Read lubukusu 1 Bakor. 13 Bible Online

1 Bakor. 13 - lubukusu bible

1 Bakor. 13

¹Nyala naloma chinomo che babaandu nende che bamalaika boosi, ne kakhali ese ne khali ne busiime tawe, lilomaloma liase se likhila luyoka lwe sibia namwe bibiindu bie khu khuupaniakho mu mienya tawe.

² Nyala naaba ne siianwa sie bung'oosi, nyala naaba ne bukesi bwoosi, nyala naaba ne lisuubila lioosi, lilienyekha khuuyisia bikulu, ne kakhali ne khali ne busiime tawe, aba se ndi siindu tawe.

³Nyala naana bioosi nibio ndi nabio, mbaane akhaba kumubili kwase kwosebwe, ne kakhali ne khali ne busiime tawe, kano se kanjeetakho siindu siosi siosi tawe.

⁴Busiime buli khukhwifwiilisia ne kumwoyo kumulayi. Se buli ne likhendekha, namwe khukhwiniinia, namwe ekibonio tawe,

⁵busiime se buli ne kimiima kimibi namwe chinge tawe, se bubiililwanga tawe, busiime se buloondelesianga kamabi tawe,

⁶busiime se busangaalilanga bubwoni tawe, ne kakhali busangaalilanga bung'ali,

⁷busiime bwefwiilisia mu biindu bioosi, busuubila koosi, bweyikina koosi, lundi bwekhaliilikha mu koosi.

⁸Busiime buli bwa mindali. Burume bubwama khu Wele buliio, ne kakhali se bulibaao buli lwoosi tawe, biianwa bie khulomaloma mu nimi chingeni biliio, ne kakhali biliakama, bukesi buliio, ne buliwao.

⁹Sikila biianwa biefwe bie bukesi nende bie burume bubwama khu Wele biliio khu siise sitiiti busa,

¹⁰ne kakhali bili bibiichufu ne bikheeche, biikhali bibiichufu tawe, bikhaweo.

¹¹Nga ne naba omwana, lilomaloma liase, khukhwiulila, ne kamebaasio kase biaba bie lulwana, ne luno ndi omundu omukhulu, se mbona nisio kholela bibiindu bie lulwana tawe.

¹²Nisio khubona luno sili nga sifwaanani sifulaafulane mu sikioo, ne kakhali khukhabone moni na moni. Luno namanyile atiiti, ne khamanye mu bwichufu nga Wele ne aamanyile ese mu bwichufu.

¹³Ne khusiili khuri bitaru bino nibio biliio, lisuubila, lilieyikina, ne busiime, mala siboofu lukali khu bino sili busiime.