Read lubukusu 1 Bakor. 7 Bible Online

1 Bakor. 7 - lubukusu bible

1 Bakor. 7

¹Nono, khuloondekhana ne bibiindu nibio mwambandikila, omundu akhola bulayi aaba bali se areera omukhasi tawe.

²Ne sikila sifwaabi siliio sikali, buli mundu akhoyeele abe no mukhasi wewe omwene, ne buli mukhasi akhoyeele aaba no museecha wewe omwene.

³Omundu akhoyeele khutabusia kumulimo kwewe nga omuseecha, ne omukhasi akhoyeele khutabusia kumulimo kwewe nga omukhasi, ne buli mundu akhoyeele khukhola lilienya lio owasie.

⁴Omukhasi se ali ne bunyali khu mubili kwewe tawe, ne kakhali omuseecha wewe ali nabwo, mu ngila ng'eneyo omuseecha se ali ne bunyali khu mubili kwewe tawe, ne kakhali omukhasi ali nabwo.

⁵Mukhalobana tawe, ne kakhali mukhole murio ne mufukiilisiane khukhola murio khu siise sitiiti nio mube ne siise sienywe sie khusaba, mala mwile alala lundi nga babareerana. Mu ngila yino mulaliindana khukhwama mu khukhakwa khwa Sietani khulwe khulekha khwenywe khuba ne lilieliinda.

⁶Ese se muboolela enywe lino nga omuyingilila tawe, ne kakhali nga omukaambila.

⁷Ng'ali busa nakhenyile ndi enywe mweesi mube nga nilwo ndi, ne buli mundu ali ne siianwa siewe khukhwama khu Wele, omundu mulala siianwa sino, okundi esio.

⁸Nono, khu bakhareerana tawe, ne khu banamulekhwa ese ndoma ndi, andi bwakhabeele bulayi khwinywe khuchiililila khumenya mweng'ene nga ese.

⁹Ne mukhanyala mwekhaliilikha liliekoomba lienywe tawe, mureerane. Buli bulayi khureera khukhila khuba ne liliekoomba lie kumubili likali.

¹⁰ Khu baandu babareerana ndi ne lilaka likhali liliase samwene tawe, ne kakhali lio Mwami omukhasi khukhwola akhalekha omuseecha wewe tawe,

¹¹ne kakhali ne akhola ario, akhoya arame busa yeng'ene, namwe akobole wo museecha wewe, ne omuseecha akhalekhana no mukhasi wewe tawe.

¹²Khu baandi, ese samwene, ne se ali Omwami tawe, ndoma ndi, omukristo aaba nali no mukhasi okhasuubila tawe mala omukhasi oyo afukiilile khuchiililila khumenya naye, khukhwola akhamulekha tawe.

¹³Ne omukhasi omukristo aaba ne ali no museecha okhasuubila tawe, mala omundu oyo afukiilile khuchiililila khumenya naye, khukhwola akhamulekha tawe.

¹⁴Sikila omuseecha okhasuubila tawe, afukiililwa ebweeni wa Wele khulwe khuba mu buambaani no mukhasi wewe, ne omukhasi okhasuubila tawe, afukiililwa ebweeni wa Wele khulwe khuambaasibwa no museecha wewe omukristo. Kano kaloba khuba kari, andi babaana babwe baaba busa nga babaana bakhamanyile ka Wele tawe, ne kakhali nga ne kali, bafukiililwa ebweeni wa Wele.

¹⁵Ne okhasuubila tawe aaba ne ekoomba khulekha owasie omukristo, aba khekabe kario. Ne kaaba kario aba owasie omukristo oyo, abeele omuseecha, namwe omukhasi, ali omulekhuule. Wele aamubooleele enywe khumenya mu muleembe.

¹⁶Omukhasi omukristo ewe onyala waaba na ng'ali oriena, oli sokhaonie omuseecha wowo tawe? Namwe omuseecha omukristo ewe, onyala waaba na ng'ali oriena, oli sokhaonie omukhasi wowo tawe?

¹⁷Buli mundu mwinywe akhoyeele achiililila khumenya khuloondekhana ne siianwa nisio Omwami aamuelesia niye, lundi nga nilwo aaba Wele ne amulaanga. Lino lili lilaka nilio nikisianga mu Kanisa choosi.

¹⁸Ne omusaani aaba ne afukiilila kumulaango kwa Wele, se akhoyeele akhaka khukhwiyinyosiakho chimbala che busaani tawe, ne omusiinde aaba ne afukiiliile kumulaango kwa Wele, se akhoyeele akhebwa tawe.

¹⁹Sikila omundu abeele omusaani namwe omusiinde se liekesiakho siindu tawe. Siliio sili khuria kamalaka ka Wele.

²⁰Buli mundu akhoyeele arama nga aaba ne alikho afukiilila kumulaango kwa Wele.

²¹Wele ne aakhulaanga ewe, waba nasioobi? Bulayi, likhakhwiembeelesia tawe, lundi ne oli ne bubweyaangu khuuba omulekhuule burumikhire.

²²Sikila nasioobi niye Omwami alangile ali omulekhuule khulwo Mwami, mu ngila ng'eneyo, omundu omulekhuule olangilwe ne Kristo ali nasioobi wewe.

²³Wele aamukula enywe khu bukusi bwe angaaki lukali, nono mukhaba nasioobi be babaandu tawe.

²⁴Basaale, buli mulala arame mu busaangi ne Wele mu liba nilio abamo nga alaangwa.

²⁵Nono, khuloondekhana nende niko mwambandikila khu baandu basiili khureerana tawe. Se ndi ne lilaka khukhwama khu Mwami tawe, ne kakhali mbaana kamebaasio kase samwene nga omundu okhoyeele khusuubilwa khulwe siisa sio Mwami.

²⁶Khuloondekhana siibi siliio luno, nibaasia ndi buli bulayi khu mundu khumenya nga ne ali.

²⁷Oli no mukhasi? Nono, okhakhaka khumulekha tawe. Ewe omusuumba? Nono, okhareera omukhasi tawe.

²⁸Ne kakhali noreera omukhasi, aba se wakholile bubwoni tawe, ne omukhaana okhaacha liilia tawe, ne acha liilia, aba se akholile bubwoni tawe. Ne kakhali bareerana bakhabe ne kamatinyu kamakali mala ese se nenya enywe mube nako tawe.

²⁹Basaale, niko ese ndoma kali kano, se siaramire siise sikali tawe, mala khukhwama luno, babaandu babareerana bakhoyeele bamenya nga bakhareerana tawe,

³⁰Baalila, nga bakhali ne bubeeleli tawe, bachekha nga bakhali ne busangaafu tawe, bakula nga bakhali babeene biindu nibio bakulile tawe,

³¹Bakusia bibiindu, nga bakhali mu milimo kiene ekio elala tawe. Sikila sibala sino, nga ne sili luno, se silabao khu siise sileeyi tawe.

³²Se nenya enywe mwiendekhelele tawe. Omusuumba eembeelela kimilimo kio Mwami, sikila akhaka khusiimisia Omwami.

³³Ne kakhali omundu owareera omukhasi eembeelela bibiindu bie sibala, sikila enya khusiimisia omukhasi wewe,

³⁴khwako se eluungikha lubeka lulala tawe. Omukhaana okhaacha liilia tawe, namwe owe yabwana eembeelela kimilimo kio Mwami, sikila enya khukhwirusilia elala, mu mubili ne mu mwoyo, ne kakhali omukhasi owacha liilia eembeelela kie sibala sikila enya khusiimisia omuseecha wewe.

³⁵Ndikho ndoma kano sikila nenya khumuyeeta enywe. Se ndikho khaka khumurakho lilaka tawe. Ne kakhali nenya mukhole kamaluungi lundi ke abwene, mala mwirusilie elala khukholela Omwami.

³⁶Khwaabo baselelaane, mala bakhakhalaka khureerana tawe. Kaaba bali omundu eulila ali salikho akholela omukhaana kimiima kimilayi tawe, lundi kaaba bali lilikoomba liewe lili likali mala eulila ali bakhoyeele bareerane, aba khe bareerane. Bubwoni se bulikhoo mu kano tawe.

³⁷Ne kakhali kaaba bali omundu aakhalake khulekha khureera mala se ayingiliilwe khukhola ario tawe, ne kakhali ekuumisie mu lienya liewe aba akholile bulayi khulekha khureera omukhaana oyo.

³⁸Khwako omundu oreera omukhasi akhola bulayi, ne oyo okhareera tawe, akhola bulayi lukali.

³⁹Omukhasi owacha liilia se ali omulekhuule omuseecha wewe ne asiili omulamu tawe, ne kakhali kaaba bali omuseecha wewe afwiile, aba ali omulekhuule khucha khu mundu yesi yesi niye enya oli omukristo.

⁴⁰Kakhaba kario, akhabe ne busangaafu bukali aaba namenya nga nali. Eyo niyo enganakani yase, ne ese seesi suubila ndi, ndi ne Roho owa Wele.