Read lubukusu 1 Bakor. 6 Bible Online

1 Bakor. 6 - lubukusu bible

1 Bakor. 6

¹Mulala mwinywe aba nalomana no mukristo wasie, anyala acha ariena khu bakhalaki bakhasuubila tawe, mala alobe khulekhela babaandu ba Wele bamuyaasie?

²Mukhamanya muli babaandu ba Wele balikhalakila sibala tawe? Ne nono, kaaba bali munyala mwakhalakila sibala se munyala mwarusia bukhalaki mu biindu bikeekhe tawe ku?

³Mukhamanya muli khulikhalakila ne malaika tawe? Nono, aba bibiindu bie mu bulamu buno khubikhalakila!

⁴Ne kaaba bali kamakhuwa nga kano kechao, mulakayila khuyaswa ne babaandu bakhamanyikhaane mu Kanisa tawe?

⁵Chisoni chibe khwinywe! Ng'ali, omundu akhaba mulala omukesi mu busaangi bwenywe onyala wakaya bulomani akari we bakristo aliio.

⁶Ne kakhali omukristo mulala ayila owasie mu koti mala alekhela bakhasuubila mu Wele khurusia bukhalaki tawe!

⁷Khusitakana mwabene khu mwabene khwekesia khuli mwakhiliilwe elala. Se bwakhabeele bulayi busa khwinywe khukholelwa kamabi tawe ku? Se bwakhabeele bulayi khwinywe akhaba khunuulwa?

⁸Ne kakhali enywe mukholanila kamabi ne khunuulana, munuula akhaba bawandaayenywe babeene!

⁹Ng'ali mumanyile muli babooni se balinyoola Bubwami bwa Wele tawe. Mukheesilwasia tawe, babaandu be sifwaabi, namwe basaaya bifwaani, namwe baeeyi, namwe baseecha babeelanakho,

¹⁰namwe babeefwi, namwe balianga, namwe bameesi, namwe bakholela babasiaabwe bitina, namwe banuuli, salikhoo namulala khu bano olinyoola Bubwami bwa Wele tawe.

¹¹Balala mwinywe mwaba murio. Ne kakhali mwakwalaasibwa khukhwama mu bwoni, mwaanibwe khu Wele, mwakholebwe khuba baluungi ebweeni wa Wele no Mwami Yesu Kristo, lundi ne Roho owa Wele Wefwe.

¹² Omundu anyala aaloma ali, “Nasibulwa khukhola sisiindu siosi siosi.” Yee, ne kakhali buli siindu se sili silayi khwiwe tawe. Andi nakhaboolile ndi nyala nakhola siosi siosi, ne se ndikho nja khulekha sisiindu siosi siosi sikhole ese mbe nasioobi wasio tawe.

¹³Omundu anyala aloma ali, “Siakhulia sili sie enda, ne enda eli eye siakhulia.” Yee, ne kakhali Wele akhare sisiakamo khu bioombi. Kumubili se kukhoyeele kwarumikhirwa khulwe sifwaabi sie bukhobani tawe, ne kakhali kukholela Omwami, ne Omwami aananga khulwe kumubili.

¹⁴Wele alamusia Omwami khukhwama mu lifwa, mala lundi akhakhulamusie efwe khubirira mu bunyali bwewe.

¹⁵Mumanyile muli kimibili kienywe kili bitonyi bie kumubili kwa Kristo. Nyala nabukula sitonyi sie kumubili kwa Kristo mala sikhole sitonyi sie kumubili kwo mulaaya ku? Se kanyalikhana tawe!

¹⁶ Namwe wakana se mumanyile muli omundu oambaasia kumubili kwewe no mulaaya ekela siindu silala ne naye tawe? Liiandiko liboolanga abuwaanga busa lili, “Bombi bakhekele kumubili mulala.”

¹⁷Ne kakhali oyo oambaana no Mwami ekela sisiindu silala naye mu roho.

¹⁸Lekhana ne sifwaabi. Bubwoni bwe lukano luluundi nibwo omundu akhola se bwiamba khu mubili kwewe tawe, ne kakhali omundu ooli mu bwoni bwe sifwaabi sie bukhobani akholela kumubili kwoosi bubwoni,

¹⁹ Se mumanyile muli kimibili kienywe kili Lukaangu lwa Roho Omutakatifu, omenyanga mwinywe mala niye Wele amuelesia tawe? Se muli khu bwenywe mwabeene tawe, ne kakhali muli ba Wele.

²⁰Wele aamukula enywe khu bukusi. Nono, rumikhira kimibili kienywe khulwe luyali lwa Wele.