Read lubukusu Bar. 5 Bible Online

Bar. 5 - lubukusu bible

Bar. 5

¹Luno khwakholebwe khuba baluungi ne Wele khubirira mu lisuubila, khuli ne kumuleembe ne Wele khubirira mu Mwami wefwe Yesu Kristo.

²Khubirira mu niye khwanyolile engila eye khukhwolela kumwalaalo kuno nikwo khwimamo. Ne khwekhoya khulwe lilieyikina liefwe nilio khuli nalio lie khusaanga mu luyali lwa Wele!

³Ne khwekhoya lukali mu binyaasio biefwe, sikila khumanyile khuli binyaasio bisasiaanga liliekhaliilikha,

⁴liliekhaliilikha lisasiaanga liba ne liba lisaasia lilieyikina.

⁵Lilieyikina lino se likhukhalasia efwe tawe, sikila Wele achukhile busiime bwewe mu miooyo kiefwe mu ngila eya Roho Omutakatifu, oli siianwa sia Wele khwifwe.

⁶Sikila nga khwaba ne khusiili batekhele, Kristo afwila bakhiikha mu siise nisio Wele arobora.

⁷Sili sisiindu siaandalafu khu mundu khufwila omundu omuluungi. Ne kanyala kaba mbo omundu anyala ekhiinda khufwa khulwo omundu omulayi.

⁸Ne Wele akhwekesie efwe nga ne akhusiima lukali, lili nga ne khwaba ne khusiili babooni Kristo akhufwila!

⁹Khulwe kamafuki kewe, akhukholile khwabele baluungi ne Wele, Kristo alakhuonia lukali khukhwama khu lirima lia Wele!

¹⁰Khwaba basiku ba Wele, mala akhukhola basaale bewe khubirira mu lifwa lio Mwana wewe. Luno nga ne khuli basaale ba Wele, aba khulaonisibwa lukali khulwe bulamu bwa Kristo!

¹¹Ne se kali kamenako kong'ene tawe, khwekhoya khu niko Wele akholile khubirira mu Mwami wefwe Yesu Kristo, okhukholile efwe luno khuba basaale ba Wele.

¹² Bubwoni bwecha mu sibala khubirira mu mundu mulala, mala bubwoni bwewe bwareera lifwa. Ne sikila kamenako, lifwa liasalanila mu baandu boosi, sikila buli mundu akholile bubwoni.

¹³Bubwoni bwaba mu sibala Lilaka ne likhaanwa tawe, ne bubwoni se bubalikhanga niio Lilaka likhali tawe.

¹⁴Ne khukhwama mu siise sia Adamu khukhwola khu siise sia Musa lifwa liamiia khu baandu boosi, akhaba khwaabo bakhakhola bubwoni mu ngila nga niyo Adamu akholelamo mukhulekha khuria lilakiilisia lia Wele tawe. Adamu aba sisiiniini sioyo olikho owicha.

¹⁵Ne babili chana se bafwaanana tawe, sikila siianwa sia busa sia Wele se silekhaana ne bubwoni bwa Adamu tawe, kali ng'ali bali babaandu bakali bafwa sikila bubwoni bwo mundu mulala oyo. Ne kumwalaalo kwa Wele kuli kumukali khukhila, ne sili siianwa siewe sia busa khu baandu bakali khubirira mu mwalaalo kwo Mundu mulala chana oyo, Yesu Kristo.

¹⁶Ne bubwabukhani buliio akari we siianwa sia Wele ne bubwoni bwo mundu mulala chana. Enyuma we bubwoni bulala obwo, likhalaka lie khuboola mbo “Bali ne kumusaango,” ne ekhumaliilikha we bubwoni bukali, siicha siianwa nisio omundu akhakhoyeela khunyoola tawe “Bali kumusaango mbao!”

¹⁷Kali ng'ali khubirira mu bwoni bwo mundu mulala lifwa liarakikha khukhwamiia sikila Omundu mulala oyo. Ne kamakobosio kali kamaboofu lukali ke kumulimo kwo mundu mulala, Yesu Kristo! Abo boosi banyoola kumwalaalo kwa Wele mu bukali ne khukholebwa baluungi ne naye, bakhamiie mu bulamu khubirira mu Kristo.

¹⁸Nono, nga bubwoni bulala obwo bwakhalakila babaandu boosi, mu ngila ng'eneyo sikholwa silala siluungi sikhola babaandu boosi baba balekhuule, mala sibaelesia bulamu.

¹⁹Ne nga babaandu boosi ne bakholwa babooni khulwe khulekha khuria lilakiilisia lio mundu mulala, mu ngila ng'eneyo boosi bakholebwa baluungi khulwe buriaani bwo Mundu mulala Yesu Kristo.

²⁰Lilaka liarebwao, nio khukhola kamabi khutasikhe, ne niio bubwoni bwatasikha, kumwalaalo kwa Wele kwatasikha lukali khukhila.

²¹Nono, nga bubwoni ne bwamiia khubirira mu lifwa, kumwalaalo kwa Wele kwamiia khubirira mu buluungi, ne bukhurangilira efwe khucha mu bulamu bwa mindali khubirira mu Yesu Kristo Omwami wefwe.