Read lubukusu 1 Bakor. 4 Bible Online

1 Bakor. 4 - lubukusu bible

1 Bakor. 4

¹Mukhoyeele mwakhwibaasia efwe nga bakholi ba Kristo, bamalile khuelesebwa bung'ali bwa Wele bubwekisa.

²Sisiindu sisienyekha khu mukholi nga yuno sili abe omusuubilwa khu Mwami wewe.

³Luno se mbukulamo lukeendo khukhalakilwa ne nanywe namwe ne sikelo siosi siosi sio omundu tawe. Lundi se nikhalakila samwene tawe.

⁴Se ndikho ne siiukuumo mu mwoyo mwase tawe, ne kakhali elio se liekesia lili ese se ndikho ne kamabi tawe. Omwami omwene niye obisia likhalaka khwise.

⁵Nono se mukhoyeele mwakhalakila omundu yesi yesi siise sisienyekha ne sikhoola tawe. Likhalaka limaliilisi liliinda khukhwola nga Omwami naliicha, alibuula abuwaanga bimoonyo bie musiilima ne khura abuwaanga bifuno bibiekisa bie mumebaasio ke babaandu. Mala buli mundu alinyoola khukhwama khu Wele efuma niyo akhoyeele anyoole.

⁶Bawandaayase, sikila enywe, narumikhiire Apolo ne samwene, mu kano koosi nga simanyisio, nio mweyike niko lusimo lwekisia luli, “Loonda kamalaka kamalayi.” Akhabao mwinywe owebonia khu mundu mulala mala amochelesie okundi tawe.

⁷Naanu wamukhola enywe bakhoongo khu baandi? Se ali Wele owamuelesia enywe buli siindu nisio muli nasio tawe ku? Kaaba kario nono, munyala mwebonia muriena, oli muloma muli nibio muli nabio, se bili siianwa khukhwama khu Wele tawe?

⁸Muli khale nabuli siindu nisio mwenya? Muli khale baiinda? Mwekelile babaami, akhaba efwe ne khukhali babaami tawe? Bulayi, nikoomba ndi andi ng'ali muli babaami, nio efwe khube babaami alala ne nanywe.

⁹Sikila ese mbona ndi, Wele akhuelesie efwe barumwa bubweyaangu bumaliilisi, nga babaandu bakhalakilwe khufwila mu baandu sikila khwabeele nga siloli khu sibala sioosi, khu ba malaika nende sie babaandu.

¹⁰Efwe khuli basilu sikila Kristo, ne kakhali enywe muli bakesi mu buambaani ne Kristo, efwe khuli batekhele, ne enywe muli be kamaani! Efwe bakhumocha, ne kakhali enywe bamukoosia!

¹¹Khukhwola siise sino khukeenda ne njala ne bulesia, khwafwarire chingubo chichatabukha, khupwa, khuyiiyayiiya,

¹² khulua khulwe kimilimo kimiiandalafu. Ne khulaamwa khubiita chikhabi, ne nga khupisibwa siibi khwikhaliilikha,

¹³ne khukhomwa, khukobosia ne kamakhuwa kamalayi, khubalikha busa nga eng'uunda eye sibala sino, khuli kamaandu ke khu sibala khukhwola siise sino!

¹⁴Se muandikila kano, sikila bali nenya khumuambia enywe chisoni tawe, ne kakhali, khumwekisia nga babaana base basiime.

¹⁵Sikila akhaba bali muli ne baliindi chielefu ekhumi mu limenya lienywe lie Bukristo, muli busa ne raraawenywe mulala yeng'ene. Sikila mu limenya lienywe mu buambaani ne Yesu Kristo ese nabeele Paapa wenywe khulwe khumureerera enywe Elomo Endayi

¹⁶ Mwekoonjelela enywe nono, mulolele khwise.

¹⁷Khulwe sifuno sino ndikho nduma Timoteo khwinywe, oli omwana wase omusiime lundi omusuubilwa mu limenya lie Bukristo. Akhamukhebusie enywe kamekisio niko ese nondaanga mu limenya liiya mu buambaani ne Yesu Kristo, lundi niko nikisianga mu chikanisa choosi buli abuundu.

¹⁸Balala mwinywe mwakwile be sileka sikila mwebasisienge muli abeele ese se khamukenie enywe tawe.

¹⁹Omwami aaba ne enya, ese khamukenie embi ari, mala samwene khebonele bunyali nibwo babaandu be sileka bano bali nabwo, kakhaba niko baloma busa tawe.

²⁰Sikila Bubwami bwa Wele se buli sisiindu sie kamakhuwa busa tawe, buli bwe bunyali.

²¹Silala siina nisio mwenya? Niiche ne kumukhomwa namwe niiche ne kumwoyo kwe busiime ne buolu?