Read lubukusu 1 Bakor. 1 Bible Online

1 Bakor. 1 - lubukusu bible

1 Bakor. 1

¹Khukhwama khu Paulo, owalaangwa khubirira mu lienya lia Wele khuba omurumwa owa Kristo Yesu, lundi khukhwama khu wandaayefwe Sositini.

² Khu kanisa eya Wele eli mu Korinjo, khu boosi balangiilwe babe babaandu ba Wele batakatifu, bali babeewe mu buambaani ne Yesu Kristo, alala ne babaandu boosi buli abuundu basaaya Omwami wefwe Yesu Kristo, Omwami wabwe ne nafwe.

³Wele Paapa wefwe no Mwami Yesu Kristo bamuelesie enywe kumwalaalo ne kumuleembe.

⁴Buli lwoosi ese khupilanga Wele wase orio sikila enywe khulwe kumwalaalo nikwo amuelesie khubirira mu Yesu Kristo.

⁵Khulwe buambaani bwenywe ne Kristo mwabeele baiinda mu biindu bioosi, mu lilomaloma ne mu bukesi bwoosi.

⁶Burume khu makhuwa ka Kristo bwaandalasiibwe lukali mwinywe,

⁷se mwatambile siianwa sia Roho siosi siosi tawe, nga mulindiililanga lukali Omwami wefwe Yesu Kristo afunulibwe.

⁸Lundi akhamuandalasie khukhwola khu siakamo nio mukhaba ne buubi bwosi bwosi mu ndaalo yo Mwami wefwe Yesu Kristo tawe.

⁹Wele ali omusuubilwa. Ali niye owamulaanga enywe khusaanga no Mwana wewe Yesu Kristo, Omwami wefwe.

¹⁰Mu bunyali bwo Omwami wefwe Yesu Kristo mwikoonjelela enywe mweesi, bawandaayase, mufukiilisiane mu niko muboolana, nio bubwaukhani bulekhe khubao mwinywe. Ambaanila elala, mube ne kamebaasio malala kong'ene, ne sifuno silala.

¹¹Basaale babaandu balala khukhwama munju eya Kuloe, bambooleele ese abuwaanga busa, bali bulomani buli mwinywe.

¹² Lekha ndome ndi, buli mulala mwinywe alomanga sisiindu sisiaukhaane, mulala alomanga ali, “Ese owa Paulo,” okundi ali, “Ese owa Apolo,” okundi ali, “Ese owa Petero,” ne okundi ali, “Ese owa Kristo”

¹³Kristo akabukhasiibwe mu bipupu! Aba Paulo niye owamufwiila enywe khu musalaba ku? Enywe mwabatiisibwa nga babeeka ba Paulo ku?

¹⁴ Ese khupila Wele orio ndi se nabatiisiakho yesi yesi khwinywe tawe ne kakhali Kurisipo ne Kayo.

¹⁵Se aliio na mulala nono, onyala aaloma ali mwabatiisibwa nga babeeka base tawe.

¹⁶ (Ee ng'ali nabatiisia akhaba Sitefano nende be nju yewe yong'ene ne se khebulila ne nabatiisiakho okundi yesi yesi tawe.)

¹⁷Kristo se aanduma khubatiisia tawe. Aanduma khukhwilwacha Elomo Endayi, mala ndekhe khukilwacha ne ndumikhira lulomo lwe bukesi bwe babaandu, nio kabe ng'ali kali lifwa lia Kristo khu musalaba se linuulwa bunyali bwalio tawe.

¹⁸Sikila burume bwe lifwa lia Kristo khu musalaba buli busilu khwaabo balikho ne batiba, ne khwifwe khulikho ne khuonisibwa buli bunyali bwa Wele.

¹⁹ Liiandiko liboolanga lili, “Ndonaka bukesi bwe bakesi Mala nde alubeka limanya liaabo babasoma.”

²⁰ Nono, ako kalekha bakesi, namwe babasoma waena? Namwe ba bamanya khuyingana be mu sibala sino? Wele ekeesie ali bukesi bwe sibala sino buli busilu!

²¹Sikila Wele mu bukesi bwewe akhola lilekhe khunyalikhana khu baandu khu mumanya niye khulwe bukesi bwabwe bubwene tawe. Ne kakhali, khulwe burume nibwo khwilwacha bulaangwa buli “busilu,” Wele abisia khuonia abo basuubila.

²²Bayaudi benya kamayia nga sisiekesio ne Bakiriki baenja bukesi.

²³Ne kakhali khwifwe, khwilwacha Kristo owabambwa, burume buno bukhalasia Bayaudi lundi buli busilu khu Be Chikholo,

²⁴ne khwaabo nibo Wele alaangile, Bayaudi alala nende Be Chikholo, burume buno buli Kristo, Kristo oli bunyali bwa Wele ne bukesi bwa Wele.

²⁵Sikila sibonekha khuba busilu bwa Wele sili sie bukesi khukhila bukesi bwo mundu, ne sibonekha khuba butekhele bwa Wele sili sie kamaani khukhila kamaani ko mundu.

²⁶Bawandaayase, luno khebulila nga mwaba, nga Wele ne amulaanga. Mu khulola khwo mundu bakeekhe mwinywe mwaba bakesi, namwe be bunyali, namwe babasaalwa munju eye buriaani,

²⁷Wele mu sifuno siewe arobora nibo sibala sibaasia sili basilu nio aambie bakesi chisoni, lundi arobora nibo sibala sibaasia khuuba batekhele nio aambie be bunyali chisoni.

²⁸Arobora nibio sibala silolela mu bufuumbo ne lifwochola ne sibaasia sili se bili siindu tawe, nio onake nibio sibala sibaasia sili bili ne bukhala.

²⁹Kano kekesia kali se aliio na mulala onyala webonia ebweeni wa Wele tawe.

³⁰Ne kakhali Wele amureerire enywe mu buambaani ne Yesu Kristo, lundi Wele akholile Kristo khuba bukesi bwefwe. Khulwa niye khukholwa khuba baluungi ebweeni wa Wele, khuba batakatifu ba Wele lundi balekhuule.

³¹ Nono, nga liiandiko liboolanga lili, “Oyo yesi yesi owenya khukhwibonia khukhwola ebonie khu niko Omwami akholile.”