayi.

²Mwakaanile mu lisina lio Mwami, nga babaandu ba Wele bakhoyeela khukhola, mala mu muelesie buyeeti bwosi bwosi nibwo wakana enya khukhwama khwinywe, sikila niye omwene abeele omusaale omulayi khu baandu bakali akhaba khwise sesi.

³ Kheesia Pirisila ne Akwila, bakholi basiaase mu bukholi bwa Yesu Kristo,

⁴beana bulamu bwabwe embi khufwa sikila ese. Mbapila orio lukali po, ne sendi seng'ene tawe, akhaba chikanisa che Be Chikholo choosi.

⁵Kheesia akhaba e kanisa eyakaananilanga munju mwabwe. Kheesia omusaale wase omukoosi Painito, owaba omundu we khunyoa mungoongo cha Esia khu suubila mu Kristo.

⁶Kheesia Maria, omukholeele enywe kimilimo ne kamaani.

⁷Kheesia akhaba Androniko ne Yunia, Bayaudi basiaase ba baaba mu siboe alala ne nase, bamanyikhana lukali mu barumwa, lundi nibo baba bakristo ebweeni wase ese ne khaba tawe.

⁸Kimileembe kiase kiolele Ambiliato, omusaale wase omukoosi mu busaanganilo bwo Mwami.

⁹Kheesia akhaba Uribano, yesi omukholi wasiefwe mu bukholi bwa Kristo, ne kheesia akhaba Sitakisi, omusaale wase omukoosi.

¹⁰Kheesia Apele, niye buriaani bwewe khu Kristo bufukiililwe. Kheesia be nju eya Arisitobulo.

¹¹Kheesia Herotioni, Omuyuda wasiefwe, ne bawandaayefwe bakristo be nju eya Narikiso.

¹²Kheselie Trufena ne Trufosa, bakholanga kimilimo kio Mwami, ne lundi kheesia omusaale wase omukoosi Perisisi, okholile kimilimo kimikali po, khu lwo Mwami.

¹³ Nduma kimileembe khu Rufo, omukholi owamanyikhana oyo mu bukholi bwo Mwami, ne khu maawe, oumbukulanga ese buli lwosi nga omwana wewe.

¹⁴Kheesia Asingirito, Fulekoni, Herimesi, Patiropa, Harima ne bawandaayefwe bakristo babaandi boosi bali nabo.

¹⁵Kimileembe khu Fulolokasi ne Chulia, khu Nerea no mukooko wewe, khu Olimba ne khu baandu ba Wele boosi nibo bali nabo.

¹⁶Khesiana mwabeene ne mwabeene mu khwekwayilana. Chikanisa cha Kristo choosi chamukheesiisie.

¹⁷Bawandaayase, muchuuba ndi loleelesia abo bareera liliabukhana ne babonaka lisuubila lie babaandu ne khukhwonaka kamekisio niko mwanyoolile. Yaukhana ne nabo!

¹⁸Sikila abo bakholanga bibiindu nga ebio birio se balikho bakholela Omwami wefwe Kristo tawe, nekhali kumuluungo kwabwe babeene. Batiimia babaandu baluungi khulwe kamakhuwa kabwe kamalayi ne lilomaloma liabwe lie khuombelesia.

¹⁹Buli mundu auliile buriaani bwenywe khu Lomo Endayi, ne khulwe sifuno sino ese namusangaaliile. Nenya mube ne limanya khu kali kamalayi, mala mube mukhamanyile koosi kali kamamayaanu tawe.

²⁰Ne embi ari Wele, niye kumuleembe kwefwe kwamakho alatubundulakila Sietani mu bikele bienywe. Kumwalaalo kwo Mwami Yesu kube ne nanywe.

²¹ Timoteo, omukholi wasiaase, amurumiire kimileembe kiewe, ne akhaba Lusia, Chasoni ne Sosipateri Bayaudi basiaase bosi bamukheesia.

²²Ese, Taritio, omuandiki we barwa yino, namurumiire kimileembe kia Kristo.

²³ Kayo owanjakanila omwenenju niyo e kanisa yakaananilangamo, amurumira kimileembe kiewe. Rasito, omubiikhi we chirupia che Lukoba luno, ne wandaayefwe Kwarito bamurumira kimileembe kiabwe. [

²⁴Kumwalaalo kwo Omwami wefwe Kristo kube nanywe mwesi. Amina.]

²⁵Khekhuelesie Wele luyali! Anyala khumukhola enywe mwatinya mu lisuubila lienywe, khuloondekhana ne Elomo Endayi eya Yesu Kristo niyo nilwacha ne khuloondekhana khu lifuunula lie bung'ali bubwakukhuulilwa mu mase kamakali kakabira.

²⁶Luno, bung'ali obwo bwarerirwe abuwaanga khubirira mu maandiko ke bang'oosi, lundi bwakholiibwe khumanyikha khu kholo choosi, khulwe Lilaka lia Wele owa mindali nio boosi boole khusuubila ne khuria.

²⁷Khu Wele ooli yeng'ene, oli we limanya khu bioosi abe ne luyali khubirira mu Yesu Kristo mindali na mindali! Amina.