Read lubukusu Bar. 2 Bible Online

Bar. 2 - lubukusu bible

Bar. 2

¹ Musaale, ewe okhalakilanga babaandu? Akhaba ne oli naanu se oli ne sifuno sikila webacha khukhalakilwa tawe. Sikila nga ewe ne okhalakilanga babaandi mala enyuma okhola bibiindu bibieene ne bibieene nibio nibo bakholanga, wikhalakilanga wamwene.

²Khumanyile khuli Wele ali omuluungi nga akhalakilanga babaandu bakholanga bibiindu nga bino birio.

³Ne ewe, musaale, okhola bibiindu nibio okhalakilangakho babaandi! Ewe wibaasia oli olebacha likhalaka lia Wele ku?

⁴Namwe wakana ewe olekelesianga bulayi bwewe buli buboofu, liliekhaliilikha, ne liliefwiilisia liewe. Ng'ali omanyile oli Wele ali omulayi, sikila alikho akhaka khukhureera mu bweyaangu khukhwikanila.

⁵Ne kakhali oli ne kumwoyo kumuandalafu lundi kwe sikakhanyafu, aba nono olikho wereerera wamwene siiukuumo sili siboofu khu Ndaalo niyo lirima lia Wele ne bukhalaki buluungi bulibuulikha.

⁶ Sikila Wele aliaana kumuruuru khu buli mundu khuloondekhana nende niko akholile.

⁷Baandu balala bachiililila khukhola kamalayi, mala baenja luyali, lukoosi, ne bulamu buliio mindali, khu nibo Wele alabaelesia bulamu bwa mindali na mindali.

⁸Babaandu babaandi bali be khukhweyenyela lundi baloba kali kamaluungi mala baloonda kali kamakhiikha, lirima lia Wele ne bukhalafu bwewe bilababaakho.

⁹Siiukuumo ne buchuuni bilabaao khulwa boosi bakholanga kamamayaanu, khunyoela khu Bayaudi nio akhaba khu Bakiriki bosi.

¹⁰Ne kakhali Wele alaana luyali, lukoosi, ne kumuleembe khwaabo boosi bakholanga kamalayi, khunyoela, khu Bayaudi ne akhaba khu Bakiriki bosi.

¹¹ Sikila Wele arumikhira sikelo silala khukhalakila buli mundu.

¹²Be Chikholo se bali ne Lilaka lia Musa tawe, bakhola bubwoni mala batiba bakhatamba Lilaka. Bayaudi bali ne Lilaka, bakhola bubwoni mala bakhalakilwa ne nalio.

¹³Sikila babaandu se baluungisibwa ne Wele khulwe khuulila lilaka tawe, ne kakhali khulwe khukhola niko lilaka lilakiilisia.

¹⁴Be Chikholo se bali ne Lilaka tawe, ne bakhebulilanga busa bakholile niko Lilaka lilakiilisianga, khukhola khurio khuli lilaka liabwe, akhaba ne bakhali ne lilaka tawe.

¹⁵Liba liabwe lino liekesia lili, bibiindu nibio lilaka lilakiilisianga, biaandikwa mu miooyo kiabwe. Liba liabwe lie kamebaasio ke mu miooyo liosi liekesia lili, kano kali ng'ali, sikila mu biise bilala kamebaasio kabekesia kamabi kabwe ne biise bibiindi kabaambila engubo.

¹⁶Nono khuloondekhana ne Elomo Endayi niyo nilwacha, kaliba kario khu ndaalo eyo nga Wele khubirira mu Yesu Kristo alikhalakila kamebaasio ke mu bwikisi ke babaandu boosi.

¹⁷Ne ewe nawe? Welanga oli ewe oli Omuyuda, wayiamba khu Lilaka mala webonia khulwa Wele,

¹⁸omanyile nisio wele enya okhole, mala Lilaka liakhwikisia khurobora siili siluungi.

¹⁹Oli na ng'ali, oli oli omurangilisi owe babofu, lundi buwaanga khwaabo baali mu siilima,

²⁰omwekisia khulwe basilu, lundi omwekisia, owa abo bakhamanyile siindu tawe. Oli na ng'ali oli oli ne bukesi ne bung'ali mu bwichufu khukhwama mu Lilaka.

²¹Wekisianga babaandi, siina sikila nokheyika wamwene? Wilwacha oli, “Okheeba tawe” ne ewe wamwene wiibanga?

²²Oboola oli, “Okhakhola bueeyi tawe” ne ewe wamwene okhola bueeyi? Ewe wabiila bifwaani ne ewe wamwene onuula mu chingaangu?

²³Wibonia khulwe khuba ne lilaka lia Wele, ne oreeranga chisoni khu Wele khulwe khufunaka lilaka liewe?

²⁴ Liiandiko liboola lili, “Be Chikholo bakholela embelekeu lisina lia Wele sikila enywe!”

²⁵Waaba ne oria Lilaka lia Wele, aba likhebwa liowo lili lie bukhala, ne waaba nokharia Lilaka tawe, bwakhabeele bulayi andi se wakhebwa tawe.

²⁶Aaba bali owe Chikholo, okhakhebwa tawe, aria lilakiilisia lie Lilaka, aba Wele salamubukula busa nga owakhebwa ta ku?

²⁷Khwako enywe Bayaudi mulikhalakilwa nende Be Chikholo sikila mu funakanga Lilaka, mwakhaba ne muli nalio mu buandike, mala lundi mwakhebwa, nibo baria Lilaka, akhaba mu mibili ne bakhakhebwa tawe.

²⁸Ne kakhaba kario naanu niye Omuyuda owa ng'ali, owakhebwa mu bung'ali? Se ali Omuyuda wenje busa, niye likhebwa liewe lili lie mu mubili busa tawe.

²⁹ Omuyuda owa ng'ali ali omundu oli Omuyuda mukari, niye kumwoyo kwewe kukhebilwe, mala kino kili kimilimo kia Roho owa Wele, se kili kie Lilaka liliaandikwa tawe. Omundu nga oyo anyoolanga efuma yewe khukhwama khu Wele, ne seli khukhwama khu mundu tawe.