Read lubukusu 1 Bakor. 2 Bible Online

1 Bakor. 2 - lubukusu bible

1 Bakor. 2

¹Bawandaayase, nga ne necha mwinywe khukhwilwacha bung'ali bwa Wele nibwo mwaba ne mukhamanyile tawe, se narumikhira kamakhuwa kamaboofu ne busomi bwe angaaki tawe.

²Sikila nga naba nanywe, nakhalaka khukhwibilila buli siindu, khurusiakho Yesu Kristo yeng'ene, ne lukali lifwa liewe khu musalaba.

³ Nono nga necha mwinywe, naba omutekhele lundi naterema kumubili kwoosi khulwe buuri,

⁴ne liliekisia liase ne burume se biaboolwa ne kamakhuwa ke busicha bwe bukesi bwo mundu busa tawe, ne kakhali ne simanyisio sie kamaani ka Roho owa Wele.

⁵Nio, lisuubila lienywe, lilekhe khwima khu bukesi bwo mundu tawe, ne kakhali lime khulwe kamaani ka Wele.

⁶Nilwacha burume bwe bukesi khwaabo baali bakhulu mu lisuubila. Ne kakhali se buli bukesi bwe sibala sino namwe bwe bubwami bubwamiia sibala sino, bubwami bulatibianga kamaani kabwo tawe.

⁷Bukesi nibwo nilwacha buli bukesi bwa Wele bwe mu bwikisi, nibwo aarobora khale khulwe luyali lwefwe sibala ne sikhabaang'anwa tawe.

⁸Se alikhoo na mulala khu baami be sibala sino owamanya bukesi buno tawe. Abanga babumanya andi se babaamba khu musalaba Omwami owe luyali tawe.

⁹ Kakhaba kario, nga liiandiko ne liboolanga lili, “Nisio yesi yesi akhabonakho namwe aulila tawe, nisio yesi yesi akhebaasiakho ali siliikholekha tawe, sili sisiene ne sisiene nisio Wele aarekekha khulwa abo ba bamusiima niye.”

¹⁰Ne kakhali Wele akhumanyisia efwe burume bwewe bwe mu bwikisi khubirira mu Roho wewe, Roho ayimilisianga buli siindu, akhaba bibiindu bibiekisa bie sifuno sia Wele.

¹¹Ali roho owo mundu yeng'ene mu niye omanyanga kakewe koosi, ne mu ngila ng'eneyo, Roho owa Wele yeng'ene niye omanyanga ka Wele koosi.

¹²Se khwanyoola roho owe sibala sino tawe, ne kakhali khwanyoola Roho owarumwa ne Wele, nio khumanye bioosi nibio Wele akhuelesia efwe.

¹³Nono, se khulomaloma mu makhuwa kakekisibwa ne bukesi bwo mundu busa tawe, ne kakhali khulomaloma kamakhuwa kakekisibwa ne Roho, nga ne khwinoosia bung'ali bwe mu roho khwaabo baali ne Roho.

¹⁴Yesi yesi okhali ne Roho tawe, se anyala anyoola biianwa bibiaama khu Roho owa Wele tawe. Omundu nga yuno ng'ali sabimanya tawe, bili bie busilu khu niye, sikila bukhala bwabio bumanyikha busa khubirira mu roho mwong'ene.

¹⁵Yesi yesi oli ne Roho, anyala khumanya bukhala bwa buli siindu, ne se aliio onyala amukhalakila niye tawe.

¹⁶ Nga liiandiko ne liboolanga lili, “Naanu owamanya liliibaasia lio Mwami? Naanu onyala amukaambila niye?” Ne kakhali efwe khuli ne liliibaasia lia Kristo.