Read lubukusu Bar. 6 Bible Online

Bar. 6 - lubukusu bible

Bar. 6

¹Nono khuboole khuli siina? Khuchiililile khumenya mu bwoni nio kumwalaalo kwa Wele kutasikhe?

²Ng'ali se kali kario tawe! Efwe khwafwa khu bwoni khunyala nono khwachiililila khubumenyamo khuriena?

³Sikila ng'ali mumanyile muli nga ne khwabatiisibwa mu buambaani ne Yesu Kristo, khwabatiisibwa mu buambaani ne lifwa liewe.

⁴ Nono, khulwe libatiisibwa liefwe, khwasiikhwa ne naye mala khwasaanga mu lifwa liewe, nio bulayi bwene nga Kristo alamusibwa khukhwama mu lifwa khulwe bunyali bwe luyali lwa Paapa, nio akhaba efwe fwesi khwole khumenya bulamu buyia.

⁵Sikila khwekela mulala ne naye mu lifwa nga niye ne afwa, mu ngila eyo khuliba nga omundu mulala ne naye khulwe khulamusibwa khube ne bulamu nga niye ne alamusibwa.

⁶Ne khumanyile khuli liba liefwe likhaale lieriirwe ne Kristo khu musalaba kwewe, nio bunyali bwe kumubili kwe bubwoni bwonakwe, mala khukhabakho lundi barumwa be bubwoni tawe.

⁷Sikila nga omundu ne afwa aba akholiilwe omulekhuule khukhwama mu bunyali bwe bubwoni.

⁸Ne sikila khwafwiile ne Kristo khusuubila khuli akhaba fwesi khukhamenye naye.

⁹Sikila khumanyile khuli Kristo alamusibwe khukhwama mu lifwa ne salifwa lundi tawe, mala lifwa se lilimwamiakho lundi tawe.

¹⁰Nono, sikila afwa, bubwoni se buli ne bunyali khu niye tawe, mala luno amenyanga bulamu bwewe mu busaanganilo ne Wele.

¹¹Mu ngila ng'eneyo, mukhoyela mweyibaasie mwabeene nga bafu, khuloondekhana ne bubwoni nga buli, mala mumenye mu busaanganilo ne Wele khubirira mu Yesu Kristo.

¹²Bubwoni bukheecha bwamiia lundi mu mibili kienywe nio murie liliekoomba lie liba lienywe lie khukhweyenyela tawe.

¹³Namwe khukhwola mukhaanakho sitonyi sienywe siosi siosi khu bwoni sirumikhirwe khulwe bifuno bie bumayaanu ne bubwoni tawe. Ne kakhali, khemwiaane mwabeene khu Wele, nga balamusibwe khukhwama mu lifwa khucha mu bulamu, mala mwiaane mwabene mu bwichufu khu niye khulwe khurumikhirwa khulwe bifuno biluungi.

¹⁴Khukhwola bubwoni bukhaba omwami wenywe tawe, sikila se mumenyile aasi we Lilaka tawe, ne kakhali mu menyile aasi we kumwalaalo kwa Wele.

¹⁵Nono, siina? Khukhole bubwoni sikila se khuli aasi we Lilaka tawe, ne kakhali khuli aasi we kumwalaalo kwa Wele? Se kali kario tawe!

¹⁶Ng'ali mu manyile muli ne mwiaana mwabeene nga nasioobi khuria omundu okundi, aba ng'ali muli busa nasioobi bo mwami niye muria oyo, bunyala bwaba bubwoni, bureera, lifwa, namwe buriaani bukhola mwaba baluungi ne Wele.

¹⁷Ne orio echa khu Wele! Sikila akhaba a siise silala ne mwaba nasioobi khu bwoni, mwaria ne kumwoyo kwenywe kwoosi bung'ali bunyoolekha mu mekisio niko mwanyoola.

¹⁸Mwakholwa balekhuule khukhwama khu bwoni mala mwekela nasioobi be buluungi.

¹⁹(Ndumikhira lulomo lwa buli ndaalo sikila butekhele bwe liba lienywe lie kumubili.) A siise silala mweana mwabene elala nga nasioobi khu bunyaalu ne bumayaanu khulwe bifuno bimayaanu. Mu ngila ng'eneyo khukhwola luno mweane mwabeene elala nga nasioobi be buluungi khulwe bifuno bitakatifu.

²⁰Nga ne mwaba nasioobi be bubwoni chana, mwaba balekhuule khukhwama mu buluungi.

²¹Mwanyoola bukhala siina khukhwama mu khukhola bibiindu nibio luno munyolelakho chisoni? Ekhumaliilikha we bibiindu ebio lili lifwa!

²²Ne luno mwakholiilwe balekhuule khukhwama khu bwoni mala muli nasioobi ba Wele. Bukhala bwenywe buli limenya lie khukhwirusira elala khu niye ne ekhumaliilikha wayo buli bulamu bwa mindali.

²³Sikila kumuruungo kwe bubwoni kuli lifwa, ne siianwa sia busa sia Wele sili bulamu bwa mindali mu buambaani ne Yesu Kristo Omwami wefwe.