Read lubukusu 1 Bakor. 5 Bible Online

1 Bakor. 5 - lubukusu bible

1 Bakor. 5

¹ Ng'ali kalikho kalomekha bali sifwaabi sie bukhobani siibi lukali sili mwinywe, nisio akhaba bakhamanyile Wele bakhanyoolekhanamo tawe. Nabooleelwe bali omundu akonaanga ne maawe omuro!

²Nono munyala mwebonia muriena? Ne kakhali, mukhoyeele mwaba ne bubeeleli, mala omundu okholile sisiindu sie lukano luno arusibwe mu busaangi bwenywe.

³Ne akhaba ne ndi aleeyi nanywe mu mubili, siili busa nanywe mu roho, lundi ndi nga oliyo ne nanywe, mu lisina lio Mwami wefwe Yesu Kristo nabisiisie khale likhalaka khu mundu okholile sisiindu sie chisoni sino.

⁴Nga ne mwakaanana alala, nga nakaanana nanywe mu mwoyo kwase, ne khulwe bunyali bwo Mwami wefwe Yesu buli alala ne nafwe,

⁵mukhoyeele mwakaanisie omundu yuno khu Sietani onakake kumubili kwewe, nio kumwoyo kwewe kwole khuonisibwa mu Ndaalo yo Mwami.

⁶ Se buli bulayi khwinywe khukhwibonia tawe! Eku, se mumanyile lusimo luboola luli, “Limela litiiti liyimbianga siifu sioosi mu sipakhilo?”

⁷ Khukhwola mwinyosieo limela litaayi lie bubwoni nio mube bakwalaafu lukali. Nio mube nga sipakhilo sie sifu siiya sikhalimo limela tawe, ng'ali manyile ndi muli murio. Sikila naikara eye Epasaka yefwe yoolile, sikila luno Kristo, limeeme lie Epasaka yefwe, aaniilwe nga embosio.

⁸ Lekha khusangaalile Epasaka yefwe, se kuli ne kumukaati kulimo kamamela kamakhale ke bubwoni ne bubi tawe, ne kakhali ne kumukaati kukhalimo kamamela tawe, kumukaati kwe bukwalaafu ne bung'ali.

⁹Mu barwa niyo namuandikila enywe namuboolela ndi mukhaambaana ne babaandu be sifwaabi tawe.

¹⁰Nono se nekesia ndi bakhamanyile Wele nibo bali be sifwaabi, namwe balianga, namwe bali babefwi, namwe banuuli, namwe babesaaya bifwaani tawe. Abanga kario andi mukhoyeele khukhwinyokhela elala mu sibala.

¹¹Niko nekisia kali, mulekhe khuambaana no mundu owilanga ali omusuubili mu Kristo ne khana ali owe sifwaabi, namwe omulianga, namwe osaaya bifwaani, namwe owe bitina, namwe omumeesi, namwe omwifwi. Mukhekhalakho khu siaalwa silala no mundu nga oyo ario tawe.

¹²Kakhaba kario ng'ali, se kali kakaase khukhalakila be nje tawe.

¹³ Wele akhabakhalakile. Ne enywe se munyala mwakhalakila babaandu be lisaanga lienywe mwabeene ta ku? Nga liiandiko ne liboolanga lili, “Timania omundu omumayaanu mu mukaanda kwenywe.”