Read lubukusu Bar. 8 Bible Online

Bar. 8 - lubukusu bible

Bar. 8

¹Luno likhalakilwa se liliio tawe khwaabo bamenyile mu buambaani ne Yesu Kristo!

²Sikila Lilaka lia Roho, likhurereraanga efwe bulamu mu buambaani ne Yesu Kristo, liakholile ese nabele omulekhuule khukhwama mu lilaka lie bubwoni ne lifwa.

³Niko lilaka liakhilwa khukhola, sikila liba lio mundu liaba litekhele, Wele akhola. Akhalakila bubwoni mu liba lio mundu khulwe khuruma Omwana wewe Omwene, owecha ne liba nga liba lio mundu lie bubwoni, arusieo bubwoni.

⁴Wele akhola lino nio echusie kakenyekha ne Lilaka nga buluungi ne bukhoyela bube mwifwe khumenyile khuloondekhana ne Roho, ne se khuli khuloondekhana ne liba lio mundu tawe.

⁵Kamebaasio kabo bamenyanga nga liba liabwe lio mundu libaboolelanga, kemeelelwa nende niko liba lio mundu lienyanga. Kamebaasio kabo bamenyanga nga Roho nababoolelanga, kemeelelwa nende nisio Roho enyanga.

⁶Khukhwimeelelwa ne liba lio mundu khureraanga lifwa, khukhwimeelelwa ne Roho khureeranga bulamu ne kumuleembe.

⁷Nono, babaandu bekela basiku ba Wele ne bemeelelwa ne liba liabwe lio mundu, sikila se baria Lilaka lia Wele tawe, mala ng'ali se banyala baliria tawe.

⁸Abo bakholanga nga liba liabwe lio mundu ne lienya se banyala basiimisia Wele tawe.

⁹Ne se mumenyile nga liba lio mundu lienya tawe, ne kakhali, mu menyile nga liba lia Roho limuboolelanga, aba, bali, Roho owa Wele amenya mwinywe. Omundu yesi yesi okhali ne Roho owa Kristo tawe aba se ali wewe tawe.

¹⁰Ne Kristo aba namenyanga mwinywe, Roho ali bulamu khwinywe, sikila Wele amukhola baluungi, akhaba kimibili kienywe ne kilikho kicha khufwa sikila bubwoni.

¹¹ Aaba bali Roho owa Wele owalamusia Yesu khukhwama mu lifwa, amenyanga mwinywe, nono oyo owalamusia Kristo khukhwama mu lifwa, akhamuelesia akhaba enywe bulamu khu mibili kienywe kie lifwa khulwe khubao khwa Roho wewe mwinywe.

¹²Bawandaayase, nono khuli ne kimilimo, mala se kili khumenya nga liba liefwe lie kimibili likhwenyelanga tawe.

¹³Sikila mulikho mucha khufwa mwaba ne mumenyanga khuloondekhana ne liba lienywe lio mundu, ne mwaba ne mumenyanga khulwa Roho mwera bikholwa bienywe bie bubwoni, mulamenya.

¹⁴Abo barangirirwa ne Roho owa Wele bali babaana ba Wele.

¹⁵ Sikila Roho niye Wele amuelesie enywe samukholanga khuuba nasioobi ne khumukhola khuuba baari tawe, ne kakhali, Roho amukholanga enywe khuuba babaana ba Wele, ne khulwe bunyali bwa Roho enywe mulilila Wele muli, “Paapa! Paapa wase!”

¹⁶Ali Roho owa Wele omwene oanaanga buloli ne roho wefwe khuboola khuli efwe khuli babaana ba Wele.

¹⁷Ne sikila khuli babaana bewe, khuliba ne chikhabi nicho abikhila babaandu bewe, ne lundi khulisaanga Kristo mu nibio Wele amubikhila niye, sikila khwaaba ne khusaanga mu binyaasio bia Kristo, khulisaanga akhaba mu luyali lwewe lwosi.

¹⁸Mbona ndi niko khunyaasibwamo mu siise sia luno sino se kanyala kalekhasibwa na akeekhe ene ne luyali lulikho lwicha khubuulwa khwifwe tawe.

¹⁹Bibuumbe bioosi bilindiililanga ne lilienya lie silukuluku khulwa Wele khubuula babaana bewe.

²⁰ Sikila bibuumbe biakhalakilwa khutibia sifuno siabio, Wele enya bibe birio ne seli khulwe lilienya liabio bibiene tawe. Ne kakhaba kario lilieyikina liliio

²¹mbo endaalo ndala bibuumbe bibieene bililekhuulwa khukhwama mu burumwa bwabio bwe khubola, mala bisaange mu bulekhuule bwe luyali lwe babaana ba Wele.

²²Sikila khumanyile khuli khukhwola khu siise sia luno sino, bibuumbe bioosi bililila mu buchuuni, nga omukhasi nasaala omwana.

²³ Ne se bili busa bibuumbe biong'ene bilila tawe, efwe khuli ne Roho nga siianwa sia Wele sie khunyoa, akhaba efwe fwesi khulilila mu buchuuni mukari wefwe, nga khulindiililanga Wele khukhukhola efwe babaana bewe mala akhole liba liefwe liosi libe lilekhuule.

²⁴Sikila efwe khwaonisibwa khulwe lilieyikina, ne khwaaba ne khubona nisio khweyikina, aba elio se lili lilieyikina lia ng'ali tawe.

²⁵Ne khwaaba ne khweyikina khu nisio khukhabona tawe, aba khusilindiilila ne liliefwiilisia.

²⁶Mu ngila eyo Roho yesi echanga khukhuyeeta efwe batekhele nga khuli khuri. Sikila se khumanyile nga khukhoyeele khusabe tawe, Roho omwene ekoonjelelanga Wele mu bweyaangu bwefwe mu makhuwa ke khulila kakhanyala kalomalomekha tawe.

²⁷Mala Wele, obonanga mu miooyo kiefwe, amanyile kamebaasio ka Roho nga kali, sikila Roho ekoonjelelanga Wele khulwe babaandu bewe ne khuloondekhana ne lilienya liewe.

²⁸Khumanyile khuli Wele akholanga bulayi mu biindu bioosi ne nabo babamusiima niye, abo balangilwe khuloondekhana ne sifuno siewe.

²⁹Abo nibo Wele arobora khaale, mala lundi abara alubeka bekele nga Omwana wewe nali, nio Omwana chana abe owe khunyoa mu bawandaaye bakali.

³⁰Nono nibo Wele aara alubeka, abalanga, ne nibo alaanga abakhola baba baluungi khu niye Omwene, mala asaanga mu luyali lwewe ne nabo.

³¹Khu kano koosi, khunyala khwaboola siina? Wele aba nali nafwe, naanu onyala waba omusiku wefwe?

³²Wele, okhakhwima Omwana wewe omwene tawe, amuaana sikila efwe fweesi, sanyala akhuelesia bibiindu bioosi nenaye tawe ku?

³³Naanu olisitaka barobore ba Wele? Wele omwene ababoolelanga ali, “Se bali ne bubwoni tawe!”

³⁴Nono, naanu, olibakhalakila? Se ali Yesu Kristo, owafwa mala alamusibwa, aba omulamu ne ali kumukhono kumuseecha kwa Wele, ekongochela Wele sikila efwe!

³⁵Naanu, nono, onyala akhwaukhasia khukhwama khu busiime bwa Kristo? Kumunaanio kunyala kwakhola kurio, namwe buandalafu, namwe linyaasia, namwe enjala, namwe bubanani, namwe busiku, namwe lifwa?

³⁶ Nga liiandiko liboolanga lili, “Khuli mu busiku bwe lifwa biise bioosi sikila ewe, khukholelwa nga kamakheese kalikho ne kacha khwirwa.”

³⁷Tawe, mu biindu bino bioosi khuli angaaki we bakhili khubirira mu oyo owakhusiima efwe!

³⁸Sikila ndi ng'ali ndi se siliio sinyala siakhwaukhasia efwe khukhwama khu busiime bwewe tawe. Se lili lifwa namwe bulamu, malaika namwe babaami babaandi be mwikulu, se bali baliio luno namwe be chindaalo chichiicha,

³⁹bali mu sibala sie mu ngaaki namwe mu sibala sie aasi, se siliio sisiindu mu bibuumbe bioosi silinyala khukhwaukhasia efwe khukhwama khu busiime bwa Wele buli bubwefwe khubirira mu Yesu Kristo Omwami wefwe tawe.