Read lubukusu 1 Bakor. 16 Bible Online

1 Bakor. 16 - lubukusu bible

1 Bakor. 16

¹ Nono, khuloondekhana ne chirupia chikhoyeele khurusibwa khuyeeta babaandu ba Wele mu Buyuda. Khukhwola mukhole nisio naboolela chikanisa mu Kalatia khukhola.

²Buli khu ndaalo eyo Mwami buli sia mulala khwinywe khukhwola are alubeka chirupia, khuloondekhana nende nisio anyoolile mu muruungo, mala muchibiikhe nio mukhenaana khubuusia chirupia ne nichile tawe.

³Ne nichile, khaelesie babaandu nibo muroboore chibarwa che khubamanyisia mala mbarume bayile siianwa sienywe Yerusalemu.

⁴Ne kaaba bali buli bulayi ese khucha, aba khache nabo.

⁵ Kheche niio muli ne malile khubira mu Masedonia, sikila khabirire Masedonia.

⁶Nyala nabakho nanywe khu siise, wakana kumunaane kwoosi, mala aba munyala mwanjeeta khuchiililila ne lukeendo lwase, osi osi niio khakeleo nje lundi.

⁷Nenya khumubonela elala busa khaba se khuli khumubonakho akeekhe busa ne ndikho mbira tawe. Niyikina khuba nanywe khu siise sileeyi, kaaba bali Omwami afukiilila.

⁸ Khabe mu Efeso muno khukhwola endaalo eya Pendekositi.

⁹Bubweyaangu bwe khukhola kimilimo kimiboofu buli eno, akhaba babemelekhana nase ne baliio bakali.

¹⁰ Timoteo aaba bali abirira ebweeneyo, mukhole eulile ali mwa mwakaanile mwinywe, sikila alikho akholela Omwami kimilimo busa nga seesi.

¹¹Omundu yesi yesi akhamulekelesia tawe, ne kakhali khukhwola mu muyeete achiililile ne lukeendo lwewe mu muleembe, nio aangalukhiile lundi, sikila namwirekekheele akalukhe ne bawandaayefwe.

¹²Ne, khuloondekhana ne wandaayase Apolo, buli lwoosi namurechangamo kumwoyo amukeniie enywe alala ne basuubili babaandi, ne se aasuubila lukali ali akhoyeele khukhwicha mu siise sino tawe. Kakhaba kario, nga ne akhanyoole bubwiyaangu akheche.

¹³Ba meeso, yiiandalasia mwisuubila, nyindaalila, ba ne kamaani.

¹⁴Khola buli siindu mu busiime.

¹⁵ Mumanyile ka Sitefano nende be nju yewe, nibo bali bakristo ba baonisibwa be khunyoa mu Akaya mala beaana mu bukhalabani khu baandu ba Wele. Ese mwikoonjelela enywe, bawandaayase,

¹⁶muloonde burangirisi bwe babaandu nga bano, nende bwo kundi yesi okholanga kimilimo nabo.

¹⁷Ndi ne busangaafu khuloondekhana ne liliicha lia Sitefano, Fochunetasi, ne Akika, baliio nga abeele enywe ne muliio.

¹⁸Mala basangaasiisie ese, lukali busa nga bamusangaasia enywe. Babaandu nga bano bakhoyeele khukhebulilwa.

¹⁹ Chikanisa mu sibala sia Esia chimurumira enywe kimileembe kiabwe, Akwila ne Pirisila ne kanisa eyakaanananga munju yabwe bamukhesiisie kimileembe kimikali mu Mwami.

²⁰Basuubili boosi ano baruma kimileembe kiabwe. Khesiana buli sia mulala ne mwikwayilana mu ngila endakatifu.

²¹Ne kumukhono kwase kumwene mbandika kano. Kimileembe khukhwama khu Paulo.

²²Yesi yesi okhasiima Omwami tawe, silaamo sibe khu niye! Maranata, Omwami wefwe yiicha!

²³Kumwalaalo kwo Mwami Yesu kube nanywe.

²⁴Busiime bwase bube nanywe mweesi mu Yesu Kristo.