Read lubukusu 1 Bakor. 14 Bible Online

1 Bakor. 14 - lubukusu bible

1 Bakor. 14

¹Busiime nibwo mukhoyeele muyiime. Ra kimiooyo kienywe khu biianwa bia Roho, ne lukali siianwa sie khung'oola.

²Omundu olomaloma mu nimi chingeni salomaloma khu baandu tawe, ne kakhali khu Wele, se aliio yesi yesi omuulila tawe. Alikho alomaloma bung'ali bwe mu bwikisi mu bunyali bwa Roho.

³Ne oyo ong'oola alomaloma khu baandu ne khubaelesia buyeeti, abaraamo kumwoyo ne khubaoleelesia.

⁴Oyo olomalomanga mu nimi chingeni eyombakhanga omwene, ne oyo ong'oola ayeetanga e kanisa yoosi.

⁵Nikoomba ndi andi mweesi mulomaloma mu nimi chingeni, ne kakhali nenya lukali po ndi andi mwanyoolile siianwa sie khung'oola. Sikila ong'oola ali owe bukhala bukali khukhila oyo olomalomanga mu nimi chingeni, omundu akhoyeele abeo onyala aakaluukhasia niko alomaloma, nio e Kanisa yoosi enyoole buyeeti.

⁶Bawandaayase, nono ne nicha khwinywe, ndaba owa buyeeti siina ne ndomaloma mu nimi chingeni? Se ndabakho owe buyeeti bwosi bwosi khwinywe, nekhamureerere lifuunulwa khukhwama khu Wele namwe bukesi namwe bung'oosi namwe liliekisia tawe.

⁷Bukula bibiindu biikhalimo bulamu bibiipanga kimienya nga kumulele, namwe lituungu, omundu yesi yesi amanya ariena kumwenya kulikho ne kupwa liaba bali se bikubuula bulayi tawe?

⁸Ne omundu oupa ekhoombi aba bali se akiipa bulayi tawe, naanu okherekekhele liie?

⁹Mu ngila ng'eneyo, omundu yesi alamanyilisia ariena niko mulikho mulomalomakho, ne kaaba bali burume bwenywe nibwo muaana mu nimi chingeni se buuliilikha bulayi tawe? Kamakhuwa kenywe kalatibila mu mbeo!

¹⁰Chinomo chingali chichabukhana chili mu sibala, ne kakhali se luliio lukhalimo nende nisio lwekesia tawe.

¹¹Ne naaba nekhamanyile lulomo lulikho ne lulomwa tawe, omundu olurumikhira alaba omukeni khwise ne ese ndaba omukeni khu niye.

¹²Sikila muli ne silukuluku khunyoola biianwa bia Roho, khukhwola mukhake khutuuma bibiindu bioosi khurumikhira bulayi biianwa biyeeta khukhwombakha e Kanisa.

¹³Nono, omundu olomaloma mu nimi chingeni khukhwola asabe khulwe siianwa sie khukaluukhasia niko alomaloome.

¹⁴Ne naaba ne saba mu lulimi luno, ng'ali roho wase asaba ne kamebaasio kase se kali siimbi tawe.

¹⁵Nono ese khole ndiena? Ndasaba ne roho wase, lundi ndasaba akhaba ne kamebaasio kaase, ndemba ne roho wase, lundi nimbe ne kamebaasio kase.

¹⁶Ne mupila Wele orio mu roho mwong'ene kanyalikha kariena omundu, okundi oli mwibukaana alome ali “Amina” mu lisaba lienywe lie khu khupa orio? Se ali ne ngila eye khumanya niko mulikho mulomaloma tawe.

¹⁷Akhaba lisaba lienywe lie khu khupila Wele orio ne lili lilayi, omundu okundi oyo se anyoolakho buyeeti na akeekhe ene tawe.

¹⁸Ese khupila Wele orio sikila ndomalomanga mu nimi chingeni khumukhila enywe mweesi.

¹⁹Ne mubukaana mu Kanisa bwakhabeele bulayi ndomalome kamakhuwa karaano kanyala khuulilwa, nio nyale khukhwikisia babaandi, khukhila khulomaloma kamakhuwa chielefu mu nimi chingeni.

²⁰Bawandaayase, mukhaba nga babaana mu libaasia lienywe tawe. Ba nga babaana mu khuba aleeyi khukhwama khu bwoni, lundi ba bakhulu mu mebaasio kenywe.

²¹ Liaandikwa mu maandiko bali, “Khubirira mu ngila eye babaandu khulomaloma mu ndomo chingeni, Omwami aloma ali, ndalomaloma khu baandu base. Ndalomaloma khubirira mu minwa kie bakeni, ne kakhaba kario babaandu base se bakhandekeeresie tawe.”

²²Khwako siianwa sie khulomaloma mu nimi chingeni sili buloli khu bakhasuubila tawe, se sili khu basuubila tawe, ne siianwa sie khung'oola sili sisiekesia khu babasuubila.

²³Ne kaaba nono, bali e Kanisa yoosi yakaanana ne buli mundu arakikha khulomaloma mu nimi chingeni, ne kaaba bali omundu busa namwe okhasuubila tawe, echamo, se alaloma ali mweesi mwakwile ne kamalalu tawe ku?

²⁴Ne kakhali buli mundu aaba ne alikho ang'oola mala okhasuubila tawe, namwe omundu okhamanyile siindu tawe echamo, alaboolelwa bubwoni bwewe khubirira mu niko aulila. Alakhalakilwa khubirira mu koosi niko aulila,

²⁵kamebaasio kewe ke mu bwikisi kalamanyikhana, khwako alasikama mala asaaye Wele alome ali, “Ng'ali Wele ali ano mwinywe!”

²⁶Bawandaayase, kano kali niko mboola. Ne mwakaanana mwibukaana, omundu mulala ali ne kumwenya, okundi liliekisia, okundi lifunulwa khukhwama khu Wele, okundi burume mu nimi chingeni, okundi khukaluukhasia kalomilwe. Buli siindu khukhwola sibe sie buyeeti khu kanisa.

²⁷Ne omundu aaba ne alikho acha khulomaloma mu nimi chingeni, bakhoyeele balomaloma babili namwe bataru bong'ene, mulala sia mulala, ne omundu okundi akhoyeele akaluukhasie kalikho ne kalomwa.

²⁸Ne kaaba bali se aliio onyala akaluukhasia tawe, oyo olomaloma mu nimi chingeni khukhwola asile busa mala omwene alomalome khu Wele.

²⁹Babili namwe bataru banyoolile burume bwa Wele bakhoyeele balomalome, ne babaandi nabo baloleelesie niko abo balikho ne baloma.

³⁰Ne kaaba bali omundu owikhaale mu libukaana anyoola burume khukhwama khu Wele, oyo olikho ne alomaloma akhoyeele asile.

³¹Enywe mweesi munyala khung'oola mulala sia mulala, nio buli mundu eyike ne khuraamwo kumwoyo.

³²Siianwa sie khung'oola khukhwola sibe mu bunyali bwo mundu olikho ng'oola.

³³Sikila Wele se ali Wele owe likoyaano tawe, ne kakhali ali Wele we kumuleembe.

³⁴Nga kabechaanga mu chikanisa choosi che babaandu ba Wele, bakhasi bakhoyeele basila busa ne bali mwibukaana. Se bafukiililwa khulomaloma tawe, nga Lilaka lie Bayaudi liboola, khukhwola bakhaba mu bwimeelesi tawe.

³⁵Ne benya khumanya sisiindu, bakhoyeele bareebe baseecha babwe engo, sili sisiindu sie chisoni khu mukhasi khulomalomela mu Kanisa.

³⁶Eku, mwibaasia muli elomo eya Wele yama mwinywe? Namwe enywe mweng'ene nibo yechamo?

³⁷Omundu yesi yesi ne ebukula khuuba omung'oosi, namwe ali ali ne siianwa sia Roho, khukhwola amanye ali niko muandikila kano kali lilaka lio Mwami.

³⁸Ne omundu nakharekeeresia khu kano tawe, mukhamurekeeresia niye tawe.

³⁹Bawandaayase, nono, yekoomba lukali khung'oola, lundi mukhakaania khulomalomela mu nimi chingeni tawe.

⁴⁰Buli siindu khukhwola sikholelwe mu ngila endayi lundi eye lirekekha lilayi.