Read lubukusu 1 Bakor. 9 Bible Online

1 Bakor. 9 - lubukusu bible

1 Bakor. 9

¹Ese se ndi omulekhuule tawe ku? Ese se ndi omurumwa tawe ku? Ese siili khubonakho Yesu Omwami wefwe tawe ku? Ne enywe se muli kimilimo kiase khu Mwami tawe ku?

²Akhaba babaandi ne bakhafukiilila ese nga omurumwa tawe, ng'ali enywe mufukiilila ese! Sikila bulamu bwenywe mu buambaani no Mwami, enywe mwabeene muli simanyisio muli ng'ali ese ndi omurumwa.

³Babaandu ne banjikiicha, nibabilanga ndi,

⁴se ndi na ng'ali khuebwa siakhulia nende sie khunywa khulwe kimilimo kiase tawe ku?

⁵Se ndi ne bung'ali khulolela khu barumwa babaandi ne bawandaaye bo Mwami ne Petero, mu khukeenda no mukhasi omukristo mungendo chase tawe ku?

⁶Namwe Baranaba nase fweng'ene khukhoyeele khukhola kimilimo nio khulie?

⁷Musikari siina owiruungiranga bibiindu nibio arumikhira mu busikari? Mulimi siina okhalichanga khu biaamo bibiaama mu mukuunda kwewe? Mwaayi siina okharumikhiranga kamabeele khukhwama mwituuli liewe?

⁸Se khoyeele mbaane bilolelo bie bibiindu bia busiele biong'ene tawe, sikila Lilaka lilomanga lirio.

⁹ Liiandike lie Lilaka lia Musa liloma lili, “Okhaboa eeyi emunwa ne olikho okirumikhira khuula tawe.” Mwibaasia muli Wele alomaloma khuloondekhana ne eeyi ku?

¹⁰Ne aalomaloma ario aba ng'ali se ali khwifwe tawe ku? Ee, ako kaandikwa khwifwe. Omundu olima nende okesa bakhoyeele bakhola kimilimo kiabwe mu lieyikina lie khunyoolamo sikelo sie bibiaamo.

¹¹ Khwamiichile lumiicho lwa roho mwinywe. Nono bubi siina buliio khwaba ne khunyoola mwinywe bibiindu bie khurumikhira?

¹²Ne babaandi baaba ne bali na ng'ali eye khunyoola bino khukhwama khwinywe, efwe aba se khuli na ng'ali khukhilakhoo? Ne se khwarumikhiire ng'ali yino tawe ne kakhali, khwekhaliliikhe buli siindu nio khukharao sikhiingililo siosi siosi ebweeni we Lomo Endayi eya Kristo tawe.

¹³ Ng'ali mu manyile muli babaandu bakholanga kimilimo mu Lukaangu, banyoolanga siakhulia siabwe khukwama mu Lukaangu, ne abo bakholanga kimilimo khu alutare, banyoolangakho sikelo siabwe khu biindu biaanilwe nga chimbosio.

¹⁴ Mu ngila ng'eneyo Omwami aalaka ali abo babelwacha Elomo Endayi bakhoyeele banyoola nibio balia khubirira mu milimo miene ekio.

¹⁵Ne kakhali se narumikhirekho ng'ali yino tawe, namwe se ndikho mbandika kano luno nio niyenyele samwene ng'ali yino tawe. Buli bulayi ese khufwa khukhila omundu anyime ng'ali yase niyo niboneselakho!

¹⁶Se ndi na ng'ali eye khukhwibonia sikila nilwacha Elomo Endayi tawe. Ne kakhaba kario, ndi aasi we kamalaka khukhola ndio. Buli bubi bukali khwise nekhelwacha Elomo Endayi tawe!

¹⁷Aaba bali khola kumulimo kuno mu khwenya khwase, aba nyala nalindiilila khuruungwa, ne kakhali khola kumulimo kuno nga oyo okhoyela akukhole, sikila Wele aambelesia ese kumulimo kuno.

¹⁸Nono ese nyoolanga muruungo siina? Kumuruungo kwase kuli khuuba ne bubweyaangu bwe khukhwilwacha Elomo Endayi ne kharuungiakho siindu tawe, lundi ne khabaanja khukholelwa ng'ali yase khulwe kumulimo kuno.

¹⁹Ese ndi omulekhuule, se ndi nasioobi owo mundu tawe, ne kakhali samwene nikholanga mba nasioobi owa buli mundu nio nyale khureera bakali nga kanyalikhana.

²⁰Ne ndi khola kimilimo mu Bayaudi, menya nga Omuyaudi nio mbareere, lundi akhaba ese samwene nekhali aasi we Lilaka lia Musa tawe, menyanga nga oli aasi walio, ne ndikho khola kimilimo akari waabo baali aasi walio nio mbareere.

²¹Mu ngila ng'eneyo, ne ndikho khola kimilimo mu Be Chikholo, menyanga nga mulala khwaabo, okhali aasi we Lilaka lie Bayaudi tawe, nio ndeere Be Chikholo khu Kristo. Kano se kekesia kali se naria Lilaka lia Wele tawe, ng'ali ndi aasi we Lilaka lia Kristo.

²²Ne ndi mu baali ne lisuubila litiiti nikholanga nga mulala khwaabo, nio mbareere khu Kristo. Khwako, nabeele nga omundu owa buli mwima khu baandu boosi, nio wakana mboniekho balala mu nibo mu ngila chosi chosi chinyalikhana.

²³Kholanga kano koosi khulwe Lomo Endayi, nio noole khusaanga mu khabi chayo.

²⁴Ng'ali mumanyile muli batimi be chimbilo bakali babechanga mu mbilo, ne kakhali mulala yeng'ene niye onyoolanga kumuruuru. Nono tima mu ngila ng'eneyo munyoole kumuruuru.

²⁵Buli mutimi ne alikho eyika eananga mukhunyoola sinyaasio sirafu nio khufwarwe engara eye bimuli bibioma busa, ne kakhali efwe khukholela kumuruuru kwa mindali na mindali.

²⁶Ako kakila ne ndimanga mu bukololofu khucha ekhutabusia, ako kakila ne ndi nga omukhupani okhonaka busa bifuusi biewe khu khuupa embeo tawe.

²⁷Mbangasianga kumubili kwase ne bifuusi, mala ngukhola ne kunaliilila nio khakhola ndio samwene nakhilwa khunyoola kumuruuru enyuma we khukhwilwachila babaandi tawe.