Read lubukusu 1 Bakor. 11 Bible Online

1 Bakor. 11 - lubukusu bible

1 Bakor. 11

¹ Yikeleesia khwise nono, nga ese nikeleesianga khu Kristo.

²Mufumia enywe sikila buli lwoosi mukhebulilanga ese, lundi muloondanga kamekisio niko namuelesia.

³Ne kakhali nenya mumanye muli Kristo ali omukali khukhila buli mundu, omuseecha ali omukali khukhila omukhasi wewe, ne Wele ali omukali khukhila Kristo.

⁴Khwako omuseecha osabanga namwe owilwachanga burume bwa Wele mu libukaana ne efuumile emurwe aambianga Kristo chisoni.

⁵Ne omukhasi yesi yesi osabanga namwe owilwachanga burume bwa Wele mu libukaana ne akhefuumile emurwe tawe, aambianga omuseecha wewe chisoni, bubwaukhani se buliio khu niye no mukhasi obekile emurwe tawe.

⁶Ne omukhasi aaba ne akhefuuma emurwe wewe tawe, lukhila abekwe. Ne sikila sili sisiindu sie chisoni omukhasi khubeka lichuune liewe, akhoyeela khufuuma kumurwe kwewe.

⁷ Omuseecha se enaana khufuuma kumurwe kwewe tawe, sikila niye ali sifwaanani lundi luyali lwa Wele. Ne Omukhasi ali lukoosi lwo museecha.

⁸ Sikila omuseecha se abuumbwa khukhwama khu mukhasi tawe, ne kakhali omukhasi aabuumbwa khukhwama khu museecha.

⁹Namwe omuseecha se aabumbwa sikila omukhasi tawe, ne kakhali omukhasi sikila omuseecha.

¹⁰Lino nilio likila, omukhasi ne enyekha abe ne sisiindu sie khufuuma emurwe wewe sikila bamalaika, khukhwekesia ali, ali aasi wo museecha wewe.

¹¹Kakhaba kario, mu bulamu bwefwe mu Mwami, omukhasi se abukhana no museecha tawe, namwe omuseecha no mukhasi tawe.

¹²Sikila nga omukhasi aabuumbwa khukhwama khu museecha, mu ngila ng'eneyo omuseecha asaalwa khubirira mu mukhasi, ne bibiindu bioosi biaama khu Wele.

¹³Nono mwabeene bisia, ne buli bulayi khu mukhasi khusaba Wele mu libukaana nakhali ne sisiindu sifuuma emurwe wewe tawe?

¹⁴Liiba lie bulamu khu sibala liliene se limwekesianga lili lichuune lileeyi khu museecha lili chisoni,

¹⁵ne kakhali khu mukhasi lili sisiindu sie lukoosi? Omukhasi aebwa lichuune lileeyi elio nga sie khufuuma.

¹⁶Ne omundu yesi yesi ne enya khuyingana khu kano, ndoma ndi, efwe namwe chikanisa cha Wele se chili ne kumwiima kukuundi kwosi kwosi mu lisaaya tawe.

¹⁷Ese se mufumia enywe mu biindu nibio muboolela luno tawe, sikila mu mabukaana kenywe ng'ali mukholanga kamabi kamakali khukhila kamalayi.

¹⁸Mukhunyoa, nauliile bali buliio mu mabukaana kenywe, mala ese suubila ndi kanyala kaaba ng'ali.

¹⁹(Ng'ali khukhwola bubwabukhani bube mwinywe nio abo bali mu bung'ali boole khubonekha abuwaanga.)

²⁰Ne mwakaanana, se sili siakhulia sie liliikolooya lio Mwami nisio mulichanga tawe.

²¹Sikila ne mulia, buli sia mulala achiilililanga ne siakhulia siewe omwene, khwako balala bali ne enjala ne babaandi bameela.

²²Se muli ne chingo chenywe nicho muliilamo ne khunywa tawe? Namwe mwenya mulekeelesie e kanisa eya Wele ne khuaambia chisoni abo bakhenyalila tawe? Mwenya ese muboolele enywe ndi siina khu kano? Mwenya mufumie enywe? Ng'ali se nyala nakhola ndio tawe!

²³Sikila nanyoola khukhwama khu Mwami liliekisia nilio namubooleele enywe, ndi siilo nisio Omwami Yesu aachaamwa, aabukula kumukaati,

²⁴aakhupila Wele orio, aakumesulamo aaloma ali, “Kuno kuli kumubili kwase kuuli khulwe enywe. Khola kano mu khukhebulila ese.”

²⁵ Mu ngila ng'eneyo, enyuma we siakhulia abukula sikoombe, aaloma ali, “Sikoombe sino sili endakaano embia, eyichusiibwe khubirira mu mafuki kase. Mu siise siosi siosi ne munywaamo, khola muri khu khuukhebulila ese.”

²⁶Sikila mu siise siosi siosi kano kekesia kali buli lwoosi ne mulia kumukaati kuno lundi ne munywa mu sikoombe sino mwilwachanga lifwa lio Mwami khukhwola nga akheeche.

²⁷Khwako, omundu yesi yesi nalia kumukaati kwo Mwami, namwe nanywa khukhwama mu sikoombe siewe mu ngila eye khulekha khumuria tawe, aba aakholeele bubwoni kumubili ne kamafuki ko Mwami.

²⁸Nono, buli mundu akhoyeele anyoe emenieelesie omwene, nio alie kumukaati ne khunywa mu sikoombe sio Mwami

²⁹Sikila aaba bali omundu sanyala amanya nilio kumubili kwo Mwami kwekisia tawe, nga alia kumukaati ne khunywa mu sikoombe, aba ereerera omwene bukhalaki nga nalia ne khunywa.

³⁰Ako kakila bakali mwinywe ne bali batekhele lundi balwaale, lundi bakali bafwa.

³¹Abanga khunyoanga khwimenieelesia fwabeene, andi Wele se akhukhalakilanga tawe.

³²Ne kakhali omwami akhukhalakilanga ne khu khuelesia efwe siiukuumo khube balayi, nio khukheecha khwakhalakilwa alala ne sibala tawe.

³³Khwako bawandaayase, ne mwibuusia alala khulia, buli mulala akhoyeele aliinde owasie.

³⁴Ne mulala khwinywe aaba nali ne njala, akhoyeele alie engo wewe, nio Wele akhamukhalakila enywe ne mukhung'aana tawe. Ne khu makhuwa kakaandi ako, khakaluungisie ne nichile.