Read lubukusu 1 Bakor. 3 Bible Online

1 Bakor. 3 - lubukusu bible

1 Bakor. 3

¹Bawandaayase, ese ng'ali ndoma ndi, se nalomaloma khwinywe nga olomaloma khu baandu bakhulu bali ne Roho tawe. Nalomaloma khwinywe nga olomaloma khu bali mu mubili, nga babaana bang'aalie mwisuubila lie bukristo.

² Namunywesia enywe kamabeele, se biaba biakhulia biiandalafu tawe, sikila se mwaba ne mu biirekekheere tawe. Ne akhaba luno luri mukhabiirekekhera tawe,

³sikila musimenya nga babaandu be sibala. Likhendekha ne bulomani biaba ne bili mwinywe aba lino se liekesia lili muli be sibala sino mala mu menyile nga baandu babaandi bosi ne bamenyile?

⁴ Mulala khwinywe ne aloma ali, “Ese owa Paulo,” ne okundi ali “Ese owa Apolo” aba se mulikho mukhola nga babaandu be sibala busa ta ku?

⁵Ne, Apolo niye naanu? Namwe Paulo niye naanu? Khuli busa bakholi ba Wele, khubirira mu abo ba bamukhola mwasuubila. Buli sia mulala khwifwe akholanga kimilimo nikio Omwami amuelesia khukhola.

⁶ Ese namiicha lumiicho, Apolo achukhiilila lwamela, ne kakhali Wele niye owakhola siachoa.

⁷Oyo omiicha, ne noyo ochukhiilila, ng'ali se balikho siindu tawe. Wele niye akholanga sisiamela siachoa.

⁸Oyo omiicha ne noyo ochukhiilila bali ne sifuno silala. Ne buli mulala akhanyoole kumuruuru khuloondekhana ne kimilimo kiewe.

⁹Sikila efwe khuli bakholi alala ne Wele, ne enywe muli kumukuunda kwa Wele. Lundi enywe muli liliombakho lia Wele.

¹⁰Khuloondekhana ne kumwalaalo nikwo Wele amba, nakhola kimilimo kio mwombakhi omusicha lukali, lundi nombakha kumusiingi kwe liliombakho mala omundu okundi alikho ombakhakho. Ne kakhali buli sia mulala khukhwola aloleelesie bulayi nga ne ombakha.

¹¹Sikila se aliio omundu yesi yesi onyala arao kumusiingi kukuundi tawe, ne kukhali kukwarebwao khale kuuli Yesu Kristo.

¹²Nono omundu yesi yesi ne arumikhira esahabu namwe efwesa, kamabaale ke bukusi bwe angaaki, chimbao, bunyaasi namwe chikhanja khwombakha khu musiingi okwo.

¹³Buli mulimo kwo mundu, kulibonekhana sikila Endaalo eya Kristo elikibakala abuwaanga. Sikila khu Ndaalo ng'eneyo kumulilo kulibuula buli mulimo kwa buli mundu. Kumulilo kulikhaka kwekesie, ng'ali kuli kumulimo kwa lukano siina.

¹⁴Ne omwombakhi akhanyoole kumuruuru kaaba bali nisio ombaakhe se siya tawe.

¹⁵Ne kaaba bali kumulimo kwo mundu yesi yesi kwosibwa, aba alitibia kumuruuru kwewe, ne niye omwene alionisibwa nga owibachile khubirira mu mulilo.

¹⁶ Ng'ali mu manyile muli enywe muli Lukaangu lwa Wele mala Roho owa Wele amenyile mwinywe!

¹⁷Nono, omundu yesi yesi aaba ne onaka Lukaangu lwa Wele, Wele akhamwonake niye. Sikila Lukaangu lwa Wele luli lutakatifu, ne enywe mwabeene muli Lukaangu olwo.

¹⁸Omundu yesi yesi akhesilwasia tawe. Mulala mwinywe aaba ne ebaasianga ali, ali omukesi khulwe bikelo bie sibala sino akhoyeele ebukule khuba omusilu, nio abe omukesi ng'ali.

¹⁹ Sikila niko sibala sino sibaasia khuba bukesi, buli busilu ebweeni wa Wele. Nga liiandiko liboolanga lili, “Wele arekanga bakesikesi mu bukesi bwabwe,”

²⁰ ne liiandiko liliindi liboola lili, “Omwami aamanyile ali kamebaasio ke bakesikesi kali ka busa.”

²¹Yesi yesi nono akhabao onyala weboneselia khu niko babaandu banyala bakhola tawe. Ng'ali buli siindu sili sisienywe.

²²Abeele Paulo, namwe Apolo, namwe Petero, namwe sibala sino, namwe bulamu ne lifwa, namwe bia luno nende bie chindaalo chichiicha, bino bioosi bili bibienywe,

²³ne enywe muli ba Kristo, ne Kristo ali owa Wele.