Read lubukusu 1 Bakor. 8 Bible Online

1 Bakor. 8 - lubukusu bible

1 Bakor. 8

¹Nono, khuloondekhana nende ke biakhulia biianwa khu bifwaani niko mwaandika. Kali ng'ali, “efwe fweesi khuli ne bukesi”, nga balomanga. Ne bukesi burio kakhaba kario, buniinia omundu aaba ne sileka, ne kakhali busiime bwombakhanga.

²Yesi yesi owibaasianga ali amanyile siindu, ng'ali samanyile nga ne akhoyeele khumanya tawe.

³Ne omundu owasiima Wele amanyikhana khu Wele.

⁴Nono, khuloondekhana khulia biakhulia biianwa khu bifwaani. Khumanyile khuli sifwaani ng'ali siekesia sisiindu sikhaliio tawe, khumanyile khuli Wele mulala yeng'ene niye oliio.

⁵Akhaba bali biliio bilaangwa “bawele” Mwikulu namwe khu sibala, ne akhaba ne bilaangwa “bawele” ne “babaami” biliio bikali,

⁶khwifwe Wele mulala yeng'ene niye oliio, Wele ali Paapa omubuumbi owe bibiindu bioosi ne khubirira mu niye efwe khumenya, lundi aliio Omwami mulala yeng'ene, Yesu Kristo, bibiindu bioosi biabuumbwa khubirira mu niye mala efwe khumenya khubirira mu niye.

⁷Ne buli mundu se amanyile bung'ali buno tawe. Babaandu balala banala bifwaani lukali, akhaba khukhwola luno, ne balia biakhulia nga bino bebaasia bali bili biakhulia bie bifwaani, liiba liabwe lie mu mebaasio lili litekhele, lundi bebaasia bali banyaalutisibwa ne siakhulia esio.

⁸Ne kakhali siakhulia, se sinyala, siang'oona liiambaana liefwe ne Wele tawe, se khutibia sisiindu siosi siosi ne khukhalia tawe, namwe se khunyoola siosi siosi ne khulia tawe.

⁹Lola bulayi, nono, mukhalekha bulekhuule bwenywe mu bikholwa bukhole abo bali batekhele mu lisuubila bakwe mu bwoni tawe.

¹⁰Ne kakhali, omundu owe liiba lie mumebaasio litekhele aaba bali mu makhuwa kano amubonanga enywe mu mwilanga muli, “Muli ne bukesi” ne muliila mu Lukaangu lwe bifwaani, kano, se kalamutasa kumwoyo khulia biakhulia biianibwe khu bifwaani?

¹¹Nono omundu omutekhele yuno, wandaayenywe niye Kristo afwiila, alabuna sikila, “bukesi” bwenywe!

¹²Ne mu ngila yino mulakhola bubwoni khu Kristo ne mukholela bawandaayenywe bakristo bubwoni mu khunyaala liiba liabwe lie mu mebaasio liili litekhele.

¹³Nono, siakhulia siaaba ne sikhola wandaayase akwe mu bwoni, se ndisilia lundi tawe, nio ese khakhola wandaayase aakwa mu bwoni tawe.