Read lubukusu 1 Bakor. 10 Bible Online

1 Bakor. 10 - lubukusu bible

1 Bakor. 10

¹ Nenya enywe bawandaayase, mukhebulile kakekholekha khu bakuuka befwe ba baloonda khu Musa. Boosi baliindwa ne lifuumbi, lundi boosi bambukha enyanja eya Shamu bulayi.

²Boosi babatiisibwa mwifuumbi ne mu nyanja nga babeeka ba Musa.

³ Boosi balia siakhulia sia roho silala esio

⁴ ne khunywa sia roho silala esio. Banywa khukhwama mu lwanda lwa roho lulwachichanga nabo, ne lulwanda olwo lwaba Kristo omwene.

⁵ Ne kakhaba kario bakali khu nibo se basiimisia Wele tawe, mala asalanisia kimibili kiabwe mu sichiimi.

⁶ Nono, kano koosi kali siilolelo khwifwe, kano kakhukaambila khulekhe khukhwikoomba bibiindu biibi nga nibo ne bekoomba.

⁷ Mukhasaaya bifwaani nga balala khu nibo baakholanga tawe. Nga liiandiko ne liboolanga lili, “Babaandu bekhala aasi mu naikara eyakaluukhana yekela sifwaabi sie khunywa, ne khukhobana.”

⁸ Khukhwola khukhaba ne sifwaabi tawe, nga balala khu nibo ne bakhola mala khu ndaalo ndala babaandu chielefu kamakhumi kabili na chitaru berwa.

⁹ Khukhwola khukhakhaka Omwami, nga balala khu nibo ne bakhola mala chindemu chabeera tawe.

¹⁰ Khukhwola khukheng'ulung'unya nga balala khu nibo ne bakhola mala babunisibwa ne Malaika we Lifwa tawe.

¹¹Bibiindu bino bioosi biekholekha khu nibo nio babaandi babonelekho, mala biaandikwa khu khukaambila efwe, sikila khumenyile mu biise nibio sisiakamo sili siimbi khwoola.

¹²Yesi yesi owibaasia ali emile bulayi khukhwola alole bulayi, nio akhakwa tawe.

¹³Buli likhako nilio mwanyoolile lili nga ako kakeechanga khu baandu buli lwoosi. Ne kakhali Wele ali omusuubilwa, lundi sakhamulekhe mukhakwe khutuuma bunyali bwenywe bwe khukhwima mu lisuubila tawe, siise sie khukhakwa, akhamuelesie enywe kamaani khukhwekhaliilikha ne engila eye khuula.

¹⁴Nono, basaale baase bakoosi, mukhasaaya bifwaani tawe.

¹⁵Ndomaloma khwinywe nga babaandu be limanya, mwabene khe mukhalakile niko ndoma.

¹⁶ Sikoombe nisio khurumikhira khu alutare yo Mwami, nisio efwe khupilanga Wele orio, lundi ne khunywelamo, aba se khulikho khusaanga mu mafuki ka Kristo? Ne kumukaati nikwo khumesula, nga nekhukulia, aba se khulikho khusaanga mu mubili kwa Kristo?

¹⁷Sikila kuliio kumukaati mulala, efwe fweesi, khwakhaba bakali, khuli kumubili mulala, sikila khusaanganga khu mukaati mulala okwo.

¹⁸ Yibaasia khu baandu ba Isiraeli, abo ba baliichanga siianiibwe nga embosio, basaanga mu khukhalabanila Wele khu alutare.

¹⁹Nono, ndikho ndoma ndi siina? Biakhulia biianiibwe khu bifwaani namwe bifwaani bibieene bili siindu ku?

²⁰ Tawe! Nisio ndikho ndoma sili mbo embosio niyo abo bakhamanyile Wele baananga, baananga khu bisieeno ne se khuli khu Wele tawe. Ne se nenya enywe muambaane ne bisieeno tawe.

²¹Se munyala mwanywa mu sikoombe sio Mwami lundi mwanywa mu sie bisieeno tawe. Se munyala mwalia khu siaalwa sio Mwami lundi mulie khu siaalwa sie bisieeno tawe.

²² Namwe khwenya khukhole Omwami abe ne likhendekha? Khwibaasia khuli efwe khuli ne kamaani kamakali khumukhila niye?

²³ “Buli siindu sifukiililwa ne lilaka,” ne kakhali se kali bali buli siindu sili ne buyeeti tawe. “Buli siindu sifukiililwa ne lilaka,” ne kakhali se kali bali buli siindu siombakha tawe.

²⁴Omundu yesi yesi akheyenyela omwene busa kamalayi tawe, ne kakhali enyele babaasie kamalayi.

²⁵Muli balekhuule khulia siosi siosi sikusibwa khu soko eye chinyama, ne mukhareebakho kamareeba kosi kosi sikila liba lienywe lie mu mebaasio tawe.

²⁶ Sikila liiandiko ne liboolanga lili, “Sibala nende buli siindu siilimo bili bio Mwami”

²⁷Omundu okhasuubila tawe, ne akhulaanga olie siakhulia mala ofukiilile khucha, lia siosi siosi nisio akhuelesia okhareebakho kamareeba kosi kosi sikila liba liowo lie mumebaasio tawe.

²⁸Ne omundu nakhuboolela ali, “Biakhulia bino biianibwe khu bifwaani,” okhabilia tawe, khulwa oyo okhuboolele ewe nende khulwe liiba lie mumebaasio,

²⁹ne se lili liba liowo wamwene tawe, ne kakhali liba lie mumebaasio lio mundu okundi oyo. Omundu mulala alareeba ali, “Bulayi nono, siina bulekhuule bwase bwe khukhola siosi siosi ne bukhiingililwe ne liiba lie mumebaasio lio kundi busa?

³⁰Ne naaba ne khupila Wele orio khulwe siakhulia siase, siina omundu yesi yesi ne ambiiya sikila siakhulia nisio khupiile Wele orio esio?”

³¹Bulayi, bioosi nibio mukhola, nemulia namwe ne munywa, bikhole khulwe luyali lwa Wele.

³²Menya mu ngila ekhareerera Bayaudi butinyu, namwe, khu Be Chikholo namwe khu Kanisa eya Wele tawe.

³³Khola busa nga ese kholanga, ese khakanga khusiimisia buli mundu mu bioosi nibio kholanga, ne khebaasiakho kamalayi ndi kabe khwise samwene tawe, ne kakhali ndi kamalayi khu boosi, nio wakana baonisibwe.