Read lubukusu Bar. 7 Bible Online

Bar. 7 - lubukusu bible

Bar. 7

¹Bawandaayase, ng'ali mulamanya nilio ndi siimbi khuboola, sikila enywe mweesi mumanyile ke lilaka. Lilaka liamianga khu baandu ne basiili balamu.

²Lolela khu mukhasi owabeela, abowa ne lilaka khu museecha wewe nga nilwo omuseecha wewe oyo nasiili omulamu, ne nafwiile, nono aba alekhuulilwe khukhwama mu Lilaka liliamuboa khu museecha wewe.

³Nono, aaba namenya no mundu okundi omuseecha wewe nasiili omulamu, aba alalaangwa omukhobani, ne kakhali omuseecha wewe nafwa, aba ali omukhasi omulekhuule khu lilaka, mala ne acha khu mundu okundi aba sakhola bukhobani tawe.

⁴Bawandaayase, kali busa kario khwinywe. Nga khulwe khuloondekhana ne lilaka nga lili, enywe mwesi mwafwa sikila muli sitonyi sie kumubili kwa Kristo, mala luno muli booyo owalamusibwa khukhwama mu lifwa nio khwole khuba be bukhala mu bukhalabani bwa Wele.

⁵Sikila nga nilwo khwamenyanga khuloondekhana khu liba liefwe lio mundu lilaka liakholeelesia, liliekoomba lie bubwoni mu mibili kiefwe, mala fweesi khwamaliilisila mu lifwa.

⁶Kakhaba kario, luno, khuli balekhuule khukhwama mu Lilaka, sikila khwafwa khwilio liliakhwikalilila efwe khwaba baboe. Se khurumikha lundi mu ngila ekhale eye lilaka liliaandikwa tawe, ne kakhali khurumikha mu ngila embia eya Roho.

⁷ Nono, khulome khuli, Lilaka lili lie bubwoni ku? Ng'ali se kali kario tawe! Ne kakhali liaba Lilaka nilio liliakhola ese namanya bubwoni buli siina. Kaaba bali Lilaka se liaboola lili, “Okhekoomba sio omundu okundi tawe,” andi se namanya liliekoomba nga elio tawe.

⁸Ne mu ngila eye lilaka elio bubwoni bwanyoola bubweyaangu khukholeelesia liliekoomba lie khukhweyenyela bibiindu chingano choosi mwise. Lilaka ne likhaliio tawe, bubwoni buli sisiindu sisiafwa.

⁹Ese samwene lulala, naba omulamu ne khali ne Lilaka tawe, ne nga Lilaka liecha, bubwoni bwalamukha,

¹⁰mala nafwa. Ne Lilaka lilienyekha lireere bulamu mwise, liareera lifwa.

¹¹ Bubwoni bwanyoola bubweyaangu bwabwo, ne mu ngila eye Lilaka bwambea mala bwanjira.

¹²Nono, Lilaka liliene lili litakatifu, liluungi, lundi lilayi.

¹³Ne lino aba liboola lili, Lilaka liaba lilayi mala liareera lifwa liase? Se kali kario tawe! Bubwoni nibwo bubwakhola kano, bwandeerera lifwa khulwe khurumikhira Lilaka lili lilayi, nio liba liabwo liang'ali nga bubwoni liole khubuulwa. Khwako, khulwe engila eye lilaka bubwoni bwekesibwa khuba bubwoni bumayaanu khukhila.

¹⁴Khumanyile khuli Lilaka lili lie buroo, ne ese se ndi omundu we buroo tawe nakusibwa nga nasioobi khu bwoni.

¹⁵ Se manyilisianga nisio kholanga tawe, sikila se kholanga nisio nenya khukhola tawe, ne kakhali kholanga nisio nabiila.

¹⁶Sikila nisio kholanga sili nisio khenyanga khukhola tawe, lino liekesia lili fukiilila ndi Lilaka lili liluungi.

¹⁷Nono ng'ali se ndi ese okholanga sisiindu sino tawe, ne kakhali bubwoni bumenyanga mwise nibwo bukholanga.

¹⁸Manyile ndi bulayi se bumenyanga mu liba liase nga omundu busa tawe. Sikila akhaba liliekoomba lie khukhola bulayi ne lindimo, se nyala khulikhola tawe.

¹⁹Se kholanga lilayi nilio nenya khukhola tawe, ne kakhali, kholanga limayaanu nilio kheenya khukhola tawe.

²⁰Naaba ne kholanga niko kheenya khukhola tawe, lino liekesia lili aba se ndi ese okholanga tawe, ne kakhali, bubwoni bubumenyilemo nibwo bukholanga.

²¹Nono aba lino liba lilaka, sikila ne nenya khukhola lili liluungi, libi liosi aba lili siimbi.

²²Liba liase lie mukari lisangaalilanga Lilaka lia Wele.

²³Ne kakhali mbona Lilaka lie lukano luluundi mu mubili kwase Lilaka likhupana ne lilaka nilio kamebaasio kase kafukiilila, likholanga mba omuboe khu lilaka lie bubwoni lili mu mubili kwase.

²⁴Ese ndi omundu we bubeeleli lukali! Naanu olimbonia ese khukhwama mu mubili kulikho ne kumbila mu lifwa kuno?

²⁵Orio ebe khu Wele, okholanga kano khubirira mu Mwami wefwe Yesu Kristo! Nono, lino, lili liiba liase. Khwise samwene nyala naria Lilaka lia Wele mu mebaasio mwong'ene, ne liba liase nga omundu busa ndumikhirwa khu lilaka lie bubwoni.