Read lubukusu 2 Bakor. 1 Bible Online

2 Bakor. 1 - lubukusu bible

2 Bakor. 1

¹ Khukhwama khu Paulo omurumwa owa Yesu Kristo khuloondekhana ne lilienya lia Wele lundi khukhwama khu Timoteo wandaayefwe. Khu kanisa eya Wele mu Korinjo ne batakatifu ba Wele boosi baali mu sibala sia Akaya sioosi.

²Paapa wefwe Wele no Mwami Yesu Kristo bakhoya bamuelesie enywe kumwalaalo ne kumuleembe.

³Lekha efwe khupile Wele lundi oli Paapa owo Mwami wefwe Yesu Kristo orio, Paapa we siisa, Wele niye buyeeti bwoosi bwamangakho!

⁴Akhuyeetanga efwe mu matinyu kefwe koosi nio nafwe khunyale khuyeeta babaandi baali ne butinyu chingano choosi, khubirira mu buyeeti, nibwo khunyoolile khukhwama khu Wele.

⁵Bulayi bwene nga ne khusaanga mu khupisibwa siibi khwa Kristo, lundi aba khubirira mu Kristo mwenoyo khusaanga mu buyeeti buboofu bwa Wele.

⁶Efwe ne khupisibwa siibi, lili khulwe buyeeti khwinywe ne buonia; ne khunyoola buyeeti aba nono mwesi mwanyoolile buyeeti mala mwaelesiibwe kamaani khukhwekhaliilikha mu lifwiilisia siibi nga nisio akhaba efwe fwesi khubiriramo.

⁷Nono lilieyikina liefwe mwinywe lili likali po, khumanyile khuli nga ne musaanga mu khupisibwa siibi khwefwe, musaanga akhaba mu buyeeti nibwo efwe khunyoola.

⁸ Bawandaayase, khwenya khumukhebusia enywe butinyu nibwo khwanyoola mu sibala sia Esia. Busiro nibwo khwatiuukhwa bwaba bukali po, mala lilieyikina liefwe lie khuba balamu liawa.

⁹Khweulila khuli khwakhalakiilwe lifwa. Ne kakhali kano kakholekha nio khukhakhola khurio khweyikina mu fwabeene tawe ne kakhali khweyikine mu Wele yeng'ene, olamusianga bafu.

¹⁰Aakhuonia efwe khukhwama khu busiku bwe lifwa nga obwo burio ne lundi akhakhuonie efwe. Khwareere lilieyikina liefwe mu niye khuli lundi akhakhuonie efwe.

¹¹Enywe mwesi khukhwola mukhuyeete efwe mu khukhusabila efwe. Nio bakali baape orio mu bweyaangu bwefwe khu khabi nicho khuelesibwe khulwe kamasaba kamakali.

¹²Khukhwibonia khwefwe nikhwo khuno. Khwiboneselia buloli bwe kimiooyo kiefwe. Kikhusuubisianga efwe kili limenya liefwe mu sibala muno, ne lukali mu buambaani bwefwe nanywe bwabeele bwe butakatifu lundi bwa ng'ali, khulwe bunyali bwe kumwalaalo kwa Wele, ne seli khulwe limanya lio mundu busa tawe.

¹³Khumuandikila enywe niko munyala mwasoma mala mwakamanya kong'ene. Ne akhaba luno enywe ne mukhakhumanya efwe bulayi tawe, neyikina ndi mulakhumanya efwe bulayi,

¹⁴nio oli khu Ndaalo yo Mwami wefwe Yesu mukhwebonisiliekho nga fwesi ne khukhebonisilie khwinywe.

¹⁵Mu kano koosi naba nasuubi lukali, kakila ne narekekha mu khunyoa khu mukeniia enywe, nio mubiitwe chikhabi khabili.

¹⁶ Sikila narekekha khumukeniia ne ndi khu lukeendo lwase lwe khucha e Masedonia lundi ne ndikho ngobola, nio nyoole buyeeti khukhwama khwinywe bwe lukeendo lwase lwe khucha e Buyuda.

¹⁷Mukhurekekha khuno, naba nga okaluukhana busa? Kholanga lirekekha liase ne kumwoyo kwe khukhwiyenyela? Ne khukhwerekekha nikhwo ndoma ndi, “Yee,” nende “Tawe” mu siise sisiene ne sisiene?

¹⁸Wele ali ng'ali omusuubilwa. Khwako likhuwa liefwe khwinywe se lili “Yee” nende “Tawe” tawe.

¹⁹ Sikila Yesu Kristo Omwana owa Wele niye Sila, Timoteo ne nase khwelwacha mwinywe se ali owa, “Yee” nende “Tawe” tawe. Ne kakhali buli lwoosi ali, “Yee” eya Wele;

²⁰sikila lisuubisia lia Wele lioosi lili “Yee” mu Kristo. Lino nilio likila khubirira mu Yesu Kristo “Amina” yefwe elomwa khu luyali lwa Wele.

²¹Wele omwene niye okhwombakhanga efwe ne nanywe mu Kristo ne khu khura alubeka.

²²Akhurakho efwe simanyisio siewe khube babeewe, mala akhuelesia Roho Omutakatifu mu miooyo kiefwe, nga rubuni khu koosi niko aakhusuubisia efwe.

²³Ndanga Wele abe omuloli wase, amanyile kumwoyo kwase! Nabisia ndi se nicha Korinjo tawe, khulwe khumukholela enywe siisa.

²⁴Se khulakhakanga khumuyingiilila enywe khu nisio mukhoya musuubile tawe; khumanyile khuli muli ne kamaani mu lisuubila, ne kakhali efwe khukhola kimilimo mwinywe khulwe busangaafu bwenywe.