Read lubukusu 1 Bakor. 15 Bible Online

1 Bakor. 15 - lubukusu bible

1 Bakor. 15

¹Bawandaayase, luno nenya khumukhebusia enywe, Elomo Endayi niyo namwilwachila, niyo mwafukiilila ne khukisuubila lukali.

²Eyo eli Elomo Endayi, burume nibwo nelwacha khwinywe. Muonisibwa khubirira khu Lomo Endayi mwaba ne mukisuubila lukali, ngeeba mwaba ne mukhasuubila khulwe khunyoolamo sisiindu siosi siosi tawe.

³ Namuelesia enywe nisio nanyoola, sili sisienyekhana lukali. Sili, Kristo aafwa khulwe bubwoni bwefwe, nga kaandikwa mu maandiko,

⁴ aasiikhwa mala alamusibwa enyuma we chindaalo chitaru, nga kaandikwa mu maandiko,

⁵ abonekhela Petero lundi abonekhela barumwa boosi ekhumi na babili.

⁶Lundi aabonekhela babeeka bewe babira chimia chiraano siise silala, bakali basiili balamu, akhaba balala ne bafwa.

⁷Lundi aabonekhela Yakobo, nio aabonekhela barumwa bewe boosi.

⁸ Ekhumaliilikha aambonekhela akhaba seesi, akhaba ese ne ndi nga owasaalwa mu ngila ekhali eya busiele tawe.

⁹ Sikila ese ndi omukeekhe khu barumwa boosi, khaba se khoyeele khulaangwa omurumwa tawe, sikila naapia e kanisa eya Wele siibi.

¹⁰Ne kakhali khulwe kumwalaalo kwa Wele ndi nga ne ndi ndi, ne kumwalaalo nikwo aambelesia ese se kwaba kwa busa tawe. Ne kakhali kwa njeeta nakhola kimilimo lukali khukhila barumwa babaandi boosi, ne ng'ali se siaba sikholwa siase samwene tawe, kwaba kumwalaalo kwa Wele kuuli mwise.

¹¹Nono kakhaba bali kaama khwise namwe khu nibo, kano niko efwe fweesi khwilwacha ne kano niko enywe musuubila.

¹²Nono, sikila burume bwefwe, buli bali, Kristo alamusibwa khukhwama mu lifwa, balala mwinywe banyala baloma bariena bali bafu se bakhalamusibwe tawe?

¹³Ne kaaba bali ako kali ng'ali, keekesia kali Kristo se alamusibwa tawe,

¹⁴ne kaaba bali Kristo se alamusibwa khukhwama mu lifwa tawe, nono efwe se khuli nende siosi nisio khwilwacha tawe, ne nanywe se muli ne sisiindu nisio musuubila tawe.

¹⁵Khutasa khwako, khwekesiibwe khuli khulikho khubea khuloondekhana ne Wele, sikila khwaloma khuli aalamusia Kristo khukhwama mu lifwa ne kakhali kaaba ng'ali bali bafu se banyala balamusibwa tawe, aba se aalamusia Kristo tawe.

¹⁶Sikila bafu baaba ne bakhalamusibwa tawe, aba Kristo yesi se aalamusibwa tawe.

¹⁷Ne Kristo aaba nakhaalamusibwa tawe, aba lisuubila lienywe lili kamarooro busa, mala musitibila mu bwoni bwenywe.

¹⁸Lundi kalekesia kali babasuubila mu Kristo mala bafwa, batiba.

¹⁹Ne kaaba bali lilieyikina liefwe mu Kristo lili lilayi khulwe bulamu buno bwong'ene, nono aba khukhoyeele khwakholelwa siisa lukali khukhila omundu okundi yesi yesi mu sibala sioosi.

²⁰Ne kakhali bung'ali buli bali, Kristo alamusibwa khukhwama mu lifwa nga lisuubisia mbo, abo bakona mu lifwa boosi balilamusibwa.

²¹Sikila nga lifwa liecha khubirira mu omundu, mu ngila ng'eneyo lilamukha khukhwama mu lifwa liicha khubirira mu mundu.

²²Sikila nga babaandu boosi bafwa khulwe buambaani bwabwe ne Adamu, mu ngila ng'eneyo boosi balilamusibwa khulwe buambaani bwabwe ne Kristo.

²³Ne kakhali buli mulala alilamusibwa mu siise siewe. Kristo, ebweeni wa boosi, nio, mu siise sie liliicha liewe, abo baali babewe baloondekho.

²⁴Nio sisiakamo siiche. Kristo akhaule babaami ba roho boosi, be bunyali, nende be kamaani, lundi akhaane Bubwami khu Wele Paapa.

²⁵ Sikila Kristo khukhwola aamiie, khukhwola nga Wele akhaule basiku boosi, mala abare aasi we bikele biewe.

²⁶Omusiku omumaliilisi khuulwa aliba lifwa.

²⁷ Sikila liiandiko liboola lili, “Wele aara bibiindu bioosi aasi we bikele biewe.” Limanyikhaane busa mbo kamakhuwa “Bibiindu bioosi” se katubaasiliamo Wele omwene yesi orechanga bibiindu bioosi aasi owa Kristo tawe.

²⁸Ne bibiindu bioosi nebimalile khureerwa aasi we buruki bwa Kristo, nono niye omwene, nga Omwana abe aasi owa Wele, owara bibiindu bioosi aasi wewe, nio Wele abe buli siindu khu buli mundu.

²⁹Ne kali kariena khu baandu ba baatiisibwa mu bweyaangu mwe babaandu babafwa? Beyikina khunyoola siina? Ne kaaba bali kali ng'ali nga balala balomanga, bali bafu se balamusibwa tawe, siina sikila babaandu abo ne balikho ba baatiisibwa mu bweyaangu mwe bafu?

³⁰Siina sikila nono efwe ne khuli mu busiku biise bioosi?

³¹Bawandaayase, ese mbechanga siimbi khufwa buli ndaalo! Ekisuuni niyo ndi nayo mwinywe, mu bulamu bwefwe mu buambaani ne Yesu Kristo Omwami wefwe, ekila ese ne ndoma kano.

³² Ne naaba bali, napaane ne “Kamanani” ano mu Efeso, ne lilienya lie babaandu, aba nanyoolilekho siina? Ne nekaba bali bafu se balamusibwa tawe, kaaba kario aba nga ne kaboolwa, “Lekha khulie mala khunywe, sikila busiayo khukhafwe.”

³³Mukhasilwaasibwa tawe, “Kumusuumbu kumubi kwonaka kumwiima kumulayi.”

³⁴Siisimukha mwibaasie bulayi mala mulekhe chingila che bubwoni. Mboola abuwaanga khumuambia enywe chisoni ndi balala mwinywe se bamanyile Wele tawe.

³⁵Omundu mulala anyala areeba ali, “Bafu banyala balamusibwa bariena? Bakhabe ne kumubili lukano sina?”

³⁶Musilu ewe! Nomiicha lumiicho mwiloba ne lukhafwiile se lumela tawe.

³⁷Mumiichanga lumiicho lubalule, wakana lumiicho lwe ngano namwe luluundi busa, se sili simelwa sisiamela khale sikhakeleo sirure tawe.

³⁸Wele aananga khu lumiicho olwo kumubili nikwo omwene enya, aelesianga buli lumiicho kumubili kwalwo.

³⁹Kumubili kwe bibiindu bie bulamu bioosi se kuli lukano lulala tawe, babaandu bali ne kumubili lukano lulala, chisaang'i luluundi, chinyuni luluundi ne ching'eeni luluundi.

⁴⁰Ne kiliio kimibili kie mwikulu ne kimibili kie khu sibala, lukoondo lwe kimibili kie mwikulu se lufwaanana ne lukoondo lwe kimibili kie khu sibala tawe.

⁴¹Enyanga eli ne lukoondo lwayo lulwene, kumwesi ne luluundi, ne ching'enieesi luluundi, mala akhaba mu ng'eeniesi lulimo lukoondo chingano chingali.

⁴²Kaliba kario bafu nga balilamusibwa. Kumubili ne kusiikhwa, kubola, ne kakhali ne kulamusibwa se kubola tawe.

⁴³Ne kusiikhwa, kufwaana bubi lundi kumutekhele, ne kulamusibwa kuba ne lukoondo lulayi lundi kwe kamaani.

⁴⁴Ne kusiikhwa kuli kumubili busa, ne ne kulamusiibwa kuba kumubili kwa roho. Kumubili kwe chinyama ne kamafuki kuliio, khwako khukhwola kumubili kwa roho kubeo.

⁴⁵ Sikila liiandiko liboola lili, “Omundu owe khunyoa, Adamu, abuumbwa nga sibuumbe sie bulamu,” ne kakhali Adamu omaliilikha ali Roho oanaanga bulamu.

⁴⁶Se kuli kumubili kwa roho kunyoanga tawe, ne kakhali kumubili kukhali kwa roho tawe, nio kwa roho kuloondekho.

⁴⁷Adamu owe khunyoa, owabuumbwa khukhwama khwiloba aama khwiloba, Adamu owa khabili aama mwikulu.

⁴⁸Abo bali be khwiloba bali nga oyo owabuumbwa khukhwama khwiloba, abo bali be mwikulu bali nga oyo owecha khukhwama mwikulu.

⁴⁹Bulayi bwene nga efwe khufwaana omundu owabuumbwa khukhwama khwiloba, khwako khulifwaana Omundu owama mwikulu.

⁵⁰Bawandaayase, niko ese ndoma kali kari, sisiabuumbwa khukhwama khu mubili ne kamafuki se sinyala siasaanga mu Bwami bwa Wele tawe, ne sisiindu sibola se sinyala siabao buli lwoosi tawe.

⁵¹ Rekeeresia bung'ali bwe mu bwikisi buno. Fweesi se khukhafwe tawe, ne kakhali nga ekhoombi emaliilisi ekhaape, fweesi khukhakaluukhasibwa, mu sise sitiiti, bwangu busa nga khupokisia. Sikila nga ekhoombi ne yipa, bafu bakhalamusibwe, ne aba se balifwa lundi tawe, ne fweesi khukhakaluukhasibwe.

⁵²

⁵³Sikila sisiindu sibola khukhwola sikaluukhasibwe sibe sikhanyala siabola tawe, sifwa khukhwola sikaluukhasibwe sibe sikhanyala siafwa tawe.

⁵⁴ Khwako kano ne kekholekha, sibola ne siakaluukhasibwe siaba sikhabola tawe, ne aba liiandiko liboola lili, “Lifwa lionakibwe, bukhili bwechusiibwe!” Liliba ng'ali.

⁵⁵ “Lifwa, bukhili bwowo buli waena? Lifwa, kamaani kowo ke khureera buchuuni kali waena?”

⁵⁶Lifwa linyoolanga kamaani ke khureera buchuuni khukhwama khu bwoni, ne bubwoni bunyoolanga bunyali bwabwo khukhwama khu Lilaka.

⁵⁷Ne kakhali khupila Wele orio, Wele okhuelesianga efwe bukhili khubirira mu Mwami wefwe Yesu Kristo!

⁵⁸Bawandaayase bakoosi, nono mwiandalasie lundi mube meeso. Ba ne sinani mu milimo kienywe khulwo Mwami, sikila mu manyile muli siindu siosi siosi nisio mukhola mu khukhalabanila Omwami se sitaambamo bukhala tawe.