Read lubukusu Bar. 3 Bible Online

Bar. 3 - lubukusu bible

Bar. 3

¹Siina nono nisio Bayaudi bakhililakho Chikholo? Namwe bukhala bwosi bwosi bulikhoo mukhukhebwa ku?

²Ng'ali buliio bukali! Mu khunyoa, Wele aelesia Bayaudi burume bwewe.

³Ne, balala khu nibo baba ne bakhaba basuubilwa tawe? Lino liboola lili aba Wele se ali omusuubilwa tawe?

⁴ Se kali kario tawe! Khukhwola Wele abe wa ng'ali akhaba, buli mundu nali omubeeyi. Nga liiandiko ne liboolanga lili, “Ewe ne olomaloma weyekesia khuuba owe bung'ali. Ne oyaalwa okhila kumusaango.”

⁵Ne kakhali aaba bali bumayaanu bwefwe nibwo bubwekesia bung'ali bwa Wele, aba nono khuloma khuli siina? Khuloma khuli Wele se ali ng'ali khura lirima liewe khwifwe ku? (Ndomaloma kano mungila eye liba lio mundu.)

⁶Se kali kario mu ngila yosi yosi tawe! Wele anyala ariena khukhalakila sibala kaaba bali se ali owa ng'ali tawe?

⁷Ne bubeeyi bwase ne bureera luyali lwa Wele khulwe khukhola bung'ali bwewe bubonekhane abuwaanga, siina sikila ne sikhalakilwa nga omwoni?

⁸Nono siina sikila ne khaboola ndi, khekhukhole kamamayaanu nio kamalayi koole khukhwicha? Ng'ali babaandu balala basitakile ese khulwe khuboola sisiindu sino mala bwaba bukhomo khwise! Bakhakhalakilwe nga ne benyekha.

⁹Nono efwe Bayaudi khulikho bulayi mu ngila yosi yosi khukhila Bakiriki ku? Se kali kario tawe! Nekesie khaale ndi Bayaudi nende Be Chikholo bafwaanana, boosi bali aasi we bunyali bwe bubwoni.

¹⁰ Nga ne liaandikwa lili, “Se aliio oli omuluungi tawe

¹¹Se aliio oli omukesi tawe, namwe osaayanga Wele tawe.

¹²Boosi bayaukha khu Wele; boosi bayikhiikha; se aliio na mulala okholanga kali kamaluungi tawe, se aliio akhaba na mulala yeng'ene tawe.

¹³ Kamakhuwa kabwe kayichula bubacha bwe lifwa, chinimi chabwe chechula bukhiikha, ne khurikhirisila butinyu, nga buchiba bwe ndemu, khukhwama muminwa kiabwe.

¹⁴ Lilaama lirafu liayichula mu lilomaloma liabwe.

¹⁵ Bikele biabwe bili khangu khuchukha sifuki.

¹⁶Buli oosi niio bacha, balekha libunia ne lilionaka.

¹⁷Se bamanyile engila eye kumuleembe tawe,

¹⁸ namwe se bayeyika khuria Wele tawe.”

¹⁹Luno khwamanyile khuli buli siindu mu Lilaka sili khwaabo bamenyile aasi we Lilaka nio bifuno bioosi bioosi nibio omundu eambilakho birusibweo mala sibala sioosi siche aasi we likhalaka lia Wele.

²⁰ Sikila se aliio omundu omuluungi na mulala mumoni cha Wele khulwe khukhola niko Lilaka lienyanga tawe, nisio Lilaka likholanga sili khukhola omundu amanye ali akholile bubwoni.

²¹Ne luno engila eya Wele eye khukhola babaandu babe baluungi khu mwene yamalile khufunulwa. Seli ne sisiindu siosi siosi khu Lilaka tawe, akhaba Lilaka lia Musa ne bang'oosi ne baana buloli bwabwe khu nilio.

²² Wele akhola baandu khuba baluungi khubirira mu lisuubila liabwe mu Yesu Kristo. Wele akholanga kano khwaabo boosi basuubila mu Kristo, sikila se buliio bubwaukhani bwosi bwosi tawe,

²³sikila baandu boosi bakhola bubwoni, mala bali aleeyi khukhwama khu luyali lwa Wele.

²⁴Ne khulwe siianwa sia busa sie kumwalaalo kwa Wele, boosi bakholwa baluungi naye khubirira mu Yesu Kristo obakholanga babe balekhuule.

²⁵Wele aana Yesu nio, khulwe lifwa liewe ole khuba engila niyo bubwoni bwe babaandu bubeelwakho khubirira mu lisuubila liabwe mu niye. Wele akhola kano nio okesie ali, ali Omuluungi. Khaale aba owefwiilisia ne saloleelesianga bubwoni bwe babaandu tawe.

²⁶Ne mu biise bia luno nio okesie buluungi bwewe salekha busa bubwoni tawe. Mu ngila yino Wele eyekesianga ali, ali Omuluungi lundi akhola buli sia mulala osuubila mu Yesu khuba omuluungi.

²⁷Nono, aba efwe sikila khwebonie siina? Siindu tawe! Ne sifuno sia kano sili siina? Kali bali khurichanga lilaka ku? Se kali kario tawe, lili busa lisuubila.

²⁸Sikila khutabusia khuli Omundu akholwa Omuluungi ne Wele khubirira mu lisuubila liong'ene, ne se khuli khulwe khukhola niko Lilaka lilakiilisianga tawe.

²⁹Namwe Wele ali Wele we Bayaudi bong'ene? Se ali Wele owe Be Chikholo choosi ta ku? Ng'ali ali ario.

³⁰ Wele ali mulala, mala alikhola Bayaudi babe baluungi ne naye omwene khulwe lisuubila liabwe, lundi alikhola Be Chikholo babe baluungi khubirira mu lisuubila liabwe.

³¹Aba lino liboola lili khulwe lisuubila khurusiao Lilaka ku? Se kali kario tawe, ne kakhali khuliinda Lilaka.