Read lubukusu 2 Bakor. 10 Bible Online

2 Bakor. 10 - lubukusu bible

2 Bakor. 10

¹Ese samwene Paulo mwikoonjelela enywe, ese niye balomanga bali ndi omuolu ne ndi nanywe, ne nendi aleeyi mba omurafu khwinywe. Khulwe buolu ne bulayi bwa Kristo

²musaba enywe ndi nga ne niicha mukhambingiilila ndafue tawe, sikila ndi na ng'ali ndi nyala narafwira abo balomanga bali efwe khukholanga kimilimo khuloondekhana ne lilienya lie sibala.

³Ng'ali efwe khumenyile mu sibala, ne se khupana nga sibala ne siipana tawe.

⁴Bulwaani nibwo khurumikhira mwiie liefwe se buli bwe sibala tawe, ne kakhali buli bulwaani bwa Wele bwe bunyali, nibwo khurumikhiranga khukhwonakaka ching'etuuti che kamaani. Khwonakakanga kamayiingamo ke bubeeyi;

⁵khurusiangao buli sikundula sie khukhwibonia sikhiingililanga bukesi bwa Wele, khuaamba buli mebaasio mala khukakhola karia Kristo.

⁶Ne mumalile khukhwekesia mu bwichufu buriaani bwenywe, khulerekekha khuukuuma sikholwa siosi siosi sikhali sie buriaani tawe.

⁷Mulikho muloleelela libonekha lienje lie bibiindu. Aliio omundu ebweeneyo owemanyile ali, ali owa Kristo ku? Bulayi, lekha lundi, omwene eyibaasie sikila akhaba efwe fwesi khuli ba Kristo bulayi bwene nga niye yesi nali.

⁸Sikila se ndi ne chisoni tawe, akhaba abulala ne nebonia lukali khulwe bunyali nibwo Omwami akhuelesia efwe, bunyali bwe khumwombakha enywe se buli bwe khumusambuula tawe.

⁹Se nenya mbonekhe ndi ndakhakanga khumuriikhirisia enywe ne chibarwa chase tawe.

¹⁰Omundu mulala anyala aaloma ali, “Chibarwa cha Paulo chili chindafu lundi chindinyu, oli omwene ali alala nafwe, ali omutekhele, ne kamakhuwa kewe se kalimo sisiindu tawe!”

¹¹Omundu nga oyo ario khukhwola amanye ali bubwabukhani se buliio akari we kamakhuwa niko efwe khuandika mu barwa chefwe ne khuli aleeyi nende niko khukhola ne khuli ebweeneyo ne nanywe tawe.

¹²Ng'ali, efwe se khunyala khwakhaka khukhwefwaanania, namwe khukhwilekhaasia khwaabo babeniinia lukali bario tawe. Se bali ne limanya tawe! Bekholela bikelo bie khukhwilekhaasiakho babeene, mala bekhalakila babeene khuloondekhana ne sikelo siaabwe!

¹³Ne kakhali efwe, liliebonia liefwe se libira sikelo tawe, liakamila khu sikelo sie kimilimo nikio Wele akhuelesia efwe, kimilimo kiefwe mwinywe kiosi kili mu sikelo sino.

¹⁴Ne sikila enywe mulimo, se khwabira sisiakamo siefwe nga khwecha ewenywe ne khureera Elomo Endayi eya Kristo tawe.

¹⁵Nono se khweboniselia kimilimo nikio babaandi bakhola kiibira bibiakamo nibio Wele akhurerao efwe tawe. Ne kakhali khwikoomba lisuubila lienywe lichoe mala khube ne khunyala khukhola kimilimo kimiboofu lukali mwinywe buli lwosi mu biakamo nibio Wele akhurerao.

¹⁶Khwako, khunyala khwelwacha Elomo Endayi mu bibala bibiindi engelekha, ne se khunyala khweboniselia khu milimo kikholekhe khale mu mukuunda kwo mundu okundi tawe.

¹⁷ Ne nga liiandiko liboolanga lili, “Yesi yesi owenyanga khukhwebonia khukhwola ebonie khu niko Omwami akholile.”

¹⁸Sikila omundu ofukiililwa, ali niye Omwami ebaasiilie bulayi, ne seli nga omundu omwene ne eyibaasilia tawe.