Read lubukusu 1 Bakor. 12 Bible Online

1 Bakor. 12 - lubukusu bible

1 Bakor. 12

¹Nono, khuloondekhana nende niko mwambandikiile khu biianwa khukhwama khu Roho Omutakatifu. Bawandaayase, nenya mu manye bung'ali khu biianwa bino.

²Mu manyile muli nga ne mwaba ne mu siili khumanya Wele, mwatiimisibwanga mu ngila chingali, khukhwola mu khusaaya bifwaani biikhalimo bulamu tawe.

³Nenya mu manye muli se aliio yesi yesi orangirirwa ne Roho owa Wele, onyala aaloma ali, “Silaamo khu Yesu tawe!” Ne se aliio onyala eyama ali “Yesu ali Omwami” nakharangiriirwe ne Roho Omutakatifu tawe.

⁴ Biianwa bia Roho biliio chingano chingali, ne Roho mulala chana oyo niye obiaananga.

⁵Kimilimo kikiabukhana kiliio. Ne kakhali khukholelanga Omwami mulala oyo.

⁶Limanya lie khukhola kimilimo liabukhana, ne Wele chana oyo niye oanaanga limanya lie kimilimo khu buli mundu khuloondekhana ne kimilimo kiewe.

⁷Khubao khwa Roho khwekesibwanga mu ngila chichabukhana mu buli mundu khulwe khukhola kamalayi khu boosi.

⁸Roho aananga khu mundu mulala burume bwe limanya, ne khu mundu okundi Roho mwene oyo aananga burume bwe bukesi.

⁹Roho mulala omwene oyo aananga lisuubila khu mundu mulala, ne khu kundi aananga bipawa bie khuonia.

¹⁰Roho aananga khu mundu mulala kamaani ke khukhola kamayia, ne khu kundi, siianwa sie khulomaloma burume bwa Wele, ne khu kundi, bunyali khumanya bubwabukhani akari we biianwa bibiaama khu Roho ne biianwa bikhaama khu Roho tawe. Khu mundu mulala aananga bunyali khuloma mu nimi chingeni, ne khu kundi aananga bunyali khukhwinoosia kaboolilwe.

¹¹Ne kakhali ali Roho mulala mwene oyo okholanga ako koosi, nga omwene ne enya, aananga siianwa lukano khu buli mundu.

¹² Kristo ali nga kumubili mulala, kuli ne bitonyi bikali, kusiili kumubili mulala, akhaba ne kwabumbwa ne bitonyi bibiabukhana.

¹³Mu ngila ng'eneyo, efwe fwesi, khubeele Bayaudi namwe be Chikholo, nasioobi namwe balekhuule, khwabatiisibwa mu mubili mulala okwo ne Roho mulala chana oyo, mala fweesi khwaebwa Roho mulala oyo.

¹⁴Sikila kumubili kumwene se kwabumbwa sitonyi silala tawe, ne kakhali bitonyi bikali.

¹⁵Abaanga sikhandakilo siloma sili, “Sikila se ndi kumukhono tawe, se ndi owe kumubili tawe, lilienelio se lisikhiingilila khuba sitonyi sie kumubili tawe”

¹⁶Abaanga liiru nalio liloma lili, “Sikila se ndi emoni tawe, se ndi owe kumubili tawe,” lilienelio se lilikhiingilila khuba sitonyi sie kumubili tawe.

¹⁷Abaanga bali kumubili kwoosi busa kuli emoni, andi kuulila kuriena? Ne abanga kwoosi kuli liiru liong'ene, andi kuunyilisia kuriena?

¹⁸Ne kakhali, Wele aara buli sitonyi lukano khu mubili nga ne enya kube.

¹⁹Abaanga kumubili, kwoosi kuli sitonyi silala siong'ene andi se kuliio tawe!

²⁰Nga ne kali, biliio bitonyi bikali ne kakhali kumubili mulala.

²¹Nono, emoni se nyala yaboolela kumukhono eli, “Se khwenya ewe tawe!” Namwe kumurwe se kunyala kwaboolela bikhandakilo kuli, “Se khwenya tawe!”

²²Ne kakhali se khunyala khwamenya, ne khukhali ne bitonyi bie kumubili bibonekhana khuba bitekhele lukali tawe,

²³ne bitonyi bie kumubili nibio khwibaasia khuli se bilimo bukhala tawe, bili nibio efwe khukhoyeele khuliinde ne bubweela lukali, ne bitonyi bie kumubili bikhabonekhana bilayi tawe, bikhoya khuliindwa lukali,

²⁴nibio bitonyi bilayi lukali bikheenya tawe. Wele omwene aara kumubili alala mu ngila eye khuaana lukoosi khu bitonyi bibienya sitonyi esio.

²⁵Nono bubwabukhani mu mubili se buliio tawe, ne kakhali bitonyi biakwo biyeetana.

²⁶Ne sitonyi silala sie kumubili siaaba ne sichuunwa, bitonyi bibiindi bioosi bichuunwa nasio, ne silala siaaba ne sifumisibwa, bitonyi bibiindi bioosi bisaanga mu busangaafu bwasio.

²⁷Enywe mweesi muli kumubili kwa Kristo, ne buli mulala ali sitonyi siakwo.

²⁸ Mu Kanisa Wele aara bioosi mu bweyaangu bwabio. Mukhurakikha barumwa, lwa khabili bang'oosi, lwa khataru babekisia, nio abo bakhola kamayia, baloondelwa nende abo babaebwa bunyali khuonia namwe khuyeeta babaandi, namwe khubaluungisia, namwe khulomaloma mu nimi chingeni.

²⁹Boosi se bali barumwa, namwe bang'oosi namwe babekisia tawe. Buli mundu se akhola kamayia,

³⁰namwe khuonia bulwaale namwe khuloma mu nimi chingeni namwe khukhwinoosia kalikho ne kalomwa tawe.

³¹Ra kimiooyo kienywe nono, khu biianwa bibienyekhana lukali. Nono khukhila bioosi, eli engila eloondakho yino.